Củ tịc Quôk hội ồng Trần Thanh Mẫn đơs: Dơ̆ 1 bơh pơrjum dê neh lơh geh cồng nha; geh cau tĕ khà mờ làng bol sền gròi, jat sền. Broă lơh kwang bàng neh geh lơh di tŭ, di jơnau sồr, di broă rơndap lơh mờ khà sră pồ uă. Nùs nhơm cribơyai tàm hìu pơrjum, tàm ală mpồl mờ ală dơ̆ lùp, hơ jơnau lùp duh hồl, ring bal jơnau đơs, geh tơngume tờm, tơrmù lơyah. Uă kwang bàng geh đơs, geh uă jơnau đơs niam, ngan ngòn, jat nùs nhơm bơt bơtàu, geh kơnòl uă, geh uă broă lơh drơng ai tơngume đơng pơlam lơh sa – mpồl bơtiàn, sền gàr dà lơgar, sền gàr lơngăp lơngai bơh Cíñ phủ, ală ƀộ, gah broă lơh dê in.

Tàm pơrjum dơ̆ 34, Ủy ƀan Thuờng vụ Quôk hội sền sơ wì nền nòn mờ đơs loh làng rơndap broă lơi, jơnau rơcang cih lơi neh geh tơl bơta nàng yal Quôk hội in ring bal tàm dơ̆ 2, ngan là ală rơndap broă lơh geh gơ rềng dờng ngan bè Adat Ƀảo hiểm xã hội (tam gơl) mờ ală rơndap broă lơh, jơnau rơcang cih kờp dŭ yal Quôk hội in ring bal jat broă rơndap lơh tàm 1 dơ̆ pơrjum (bè: Rơndap ù tiah dà lềng dà lơgar; Adat atbồ, ngui phan tam lơh, phan bơrtoh mờ phan dong kờl (tam gơl); ală nghị quyết lam lơh pơrlòng lài broă lơh dong kờl krơi is ai càr Nghệ An, ƀòn dờng Đà Nẵng in). 

Củ tịc Quôk hội ồng Trần Thanh Mẫn sồr Ủy ƀan Thuờng vụ Quôk hội tơrgùm tàm ală broă neh geh bơ tơl tàm Broă lơh lơh adat boh lam, kơrnuat boh lam nam 2024 dê: “Adat tam gơl 4 adat boh lam là: Adat tam gơl, bơ tơl 2, 3 bơta bơh Adat Ù tiah, Adat hìu ơm, Adat kă bro ù tiah hìu đam; Adat ală ngân hàng mờ Nghị quyết bơh Quôk hội dê bè tơrmù priă dia gơguh uă. Ală broă lơi kâp geh gơnoar neh lơh nền den mờ khat dùl broă lơi kung pal tă bơsong kal ke, kòl yan”.

Ủy ƀan Thuờng vụ Quôk hội neh ai jơnau đơs bè jơnau rơcang cih Adat rơndap tap sèng lơngap lơngai lòt rê gùng ù gờl. Kwang atbồ Ủy ƀan sền gàr dà lơgar mờ lơngap lơngai bơh Quôk hội dê ồng Lê Tấn Tới đơs loh: ngai 22/5, Quôk hội neh cribơyai tàm Hìu pơrjum bè jơnau rơcang cih Adat rơndap tap sèng, lơngăp lơngai lòt rê tàm gùng ù gờl. Sền bal ală jơnau đơs ndrờm ring bal mờ jơnau rơcang cih Adat rơndap tap sèng, lơngăp lơngai lòt rê gùng ù gờl neh geh cih dờp, tam gơl. Pal sền ngac, Kwang atbồ Ủy ƀan sền gàr dà lơgar mờ lơngăp lơngai đơs loh: jat tàm bơta geh ngan tàm tơngai lài, sồr Ủy ƀan Thuờng vụ Quôk hội ai bơ tơl jơnau cih “rơndeh oto pơndiang kơnòm bơsram, kơnòm mầm non halà rơndeh oto pơndiang nac, pơndiang phan pơgồp bal mờ broă lơh jun, rò kơnòm bơsram, kơnòm mầm non” tàm Bơta 46 bơh jơnau rơcang cih Adat boh lam dê. Phó Củ tịc Quôk hội ồng Nguyễn Khắc Định geh jơnau đơs: “Rơndeh jun, rò kơnòm bơsram pal geh bơta niam is, lơh bè lơi nàng cau atbồ, cau măi rơndeh tŭ mù bơh rơndeh pal git loh tàm rơndeh ờ gam cau. Bol he pal yal tơngume do làm uă, sền gròi làm uă, lam lơh kờp sền nền nòn nàng lơh bè lơi ală rơndeh ờ tơl bơta niam jat jơnau sồr pal gơtìp sơrbì jơh”.

Geh jơnau đơs ring bal uă mờ jơnau cih gơ wèt mờ rơndeh oto pơndiang kơnòm bơsram, kơnòm dềt, gàr niam rơndap tap sèng, lơngăp lơngai lòt rê tàm gùng gơ wèt mờ broă lơ pơndiang jun, rò kơnòm dềt mầm non, kơnòm bơsram mờ rơndeh oto, Kwang gơnoar cih Quôk hội ồng Bùi Văn Cường đơs là: Bơdìh mờ jơnau sồr gơ wèt mờ rơndeh oto, gam geh jơnau sồr gơ wèt mờ cau măi rơndeh, cau atbồ tàm rơndeh, hìu bơsram tai… Kuơmàng, dilah pơndiang kơnòm bơsram kâp 1, kơnòm mầm non pal geh cơ gĕ nggui dipal mờ sơnam jat jơnau sồr mờ pal lơh loh jàu ai anih lơh broă lơi in cih nàng gơ in wil tơl: “Bơta 70 Adat Gùng ù gờl cih geh 2 bơta rơndeh jun, rò kơnòm dềt, kơnòm bơsram là hìu bơsram mờ mpồl lơh sa kă bro jun pơndiang, sồr adat do ờ mìng cih kơnòl bơh hìu bơsram dê mờ gam cih anih kă bro pơndiang tŭ jun, rò kơnòm dềt, kơnòm bơsram mờ rơndeh oto kung pal geh kơnòl tàm broă do”.

Kung tàm dơ̆ pơrjum do, Ủy ƀan Thuờng vụ Quôk hội ai jơnau đơs bè broă mblàng lơh loh, cih dờp, tam gơl jơnau rơcang cih Adat Càr lơgar (tam gơl) mờ ai jơnau đơs bè Rơndap ù tiah Càr lơgar tơngai bơh nam 2021 tus nam 2030, broă rơndap lơh tus nam 2050 mờ tam gơl rơndap ù tiah bal càr lơgar Hà Nội tus nam 2045, broă rơndap lơh tus nam 2065.