Mpồl lơh broă neh tus còp, nting bơr chờ gờm Sa tềp mờ pà phan pà kwang bàng, cau ling Pôs đồng ling sền gàr tiah nhàr lơgar Tuy Đức gơ wèt Gah Đơng lam Cau ling Sền gàr tiah nhàr lơgar càr; Mpồl ling dờng Ling tam lơh hơđang ù gờl 3 gơ wèt Mpồl Đơng lam Broă ling klàng kơnhoàl Tuy Đức. Di dơ̆ do, Mpồl lơh broă bơh Dà lơgar dê neh jàu pà 50 bơnah phan pà tus ală hìu bơnhă geh rài kis kal ke in mờ 20 bơnah phan pà ai kơnòm bơsram là kòn ròng ală pôs đồng ling sền gàr tiah nhàr lơgar in.

Tàm sàh tiah kal ke ir gam hòi là sàh tiah 3 Dăk Ngo, còp mờ nting bơr chờ gờm sa tềp ai kwang bàng, cau ling mờ làng bol tàm sàh, Phó Củ tịc Quôk hội đơs niam ngan broă gơnoar ătbồ sàh do neh lơh ngan lơh jăt niam broă lơh sền gròi Sa tềp ai làng bol in. Đềt mềr lùp còp, nting bơr chờ gờm Sa tềp ală kra ƀòn, cau geh bơngă pin dờn là làng bol jơi bơtiàn dồ êt nă cau, Phó Củ tịc Quôk hội kung đơs sùm gơnoar broă bơh kra ƀòn, cau geh bơngă pin dờn dê. Do là mpồl cau tờm, pơgồp bơnah ai jơnau sồr, gùng dà, broă lơh mờ adăt boh lam bơh Đảng, Dà lơgar dê tus mờ làng bol, mơkung tus bal jơh nùs tàm bơ̆t bơtàu mpồl tam klăc dờng gùt làng bol. Di dơ̆ Sơnam pa Ất Tỵ 2025, Phó Củ tịc Quôk hội ồng Trần Quang Phương neh jàu pà 90 bơnah phan pà ai hìu rƀah, kơnòm bơsram rƀah sơrlèt kal ke mờ kra ƀòn, cau geh bơngă pin dờn tàm sàh Dăk Ngo in.

Pơn jăt hơ̆, Phó Củ tịc Quôk hội, Thượng tướng ồng Trần Quang Phương neh tus còp, pà phan ai kwang bàng, cau ling Kwang àng càr Dăk Lăk. Phó Củ tịc Quôk hội neh iăt kơno kwang đơng lam bồ Kwang àng càr yal bè broă lơh broă tàm nam 2024, ală cồng nha pơnrơ ngan tàm broă lơh sền gàr niam lơngăp lơngai rơndăp tăp sèng, tam dră rơcăng dră wơl cau lơh tìs, mờ lam lơh ală broă lơh dong kờl sền gàr lơngăp lơngai rài kis mpồl bơtiàn in; Broă rơndăp lơh kơnòl broă tàm nam 2025, tơrgùm tơngguh tai lơngăp lơngai, sền gàr niam lơngăp lơngai ai ală broă lơh dờng mờ drơng bơtàu tơngguh lơh sa- mpồl bơtiàn tiah do in.

Phó Củ tịc Quôk hội, Thượng tướng ồng Trần Quang Phương đơs niam ngan ală lơh ngan mờ broă lơh geh bơh mpồl kwang àng càr Dăk Lăk dê neh lơh geh tàm nam do òr. Is ồn là tàm srơh “Jơh gùt làng bol sền gàr lơngăp lơngai Dà lơgar”, Ală jơnau neh lơh nền lơh pà 1 rbô 200 nơm hìu bơta nđàc ai hìu bơnhă kal ke bè hìu ơm, hìu bơnhă dờp bơta dong kờl mpồl bơtiàn dê, làng bol jơi bơtiàn dồ êt nă cau tàm ù tiah càr dê neh lơh sir lài 3 nhai pơndrờm mờ broă rơndăp lơh dê neh ai geh Cíñ phủ đơs niam ngan, broă lơh lơh tam gơl pa sră pơ àr gơnoar ătbồ bơh gah dê geh uă tam gơl pràn, jơh nùs…

Đơs sùm bơta kwơmàng bơh broă lơh sền gàr niam lơngăp lơngai rơndăp tăp sèng mpồl bơtiàn tàm ù tiah he dê, Phó Củ tịc Quôk hội tơngkah: Kwang àng càr Dăk Lăk pal pơn jăt tai rơcăng lài ơm rềp mờ ƀòn lơgar, gĭt broă gơlik bơh ngài, bơh gờñ.

“Lơh jăt jơnau đơs: gĭt nền broă gơlik geh, tàm yal tơnggĭt bal jơnau, ring bal jơnau gĭt nền nàng tă pơgồp jơnau đơs di, rơgeh, di tŭ bơsong mhar dipal ờ lời gơtìp rơmơ̆p ndơl”.

Mpồl lơh broă tus còp, pà phan kwang bàng, cau ling Pôs đồng ling sền gàr tiah nhàr lơgar Ia R’vê, Mpồl Lơh sa Sền gàr dà lơgar 737, kwang bàng, kra ƀòn mờ hìu bơnhă dờp bơta dong kờl mpồl bơtiàn dê, kơnòm bơsram geh rài kis kal ke tàm ù tiah kơnhoàl tiah nhàr lơgar Ea Súp. Tàm ală anih tus còp, pà phan, Phó Củ tịc Quôk hội ồng Trần Quang Phương pơyua jơnau nting bơr chờ gờm niam bơnĕ ngan rlau jơh tus kwang bàng, cau ling, gơnoar ătbồ ală kâp mờ làng bol tiah nhàr lơgar Ea Súp. Ồng sồr mpồl Cau ling Sền gàr tiah nhàr lơgar càr Dăk Lăk lơh đềt mềr nùs nhơm ling klàng làng bol, pơn jăt tai lơh jăt niam ală broă lơh tơrlòng lài geh cồng nha bè đảng viên pơrjum mờ thôn tiah nhàr lơgar, “Sơnam pa sền gàr tiah nhàr lơgar ram nùs làng bol”, “Kòn ròng pôs đồng ling sền gàr tiah nhàr lơgar”, “Yờ cơnđoà jơng oh tus hờ klờng”.

Kung tàm càr Dăk Lăk sơl, ala măt kwang đơng lam bồ Đảng, Dà lơgar, Phó Củ tịc Quôk hội ồng Trần Quang Phương neh đềt mềr lùp còp, pơndờm pơnđiang kwang bàng mpồl ala măt cau lơh broă, cau tàm mpồl, cau lơh phan, cau lơh broă, is ồn là ală cau tàm mpồl cau ala măt cau lơh broă, cau lơh phan cau lơh broă geh rài kis kal ke, gơtìp rềs àr lơh broă, kòp kơn jơ̆, cau lơbơn lơño tàm mpồl bơtiàn. Phó Củ tịc Quôk hội bal mờ mpồl lơh broă neh jàu pà 300 bơnah phan pà Sa tềp ai cau tàm mpồl ala măt cau lơh broă, cau lơh phan cau lơh broă geh rài kis kal ke in.