Ală ngai do, tàm ală thôn gơ wèt tiah is ồn Lý Sơn, càr Quảng Ngãi, broă lơh mblàng yal bè tĕ khà cau ala mat Quôk hội mờ Mpồl duh broă Làng bol ală kâp gam geh lam lơh jơh nùs, tơrgùm lơh loh bơta kuơ, gơnoar mờ kơnòl bơh cau tĕ khà dê. Uă ngan làng bol sền gròi mờ git wă loh gơnoar broă bơh cau ala mat Mpồl duh broă Làng bol dê là cau ala mat ai bơta kơp kờñ he dê.

Ồng Nguyễn Văn Huy, Củ tịc tiah ồn Lý Sơn, càr Quảng Ngãi pà git, tiah is ồn Lý Sơn rơcang lài ală bơta pal geh, bơta tờm là mblàng yal nàng kwang bàng, đảng viên mờ làng bol in git wă tơl làm bơta kuơ, jơnau gơtha kuơmàng bơh dơ̆ tĕ khà dê; mờ kung gàr niam lơngap lơngai, rơndap tap sèng mờ ală bơta ƀuơn nàng cau tĕ khà in lam lơh wil tơl gơnoar, kơnòl he dê: “Tŭ do, tiah is ồn Lý Sơn neh bơyai lơh cribơyai dơ̆ 1, ring bal mat kwang bàng, cau lơh broă sa priă nhai dà lơgar mờ ală mpồl lơh broă gơ wèt Mpồl lơh kơnòl broă sùm Đảng ủy tiah is ồn atbồ nàng ai tơlik gùng dà, broă lơh tus bal tơlikmat tĕ khà. Mờ kung mblàng yal làm uă nàng ală cau ala mat in tus bal tong sră nggal tơlik mat tĕ khà. Sền bal tus tŭ do neh di jat broă rơndap lơh mờ Anih duh broă tĕ khà ai tơlik”.

Tàm sàh Nghĩa Hành, càr Quảng Ngãi, broă lơh cribơyai, ai jơnau đơs kwang bàng, cau lơh broă sa priă nhai dà lơgar, cau lơh broă mờ ala mat ală ƀòn gam geh bơyai lơh làng bol lơh tờm, loh làng, di broă rơndap lơh. Broă yal tơnggit cau tơlik mat tĕ khà tàm ală thôn geh rơcang wil tơl bơh cribơyai làng bol lơh tờm bè jơnau pal geh, nùs nhơm mờ pràn jak. Mpồl lơh broă mặt trận ală thôn mờ Anih duh broă tĕ khà sàh Nghĩa Hành bơyai lơh ai jơnau đơs cau tĕ khà tiah ơm kis gơ wèt mờ cau tơlik mat tĕ khà.

Ồng Lê Quang Thu, Củ tịc Anih duh broă Mặt trận dà lơgar Việt Nam sàh Nghĩa Hành, càr Quảng Ngãi pà git, bơta niam cau ala mat geh ơn lài ngan: “Nàng lam lơh loh làng broă yal tơnggit cau ala mat Mpồl duh broă Làng bol, anih duh broă sùm sồr ală mpồl pal lam lơh loh làng tus jơh gùt kwang bàng, cau lơh broă sa priă nhai dà lơgar, cau lơh broă in. Gơ wèt mờ cau tơlik mat tĕ khà tàm thôn, Mpồl lơh broă Mặt trận lam lơh jà cau tĕ khà mờ ală mpồl bal, mpồl cau nàng yal loh làng cau geh yal tơnggit”.

Jơh gùt càr Quảng Ngãi geh 4 mpồl tĕ khà cau ala mat Quôk hội, pồ 11 nă cau ala mat; 21 mpồl tĕ khà cau ala mat Mpồl duh broă Làng bol càr, pồ 66 nă cau ala mat. Tàm kâp sàh, neh ai lơh jat jơnau lơh nền tàm pơrjum bè khà mpồl tĕ khà mờ khà cau ala mat geh pồ mờ kờp jơh 683 mpồl tĕ khà. Broă lơh cribơyai dơ̆ 1 geh lam lơh di jơnau sồr, broă rơndap lơh mờ yal wil tơl tus ală anih lơh broă geh gơnoar.

Mò Y Bích Thọ, Phó Củ tịc Duh broă sùm Anih duh broă Mặt trận dà lơgar Việt Nam càr Quảng Ngãi pà git, Mặt trận ală kâp đơng lam lơh jat wil tơl, nền nòn 3 dar cribơyai jat Adat tĕ khà, gàr làng bol lơh tờm, loh làng, song dơpă bơh broă yal tơnggit kwang bàng tơn: “Tàm tŭ cribơyai, Anih duh broă Mặt trận dà lơgar Việt Nam càr Quảng Ngãi sền dờng màng ngan tus jơnau sồr, jơnau pal geh bơh cau tơlik mat tĕ khà dê; mờ kung gàr rơndap tap sèng dipal bè ùr klau, sơnam, jơi bơtiàn, pin dờn jat yàng, mpồl cau; pơgồp bal nền nòn đah jơnau sồr mờ rơndap tap sèng, ơn bơta niam cau ala mat dê lài ngan. Broă ai jơnau đơs, bơta pin dờn bơh cau tĕ khà tiah ơm kis mờ anih lơh broă dê là gah kuơmàng ngan, ai tơnggŏ tơn nùs nhơm, bơta kơp kờñ làng bol dê”.