Tus bal pơrjum geh ala mat kwang đơng lam bồ ală Ƀộ, mpồl, gah broă lơh dà lơgar; Ƀí thư Tỉñ ủy, Củ tịc Ủy ƀan Ñân zân 5 càr Tây Nguyên (geh: Dăk Lăk, Gia Lai, Kon Tum, Lâm Đồng, Dăk Nông) mờ 9 càr rềp bal (geh: Quảng Nam, Quảng Ngãi, Bình Định, Phú Yên, Khánh Hòa, Ninh Thuận, Bình Thuận, Đồng Nai, Bình Phước).

Đơs mut pơrjum, Phó Thủ tướng Trần Lưu Quang đơs nền: lơh sa – mpồl bơtiàn tiah Tây Nguyên geh bơta bơtàu tơnguh niam ngan; bơta kuơ niam chài ală jơi bơtiàn geh prap gàr, tàm pơ dờn mờ ngui niam; mpồl sền gàr dà lơgar jơh gùt làng bol, mpồl sền gàr lơngăp lơngai tàm làng bol, mpồl rơcang gàr tàm làng bol geh lơh kơ̆ kơljap, lơngăp lơngai geh gàr niam.

Bulah bè hơ̆, bơtàu tơnguh lơh sa – mpồl bơtiàn tiah Tây Nguyên kung gam ờ hềt dipal mờ bơta kuơ, gơnoar broă, bơta pràn, bơta ƀuơn bơh tiah do dê. Nàng bơtàu tơnguh kơ̆ kơljap tiah Tây Nguyên, làng bol geh rài kis hờm ram, chờ hờp, gàr kơ̆ lơngap lơngai, sền gàr dà lơgar jat di jơnau kờñ, jơnau sồr Nghị quyết sồ 23 bơh Ƀộ Cíñ trị dê, Thủ tướng Cíñ phủ neh lơh nền ai tơlik Rơndap broă bơtàu tơnguh lơh sa – mpồl bơtiàn gơ jat bal mờ sền gàr lơngăp lơngai, sền gàr dà lơgar tàm ù tiah Tây Nguyên.

Jơnau kờñ tờm bơh Rơndap broă bơtàu tơnguh lơh sa – mpồl bơtiàn gơ jat bal mờ sền gàr lơngăp lơngai, sền gàr dà lơgar tàm ù tiah Tây Nguyên dê là tơnguh cồng nha bơtàu tơnguh lơh sa – mpồl bơtiàn gơ jat bal mờ sền gàr lơngăp lơngai, sền gàr dà lơgar tàm Tây Nguyên tàm tơngai tus. Bơh hơ̆, ală kwang bàng tơrgùm cribơyai broă lơh nàng lam lơh ngan ngồn, mhar ai Nghị quyết sồ 23 mờ Rơndap broă ngui tàm rài kis, pơgồp bơnah bơtàu tơnguh tiah Tây Nguyên mhar, kơ̆ kơljap, gàr kơ̆ lơngăp lơngai, sền gàr dà lơgar.

Tàm pơrjum, Đại tướng Tô Lâm đơs nền: Đảng, Dà lơgar sùm lời ai bơta sền gròi uă ngan bè tơl bơta mờ neh ai tơlik uă nghị quyết, jơnau pơn dut nàng bơtàu tơnguh tiah Tây Nguyên. Bơta tờm rềp ndo là Nghị quyết sồ 23 bơh Ƀộ Cíñ trị dê bè “Gùng dà bơtàu tơnguh lơh sa – mpồl bơtiàn mờ sền gàr dà lơgar, sền gàr lơngăp lơngai tiah Tây Nguyên tus nam 2030, broă wèt sền tus nam 2045” mờ Rơndap broă bơtàu tơnguh lơh sa – mpồl bơtiàn gơ jat bal mờ sền gàr lơngăp lơngai, sền gàr dà lơgar ù tiah Tây Nguyên bơh Cíñ phủ dê.

Đại tướng Tô Lâm sồr ală mpồl, ƀộ, gah broă lơh, càr ring bal, dùl nùs bal, lơh broă jơh nùs, lơh gơtùi ală jơnau sồr lơh; tơrgùm tơl broă lơh, priă jền, lơh ngan lam lơh geh cồng nha ală gùng dà, broă lơh pa, tam gơl pràn nàng lam lơh ală jơnau kờñ mùl màl tàm Rơndap broă neh ai tơlik mờ nùs nhơm “5 kràñ cê”. Mùl màl: Kràñ cê tă bơsong kal ke, kòl yan; kràñ cê lơh sir, lam lơh geh cồng nha ală gùng dà, broă lơh, broă dong kờl krơi is gơ wèt mờ Tây Nguyên; kràñ cê lơh geh tam gơl pràn, pơrlai, ngui bơta pràn, bơta ƀuơn bơh tiah do dê, ngui niam bơta kuơ niam chài, kah yau, kòn bơnus ù tiah Tây Nguyên, nùs nhơm khin cha, kơ̆ dơn bè nùs nhơm Đam San ndu gơn rơh gơ gơs bơta gơn kơnờm bơtàu tơnguh lơh sa, niam chài, mpồl bơtiàn, tơnguh niam rài kis bơh làng bol ală jơi bơtiàn Tây Nguyên dê, “ờ lời cau lơi gơtìp lời wơl hờ ngkời”, kràñ cê bơsong bơh gờñ, bơh ngài, bơh ală bơta pơhìn gơlik geh broă kal ke bè lơngăp lơngai, rơndap tap sèng ring lơngai, ờ lời gơtìp rmơp ndơl, nisơna; kràñ cê lơh kơ̆ kơljap anih lơh broă cíñ trị kâp hơ đơm kơ̆ kơljap, pràn kơldang, lơh jat jơnau sồr, kơnòl broă; tơnguh kơnòl broă bơh kwang bàng, công chức dê tàm broă lam lơh kơnòl broă, jat di nùs nhơm đơng lam bơh Tổng Ƀí thư Nguyễn Phú Trọng, Thủ tướng Cíñ phủ Phạm Minh Chính dê là: “Cau lơi ờ khin lơh, cau lơi lơh ờ gơtùi den ơm tĕ dùl gah nàng lời cau ndai in lơh”.

Đại tướng Tô Lâm đơs nền: sồr kâp ủy, gơnoar atbồ ală càr rềp bal pơgồp bal jơh nùs mờ ală càr Tây Nguyên tàm broă lam lơh Rơndap broă bơh Cíñ phủ dê, sơlơ tơnguh tai lơh broă bal, lơh bal bơtàu tơnguh lòt nhơl, phan bơna gùng lòt, gơ hòi gơ jà bơcri priă, ngui geh cồng nha bơta geh is, cau lơh broă, ù tiah brê bơnơm mùl geh, krơi is bơh Tây Nguyên dê. Bơh kah yau jŏ rài, bơhiàn yau khin cha jak chài tàm rài tam lơh mờ pràn kơldang, bơceh lơh brồ guh tàm tam gơl pa, nùs nhơm tam klac bal, dùl nùs jat Đảng, jat Wa Hồ bơh làng bol ală jơi bơtiàn Tây Nguyên dê, Đại tướng Tô Lâm pin dờn uă ngan là: Đảng ƀộ, gơnoar atbồ, mpồl phàu crong mờ làng bol ală càr Tây Nguyên rơp sơrlèt gan tơl kal ke, bơta lòng, lơh gơtùi kơnòl broă bơtàu tơnguh lơh sa – mpồl bơtiàn, gàr niam lơngăp lơngai, sền gàr dà lơgar, mhar ai Tây Nguyên bơtàu tơnguh pràn, tơl làm mờ kơ̆ kơljap jŏ jòng sùm.