Pin dờn mờ kơp gơn là nùs nhơm bal bơh uă cau tĕ khà dê tŭ jat sền pơrjum dơ̆ 5, Quôk hội khoă XV mờ broă Quôk hội cribơyai uă tơngume kuơmàng bè: ring bal 8 rơndap lơh Adat boh lam, 3 jơnau rơcang cih Nghị quyết mờ ai jơnau đơs tàm 9 rơndap lơh Adat boh lam. Tàm hơ̆ Adat Ù tiah (tam gơl) pơn jat tai geh Quôk hội ai jơnau đơs dơ̆ 2. Tus tŭ do, tơnơ̆ tŭ ai jơnau đơs làng bol, rơndap lơh Adat do gam geh uă jơnau đơs krơi is bè priă jền ù tiah mờ ai wơl ù. Jơnau đơs bơh cau tĕ khà dê kơp gơn bè do: “Adat Ù tiah gơ rềng tus ai wơl ù mờ giă ù. Broă ai wơl ù tiah mờ ờ cih loh giă ŭ mờ ai wơl ù. Tam pà ù pal lơh loh nền nòn. Dilah cau lơi lơh tìs den pal lơh glài kơn jơ̆, tơnơ̆ hơ̆ den là dùl bơta lơh aniai tus dà lơgar kơn jơ̆ ngan”.

Pơrjum dơ̆ 5 geh lơh tàm tŭ tơngai rài lơh sa dà lơgar he gam ơm tềng đap uă bơta lòng, tŭ khà gơguh lơh sa quý 1 mìng geh 3,32%, ală tiah tờm lơh sa mờ măi mok mờ tac hờ lơgar ndai tờm ngan bơh gùt lơgar dê neh geh bơta gơmù halà gơguh ờ huan uă, ai gŏ broă lơh gơtùi jơnau kờñ gơguh lơh sa gùt nam là kal ke ngan. Cau tĕ khà mờ làng bol kơp gơn ală kwang bàng Quôk hội ngui niam kơnòl broă, bồ tơngoh he dê, bal mờ gơp cribơyai, jơh nùs tă pơgồp jơnau đơs nàng jòi geh broă lơh niam ngan rlau jơh tă bơsong kal ke tus rài lơh sa, nàng kờñ lơh geh jơnau kờñ gơguh lơh sa 6,5% ai gùt nam in. Phó Củ tịc Quôk hội ồng Trần Quang Phương đơs là: “Ờ di tus quý 1 nam do GDP hơ̆ sồng gơmù nisơna bơh 8,2% gam 3,3% mờ lồi quý 3, quý 4 nam lài kung neh geh tềl tơnggŏ gơmù. Bơta do neh geh jơnau đơs, nàng sền sơ wì di jơnau ờ di nisơna gơmù bơh 8,2 gam 3,3. Den tàng, pal mblàng lơh loh bơta ờ niam dùl nă jak chài, nền nòn mờ wil tơl rlau”.

Dùl tơngume kung geh gròi sền ngan tàm dơ̆ pơrjum do, hơ̆ là Quôk hội jat sền uă ngan broă hòi jà, atbồ mờ ngui ală bơta priă jền drơng broă lơh rơcang sơndră kòp Kovid-19. Tàm jơnau rơcang cih jơnau yal bơh Mpồl kwang bàng jat sền dê ai gŏ, jơnau cih pơlam blơi phan bơna, măi mok lơyài geh tam gơl lơh gơbàn nùs nhơm kơlôi rơcang, rơngòt tìs bơh tơnơ̆ ală broă ờ niam gơlik geh. Jat kwang bàng Phạm Khánh Phong Lan, mpồl ƀòn dờng Hồ Chí Minh đơs: Kòp bơtờp bè dùl bơta tơrlòng gơ wèt mờ gah lơh sơnơm mờ làng bol là cau kong uă bơta gơ rềng: “Añ ring bal là bơta ờ niam den bol he pal rơcang sơndră, mơya kung ndrờm bè sơm cau kòp in sơl, den pal geh bơta ring bal đah broă gàr niam să jan, lơh pràn să jan cau in, nàng cau in rơcang kong mờ ală broă sơm kòp kơn jơ̆. Să tờm tàm gah lơh sơnơm bol hi git loh ngan jơnau do. Añ ring bal mờ broă là neh tìs den pal lơh glài, mơya kung pal sền sơ wì jat bơta tŭ tơngai bè lơi, mờ sền sơ wì dùl bă niam chài rlau”.

Pơrjum dơ̆ 5, Quôk hội khoă XV geh lơh tơnơ̆ tŭ Pơrjum nggùl tơngai lơh broă Ƀan Cấp hàñ Đảng dà lơgar pa tơn jơh. Đảng dà lơgar sồr pal pơn jat tai sơlơ tơnguh pràn, lơh niam rlau tai broă lơh bơt bơtàu, lơh niam wơl Đảng mờ ală anih lơh broă cíñ trị sàng goh, kơ̆ kơljap, pràn kơldang, kuơmàng là anih lơh adat boh lam, sền gàr adat boh lam. Mò Nguyễn Thị Báo, ơm tàm quận Cầu Giấy, ƀòn dờng Hà Nội sồr pal lơh niam rlau tai broă sang sơrbì ală nùs nhơm ờ geh bơta tam gơl pa, tàm tuh kơnòl tàm ờ uă kwang bàng: “Bol he dră wơl ală nùs nhơm ờ geh bơta tam gơl pa, bơta ờ lah, rơngòt kơnòl, ờ khin cha, ờ khin kong kơnòl. Ờ uă kwang bàng đơng lam bồ, atbồ, dùl bă đảng viên song dơpă den ờ tŭ lơi kun bồ tềng đap khat dùl bơta kal ke lơi, pal lơh ngan nàng lơh tus gùng tus dà bè lam lơh kơnòl, bulah pal sang tĕ bơta kuơ he dê”.

Geh lơh tàm tŭ tơngai rài lơh sa lơgar he ơm tềng đap uă bơta lòng, cau tĕ khà mờ làng bol kơp gơn ală kwang bàng Quôk hội ngui niam kơnòl broă, bồ tơngoh, bal mờ gơp cribơyai, jơh nùs tă pơgồp jơnau đơs nàng kờñ jòi geh broă lơh niam ngan rlau jơh tă bơsong kal ke ai rài lơh sa in, lam lơh gơtùi ală jơnau kờñ lơh sa- mpồl bơtiàn geh Quôk hội ai tơlik ai nam 2023 in, lơh gơlik bơnàng jă kơ̆ kơljap ai broă lơh gơs ală jơnau kờñ ai tơlik jơh gùt tơngai bơh nam 2021 tus nam 2025 in.