Đơs sồr lơh, Chủ tịch Quốc hội đơs sùm, dùl adat niam pal “kơ̆ bơh broă lơh, kơ̆ tàm broă rơndap lơh, ring bal tàm jơh ală adat, git loh lơh jat ngan ngồn”. Do kung là jơnau sồr ai tơlik nàng broă lơh bơt bơtàu adat ngai sơlơ pơgồp bal nền nòn mờ mùl màl rài kis, mờ ală broă geh làng bol mờ mpồl lơh sa kă bro gam sền gròi.

Jat ồng Trần Thanh Mẫn, Chủ tịch Quốc hội đơs, broă bơt bơtàu adat lài ngan pal sơn đờm bơh bơta niam broă lơh, ờ di là khà sèng, bơta. Tơl rơndap lơh adat kờñ pal lơh loh gam bơsong broă lơi mùl màl dê, ñchi bơh tài kờñ pal tam gơl adat, broă lơh pa lơh gơlik bơta kuơ lơi, gơ rềng tus cau lơi, priă tă pal lơh jat bè lơi, priă jền lam lơh ai bơh lơi mờ anih lơh broă lơi kong kơnòl.

Is ồn, ală cau ala mat kờñ pal tơrgùm cribơyai ală broă lơh gam geh jơnau đơs krơi is, ală broă gơ rềng tơn tus làng bol, mpòol lơh sa kă bro; ală gùng dà pa ờ hềt geh bơh lài halà ờ hềt geh sền swì wil tơl. Chủ tịch Quốc hội ồng Trần Thanh Mẫn sồr broă lơh bơt bơtàu adat pal ai tơnggŏ bồ tơngoh kơlôi sơnơng pa, tàm hơ̆ adat tơrgùm tàm ală broă gơ wèt gơnăp gơnoar Quốc hội dê, geh bơta pal jat mờ kơnhăp kơ̆. Nùs nhơm geh đơs sùm là adat digơlan lơyah rlau mơya ờ geh lơ hơ bè broă lơh; jơnau cih dồ êt rlau mơya kơnòl pal loh. Adat pal thàn jat rài kis, mơya ờ di mờ broă sùm tam gơl adat:

“Ală broă gơ rềng tus gơnoar kòn bơnus, gơnoar làng bol, bơta pal geh nàng kă bro, tam pà priă jền, rơndap lơh gơnoar broă mờ kơnòl anih lơh broă dà lơgar dê pal geh cih mùl màl tàm adat. Sơ lơŭ wơl, bañ tơmut tàm adat iă ir jơnau cih bơta chài măi mok, mờng chài lơh broă halà ală tơngume sùm tam gơl. Nùs nhơm adat lơyah rlau mơya ờ gŏ di dồ êt bè broă lơh; jơnau cih dồ êt rlau mơya kơnòl pal loh; kơ̆ kơljap rlau mơya kung pal tơl bơta pràn gơ dờp mờ bơta mùl màl. Adat pal thàn lòt jat rài kis, mơya thàn lòt jat ờ di ndrờm mờ broă là ntoat jat rài kis mờ broă tam gơl adat sùm”.

Gơ wèt mờ cau tĕ khà, bơta niam dùl adat dê ờ mìng ai tơnggŏ tàm ală bơta geh Quốc hội ring bal, mờ kuơmàng rlau là tŭ gơ mut tàm rài kis, adat geh mùl màl gơtùi bơsong broă halà ờ, gơnoar mờ bơta kuơ dopal làng bol dê geh gàr niam rlau halà ờ. Ồng Trần Thanh Mẫn, Chủ tịch Quốc hội sồr pal sền swì nền nòn tơl broă lam lơh adat; gàr dipal mờ broă lơh gơnoar atbồ ƀòn lơgar bàr kâp mờ jơnau sồr pơn jat tai lơh pràn tam pà kâp, jàu gơnoar. Tam pà kâp ờ di là tàm jàu gơnăp gơnoar mờ pal lòt bal mờ priă jền, jơnau yal tơnggit mờ kơnòl:

“Quốc hội lơh adat nàng bơsong broă mùl màl dê, sền gàr gơnoar mờ bơta kuơ dipal làng bol dê, tă bơsong bơta gơ kòl, tă ai priă jền, pờ gùng bơtàu tơnguh. Bơta kờp dut ndơl ờ di là ring bal nđờ adat, mờ là tơnơ̆ tŭ adat ai lơh jat, mpồl lơh broă sră pơ àr geh lơh broă niam halà ờ, làng bol mờ mpồl lơh sa kă bro geh ƀuơn ƀuài rlau halà ờ, priă jền mpồl bơtiàn geh tă ai halà ờ, pràn jak atbồ broă dà lơgar geh tơnguh halà ờ. Dùl adat niam pal “kơ̆ bơh broă lơh, kơ̆ tàm broă rơndap lơh, ring bal tàm jơh ală adat, git loh lơh jat ngan ngồn”.

Chủ tịch Quốc hội kơp kờñ tơl jơnau đơs cau ala mat dê tàm pơrjum ờ mìng gơ ơm tàm jơnau đơs, mờ pal sơn đờm bơh kơlôi sơnơng sră nggal, tàm pơndrờm mùl màl mờ ơn tàm tơrgùm jơh ală adat. Ală rơndap lơh adat ờ hềt gàr tơl bè broă lơh, sền swì bơta gơ rềng mờ ală adat ndai halà ală bơta pal geh nàng lơh jat den kờñ pal pơn jat tai lơh sir. Gơ wèt mờ cau tĕ khà, do là bơta đo was kuơmàng ngan broă lơh bơt bơtàu adat dê. Dùl adat mìng mùl màl geh kuơ tŭ dong mpồl lơh broă sră pơ àr lơh broă geh cồng nha rlau, làng bol mờ mpồl lơh sa kă bro ƀuơn rlau, priă jền mpồl bơtiàn geh tă ai mờ pràn jak atbồ broă dà lơgar geh tơnguh.