Ală ngai do, bi H’ Ly Byă, ơm tàm sơnah ƀòn Thành Nhất, càr Dăk Lăk bòl glar ngan jòi blơi sră măy ai bàr nă kòn in, dồ nă kòn bơsram ơdŭ 1 mờ dồ nă kòn bơsram ơdŭ 10. Ală kòn gơ wèt cau geh dờp bơta dong kờl, ai jồm sră măy den tàng lài hơ̆ hìu bơnhă ơm kơ̆p hìu bơsram pà sră, ờ rơcăng lài blơi gờñ. Tus tŭ nam bơsram pa sơnđờm, hìu bơsram ờ hềt geh tơl sră nàng ai kơnòm bơsram in jồm, den ală hìu tăc sră neh jơh sră măy.

“Lòt bơh dơ̆ lài rao, lòt pơdik lòt pơdar sùm bè hơ̆ den. Digơlan pal 5,6,7 hìu tăc sră tai. Ơdŭ 1 den tơl rao mơya gam kòn bơsram kâp pe den ờ tơl tus 4, 5 pang sră tai”.

Ờ mìng mè bèp pơdik pơdar jòi sră, tàm bàr pe hìu bơsram, pơgru kung gam chài ngan bơsong jơnau ờ tơl sră nàng broă bơsram ờ gơtìp gơkòl. Ùr pơgru Lê Nguyễn Phương Minh, pơgru bơto Hìu bơsram Bal ơm sa bĭc tơn Kâp dùl mờ Kâp bàr Buôn Đôn, sàh Buôn Đôn, càr Dăk Lăk, pà gĭt:

“Tŭ do, ndrờm bè ơdŭ lơi kung geh lơm bàr pe nă kơnòm bơsram ờ tơl sră. Ală kòn jồm sră bơh bi dê bơsram lài nàng ngui ing. Geh ală kơƀàng bàr nă bơyô geh sră den tam pà ƀà bal gơ̆p in, geh tŭ là pe nă bơyô ngui bal dồ pang sră”.

Ồng Thái Văn Lộc, Lam bồ Hìu bơsram Bal ơm sa bĭc tơn Kâp dùl mờ Kâp bàr Buôn Đôn pà gĭt, tơnơ̆ ngai sơnđờm mŭt nam bơsram pa, hìu bơsram kung gam ờ tơl pơgăp 65% sră măy sơl. Tềng đăp măt, ală pơgru gam jà tă pơgồp ală sră măy yau bơh ală khoá bơsram lài dê nàng bơsong đau dồ bơnah. Bơnah gam wơl den kung gam pal ơm kơ̆p sơl: “Hìu bơsram dan ală mpồl lơh broă lĭp mờ tăc gờñ bơtơl ală sră, ngan là ală pang sră gam ờ tơl tàm tiah sar, tiah ngài, nàng kơnòm bơsram geh tơl sră bơsram”.

Càr Dăk Lăk geh pơgăp 650 rbô nă kơnòm bơsram bơh mầm non tus kâp pe gam bơsram tàm ală anih bơto bơtê. Nam bơsram 2026 – 2027, rlau 34% kơnòm bơsram gơ wèt ală mpồl cau ai lài geh dờp bơta dong kờl sră măy. Gah Bơto bơtê càr Dăk Lăk gam lam lơh broă rơndăp lơh ngui kes priă dà lơgar blơi sră, ai tơmŭt tàm hìu sền sră hìu bơsram dê nàng kơnòm bơsram in jồm. Bulah bè hơ̆, ală tŭ lơh jăt gam tìp kal ke tài bơh ờ geh anih tăc sră. Jăt mò Lê Thị Kim Oanh, Phó Kwang Lam bồ Sờh Bơto bơtê mờ Bơsram càr Dăk Lăk, sờh neh lùp mờ ală mpồl tăc sră, lòt sền ală sră tàm bàr pe ƀòn lơgar rềp bal mơya kung gam ờ hềt geh tơl khà sră sơl nàng lam blơi tơrgùm bal.

“Tŭ do, Sờh Bơto bơtê mờ Bơsram neh lơh broă mờ ală mpồl tăc sră, Hìu lĭp sră Bơto bơtê Việt Nam mờ Ƀộ, Gah bơto bơtê mờ bơsram nàng yal kal ke, dan geh gùng dà broă rơndăp lơh tă bơsong bè anih tăc sră. Jơnau kờñ tềng đăp măt là gờñ bơtơl khà sră gam ờ tơl, lơh bè lơi nàng kơnòm bơsram in geh tơl sră nàng bơsram”.