Ồng Trần Thanh Mẫn - Chủ tịch Quốc hội pà git, tơngai lài, Quốc hội neh tam gơl pa bồ tơngoh kơlôi sơnơng bơt bơtàu adat boh lam, lơh pràn ngui tam gơl sồ mờ bồ tơngoh jak kòn bơnus lơh gơs tàm broă lơh bơt bơtàu adat boh lam. Bulah bè hơ̆, broă lơh mblàng yal adat boh lam kung gam bơta kơn jơ̆ dùl gah, ờ hềt lơh geh bơta tàm pơgồp bal mờ làng bol. Bơh mùl màl hơ̆, Chủ tịch Quốc hội sồr jơnau rơcang cih adat boh lam kờñ pal lơh gơlik bơta tam gơl pràn bè tam gơl sồ tàm mblàng yal, bơto bơtê adat boh lam: “Bol he pal tam gơl sồ pràn tàm broă lơh mblàng yal, bơto bơtê adat boh lam, pleh bơta tam gơl sồ ờ ngac ngar, mờ pal wèt tus bơta tàm pơgồp bal uă gah. Mùl màl tŭ do, tam gơl sồ tàm broă mblàng yal, bơto bơtê adat boh lam uă ngan mìng rơp ơm wơl tàm broă pơnđàng sră nggal jat bơta PDF tàm ală anih yal jơnau tơnggit điện tử, kal ke ngan gơ hòi gơ jà làng bol sền gròi. Jơnau rơcang cih adat boh lam kờñ pal cih gơs adat boh lam, cih loh broă bơt bơtàu ală mpồl lơh broă sồ dà lơgar tàm broă mblàng yal, bơto bơtê adat boh lam. Pal cih gơs adat boh lam kơnòl bơh ală anih lơh broă ai lơh jat dê tàm broă yal jơnau tơnggit pờ (hơ̆ là open data) nàng tơrgùm tàm phan AI, Chatbot lơh is, dong hơ wơl adat boh lam ai làng bol in jơh gùt ngai mang tàm gùt poh tơn”.

Bè gùng dà tàm pơgồp bal, ờ mìng mblàng yal jơnau dùl gah bơh anih lơh broă dà lơgar dê lơm, jơnau rơcang cih kờñ pal bơ tơl jơnau cih bè gùng dà cih dờp jơnau đơs wơl, sền swì bơta wă wờng mờ kờp tus bơta pràn git adat boh lam làng bol dê tàm măi mok sồ nàng di tŭ tam gơl tơngume mblàng yal.

Đơs tus broă kờñ pal đal git loh cau krơi is mờ lơh gơs bơta nă să is tơngume mblàng yal, Chủ tịch Quốc hội pà git, Adat gam lơh jat tŭ do nam 2012 cih, ală mpồl cau krơi is, bè làng bol jơi bơtiàn dùl êt nă cau, cau kuet kơlte, cau gam lơh jat broă lơh glài, mơya broă git adat boh lam kung gam ờ hềt loh làng. Bè hơ̆ den tàng kờñ pal bơ tơl ală jơnau sồr bè khà nàng git nền mpồl cau krơi is jat tơl bă tiah, sơnam, gah lơh sa.

Chủ tịch Quốc hội đơs loh, bơta ờ pràn tàm broă lơh jat adat boh lam là broă lơh mblàng yal, bơto bơtê adat boh lam ai làng bol jơi bơtiàn dùl êt nă cau in. Jơnau tờm ngan là tài ù tiah ngài, phan bơna mblàng yal ờ hềt geh cồng nha mờ bơta gơ kòl bè dà đơs.

Jơnau rơcang cih adat boh lam kờñ pal cih gơs adat boh lam pràn gơnoar broă bơh ală mpồl niam chài tàm kâp hơ đơm dê: hơ̆ là cau kra ƀòn, cau atbồ ƀòn, cau geh bơngă pin dờn, jơi nòi, ală broă lơh tơrlòng lài atbồ is tàm mpồl bơtiàn. Mờ kung tam gơl bơh mblàng yal tơl làm gơ gơs mblàng yal đềt mềr, hơ̆ là làng bol lơh broă lơi, kis tàm tiah lơi den geh ai lài yal mpồl adat boh lam gơ rềng tơn tus gơnoar kuơ khi dê. Bơdìh hơ̆ tai, kờñ pal bơsong bơta ờ niam bè gơnoar broă bơh Mpồl duh broă mblàng yal, bơto bơtê adat boh lam ală kâp dê; tă bơsong kal ke bè priă tă lơh, is ồn là tàm kâp hơ đơm mờ bơta kwang bàng uă ngan là at bal gơnoar broă tơn.

Bơdìh broă tam gơl pa broă lơh mblàng yal, ồng Trần Thanh Mẫn - Chủ tịch Quốc hội kung sồr sơlơ tơnguh tai bơta lơh bal mpồl bơtiàn dê tàm broă lơh mblàng yal, bơto bơtê adat boh lam, geh gùng dà hòi jà mpồl lơh sa kă bro, mpồl bal mờ mpồl cau chài cah rơña, cau geh jơnau git wă jrô bè adat boh lam tus bal dong kờl adat boh lam, mblàng yal adat boh lam làng bol in: “Añ sơnơng là broă tam gơl Adat mblàng yal, bơto bơtê adat boh lam dơ̆ do ờ mìng ơm wơl tàm broă tam gơl jơnau cih halà bơtơl kơnòl broă ai ală anih lơh broă in, mờ pal là dùl dơ̆ tam gơl pa bè broă lơh dờp git; tam gơl bơh bồ tơngoh kơlôi sơnơng atbồ “ai pà” jơnau yal tơnggit gơ gơs bồ tơngoh kơlôi sơnơng drơng broă, dong làng bol tơnguh pràn jak sền gàr is să tờm he mờ adat boh lam. Broă tam gơl adat boh lam dơ̆ do kuơmàng ngan nàng gàr broă lơh mblàng yal, bơto bơtê adat boh lam geh lơh ngan ngồn, gơ tus di cau mờ làng bol. Do là kơnòl broă ờ mìng is gah sền gàr adat boh lam dê mờ gam jơh bal gùt anih lơh broă chính trị dê tai, bơh Đảng, gơnoar atbồ, Mặt trận tus ală mpồl cau”.

Broă tam gơl Adat mblàng yal, bơto bơtê adat boh lam ờ mìng nàng kờñ lơh sir ală adat boh lam, mờ gam ai tơnggŏ bơta lơh ngan Quốc hội dê bơt bơtàu dùl rài adat boh lam rềp làng bol, ƀuơn git mờ drơng làng bol in niam rlau. Ală jơnau đơs tàm dar cribơyai pơn jat tai ai gŏ Quốc hội sùm iat bơta mùl màl, cih dờp bơta kơp kờñ cau tĕ khà dê nàng lơh sir gùng dà, broă lơh, ai adat boh lam ngan ngồn gơ mut tàm rài kis.