Tàm tiah làng bol jơi bơtiàn dồ êt nă cau, ù ơm, ù lơh sa mờ broă lơh kung gam là ală broă geh làng bol, cau tĕ khà sền gròi uă ngan. Cau tĕ khà Puih Kơk ơm tàm ƀòn Ia Grăng 1, sàh Ia Grai, càr Gia Lai kơp kờñ dà lơgar geh broă lơh dong kờl dipal gơ wèt mờ ală hìu bơnhă kal ke: “Kơp kờñ dà lơgar sền gròi tus ù ơm mờ ù lơh sa làng bol dê, ai lài ală cau geh rài kis uă kal ke, ai geh broă lơh tàm hìu, tàm ƀòn nàng bơtàu tơnguh lơh sa ƀòn lơgar”.

Geh bal bơta sền gròi bè lơh broă, lơh sa, cau tĕ khà Rơ Mah Nhiên ơm tàm ƀòn Ia Răng 2, sàh Ia Grai kơp kờñ geh tai broă lơh tàm ƀòn lơgar tơn, tơrmù ƀà bơta cau lơh broă kơnòm să pal lòt lơh broă tiah ngài:“Broă lơh tàm ƀòn lơgar ờ geh, ală bơyô kơnòm să tàm Gia Lai lòt lơh broă tiah ngài uă ngan, broă lơh tàm ƀòn lơgar den ờ geh. Kơp kờñ Đảng, dà lơgar sền gròi rlau tai tus broă do nàng dong làng bol bơtàu tơnguh lơh sa tàm tơnơ̆ do”.

Cau tĕ khà Ndong Brừm, cau K’Ho ơm tàm sàh Đam Rông 3, càr Lâm Đồng kơp kờñ, Quốc hội ai lài priă jền nàng bơtàu tơnguh tiah làng bol jơi bơtiàn dồ êt nă cau, ngan là phan bơna bơt bơtàu mờ ală broă lơh dong kờl broă lơh sa:“Kơp kờñ Quốc hội sền gròi bơcri priă lơh gùng lòt, lơh sơnơm, bơto bơsram mờ dong kờl broă lơh sa làng bol in; tam pà priă jền dipal nàng tơrmù lơyah bơta yah ngài bơtàu tơnguh đah ală tiah, dong làng bol lik klàs rƀah kơ̆ kơljap jŏ jòng sùm”.

Ală jơnau đơs, jơnau dan bơh kâp hơ đơm kung ai tơlik jơnau sồr lơh sir broă lơh bè ù tiah, gàr niam gơnoar kuơ dipal làng bol dê mờ tă bơsong bơta gơ kòl tàm tŭ lam lơh. Cau tĕ khà H’Nhip Bkrông, kòn cau Rơđê ơm tàm ƀòn Cuôr, sàh Ea M’Droh, càr Dăk Lăk kơp kờñ mhar bơsong sră pơ àr lơh sră ngui ù nàng gàr kơ̆ broă lơh sa: “Mè bèp tam pà añ in 4 sàu ù rềp anih duh broă làng bol sàh nàng lơh sa, mơya tus tŭ do kung gam ờ hềt geh lơh is sră ngui ù sơl. Añ kơp kờñ geh bơsong sră nggal nàng ù geh lơh mat he dê, nàng iang nùs lơh sa”.

Tàm tiah kềng gah dà lềng, cau tĕ khà kơp kờñ ală broă lơh nền bè bơcri priă dà lơgar ai lài broă lơh pal geh in, bơsong ală bơta ờ niam jŏ jòng, sền gàr tiah làng bol ơm kis tềng đap trồ tiah lơh aniai. Cau tĕ khà Nguyễn Văn Mẹo ơm tàm tiah drà Từ Nam, sơnah ƀòn Sông Cầu, càr Dăk Lăk dan gờñ bơcri priă lơh bơtơt rơcang kơryan tơrlah: “Pah nam, ñsừc dà lềng gơ mut jrô ngan, lơh làng bol sa ờ bơkah, bic ờ lơhă pah tŭ tus nhai mìu càl rbut dờng. Dan Quốc hội, Dà lơgar sền swì lơh bơtơt kìng dà nàng sền gàr làng bol”.

Gơ wèt mờ ală tiah dà lềng, bồt bơlàu, jơnau sồr bơtàu tơnguh lơh sa gơ jat bal mờ sền gàr dà lơgar, lơngăp lơngai kung geh cau tĕ khà sền gròi uă ngan. Ồng Phạm Thanh Liêm, Chủ tịch Anih duh broă Làng bol tiah is ồn Trường Sa, càr Khánh Hòa sồr, pơn jat tai lơh sir broă lơh bơtàu tơnguh lơh sa dà lềng mờ gùng dà krơi is ai ù tiah bồt in: “Kơp kờñ Quốc hội pơn jat tai lơh sir broă lơh bơtàu tơnguh lơh sa dà lềng, dong kờl cau lơh ka, bơcri priă bơt bơtàu phan bơna dong kờl broă lơh ka. Is ồn, gơ wèt mờ tiah is ồn Trường Sa, kơp kờñ Quốc hội pơn jat tai sền gròi, lơh sir broă lơh krơi is nàng gơ hòi gơ jà priă bơcri bơt bơtàu phan bơna geh 2 bơta kuơ, drơng bơtàu tơnguh lơh sa mpồl bơtiàn pơgồp bal mờ gàr kơ̆ lơngăp lơngai dà lơgar”.

Jat jơnau yal bơh Anih duh broă Mặt trậm Dà lơgar Việt Nam dê, neh geh rlau 2 rbô 800 dơ̆ jơnau đơs, jơnau dan cau tĕ khà, Làng bol gùt lơgar dê pơyua tus dơ̆ pơrjum dơ̆ 2, Quốc hội khoă XVI. Cau tĕ khà mờ Làng bol kung gam ờ suk tềng đap bơta blac pơrlồm lac làu ngan tàm internet, ngan là broă sơmờm bồ tơngoh jak bơh kòn bơnus lơh gơs nàng lơh pơrlồm jơnau yal tơnggit nàng kờñ sơgràm ai jơtài; kơlôi rơcang bè bơta kloh niam ờdo ờdă phan sa, bơta ƀơ̆ ƀơl tiah ơm kis; tơngai hơ pơrgon bơsong sră pơ àr gơnoar atbồ tàm 2, 3 ƀòn lơgar gam lơyài.

Mò Bùi Thị Minh Hoài, Kwang geh jơng Bộ Chính trị, Chủ tịch Anih duh broă Mặt trận Dà lơgar Việt Nam sồr: “Sồr Chính phủ, ală anih lơh broă geh gơnoar, ală ƀòn lơgar sơlơ lùp sền, sền swì, jat sền nàng di tŭ git gŏ mờ lơh glài kràñ ală broă lơh tìs bè phan ờ ngan, sơnơm ờ ngan, phan lơh pràn să jan ờ ngan, lơh tìs bè kloh niam ờdo ờdă phan sa mờ ală broă lơh tìs lơh ƀơ̆ ƀơl tiah ơm kis; sồr Quốc hội, Chính phủ pơn jat tai sồr lơh sir ndrờm bal broă lơh adat boh lam mờ tơrgùm tă bơsong ală kal ke, bơta gơ kòl tàm gah ù tiah, tơm wơl priă, dong kờl rơndap tiah ơm kis pa, bơt bơtàu wơl rài kis pa ai làng bol in tŭ ai wơl ù”.

Ală jơnau dan, jơnau đơs bơh Tây Nguyên tus làm gùt ală tiah dà lơgar dê ai tơnggŏ bơta kơp kờñ dipal cau tĕ khà dê, mờ kung ai tơlik jơnau sồr nàng Quốc hội pơn jat tai iat, jat sền mờ sồr bơsong geh cồng nha ală broă bơh mùl màl, drơng bơta pin dờn mờ kơp kơnờm Làng bol dê.