Yal tàm pơrjum, ồng Nguyễn Hữu Đông - Kong kơnòl Anih duh broă Broă lơh cau ala mat pà git, tàm tơngai lơh broă lài, Mpồl duh broă Làng bol kâp càr gùt lơgar neh lam lơh 1 rbô 950 dơ̆ pơrjum. Tàm hơ̆, geh 1 rbô 281 dơ̆ pơrjum mìng dùl tơngume nàng di tŭ bơsong ală broă gơlik geh bè kòp bơtòp, kes priă, bơcri priă dà lơgar mờ pồ tơl mpồl lơh broă sră pơ àr gơnoar atbồ tơnơ̆ rơndap tap sèng mpồl lơh broă sră pơ àr gơnoar atbồ. Mpồl duh broă Làng bol ală ƀòn lơgar neh ai lơh jat rlau 30 rbô 800 jơnau lơh nền tàm pơrjum, lơh gơlik bơnàng jă adat boh lam kuơmàng ai bơtàu tơnguh lơh sa - mpồl bơtiàn, gàr niam lơngap lơngai mờ dong kờl làng bol tàm ƀòn lơgar. Gùt lơgar neh lam lơh rlau 4 rbô mpồl jat sền, cih dờp rlau 36 rbô jơnau đơs, jơnau dan bơh cau tĕ khà dê mờ khà bơsong geh rlau 86%. Broă lơh lùp mờ hơ jơnau lùp ngai sơlơ ngan ngồn, tơrgùm lơh loh kơnòl bơh ală anih lơh broă mờ cau nă să is geh gơ rềng dê. Ồng Nguyễn Hữu Đông đơs nền: “Broă lơh bơh Mpồl duh broă Làng bol ală kâp dê ngai sơlơ làng bol lơh tờm, ngan ngồn, geh bơta niam mờ geh cồng nha, geh uă bơta tam gơl pa tàm jơh bal bồ tơngoh kơlôi sơnơng mờ ngan ngồn broă lơh. Bơh hơ̆, pơn jat tai đơs nền gơnoar broă bơh anih lơh broă gơnăp gơnoar dà lơgar tàm kâp hơ đơm dê tàm anih lơh broă chính trị”.

Đơs sùm gơnoar broă gròi sền gơnăp gơnoar bơh Mpồl duh broă Làng bol dê, ồng Đồng Văn Thanh - Phó Bí thư Duh broă sùm Thành ủy, Chủ tịch Mpồl duh broă Làng bol ƀòn dờng Cần Thơ đơs là, dilah gơnap gơnoar sră pơ àr gơnoar atbồ ờ geh gròi sền nền nòn den rơp ƀuơn ngan lơh gơbàn bơta sơmờm gơnoar, pleh kơnòl halà gơmù cồng nha lơh kơnòl broă dà lơgar. Bè hơ̆ den tàng, Mpồl duh broă Làng bol ƀòn dờng neh lam lơh uă broă lơh ndrờm bal bơh broă ai lơh jat jơnau lơh nền tàm pơrjum, jat sền, tam pà kâp, jàu gơnoar mờ tìp mat cau tĕ khà: “Mùl màl lơh broă ai gŏ, bàr pe Jơnum cau ala mat bal mờ cau ala mat lòt sền ngan ngồn bàr pe jơnau đơs, jơnau dan bơh cau tĕ khà dê tơnơ̆ dơ̆ tìp mat mờ yal tus anih lơh broă geh gơnoar den broă bơsong rơp sơrbac mhar, bơsong jơh tơn, cau tĕ khà kung ai tơnggŏ bơta niam nùs  mờ bơta sền gròi bơh gơnoar atbồ ală kâp dê. Den tàng, ală jơnau đơs dipal bơh làng bol dê kung là dùl bơta nàng gròi sền gơnăp gơnoar kuơmàng ngan, kờñ pal geh jat sền, sồr bơsong di tŭ, pơgồp bơnah tơnguh cồng nha atbồ dà lơgar mờ gàr kơ̆ bơta pin dờn bơh làng bol dê gơ wèt mờ gơnoar atbồ kâp hơ đơm”.

Tàm pơrjum, mò Phạm Thị Thanh Trà - Phó Thủ tướng Chính phủ yal 5 mpồl broă lơh tờm nàng kờñ tơnguh cồng nha lơh broă bơh Mpồl duh broă Làng bol tơngai lơh broă bơh nam 2026 tus nam 2031 dê. Tàm hơ̆, đơs sùm tam gơl bồ tơngoh kơlôi sơnơng đơng lam broă jat gùng dà ai làng bol mờ mpồl lơh sa kă bro lơh tờm; lơh pràn tam pà kâp, jàu gơnoar pơgồp bal mờ gròi sền gơnăp gơnoar; sồr lam lơh tam gơl sồ, đơng lam broă mờ jơnau yal tơnggit mờ AI; tam gơl wơl sră pơ àr gơnoar atbồ; tơnguh pràn jak jat sền kuơmàng mờ tơngkah gờñ ală bơta aniai bơtàu tơnguh: “Broă lơh jat sền bơh Mpồl duh broă Làng bol dê pal tam gơl pràn bơh jat sền broă gơ gơs jat sền kuơmàng bơtàu tơnguh; tam gơl bơh jat sền broă rơndap lơh gơ gơs jat sền cồng nha dut ndơl, sền swì uă tàm ală broă pơhìn gơlik geh bơta aniai bè bơcri priă dà lơgar, ù tiah, rơndap ù tiah, tam gơl kơnòl broă dà lơgar. Bơta kuơmàng là tơnguh pràn jak tơngkah lài gờñ, git gŏ gờñ, bơsong gờñ ală jơnau pơhìn gơlik geh aniai bơh kâp hơ đơm tơn”.

Đơs pơn dut pơrjum, ồng Trần Thanh Mẫn - Chủ tịch Quốc hội đơs sùm, tàm tŭ tơngai pa, Mpồl duh broă Làng bol ală kâp kờñ pal pơn jat tai tam gơl pràn rlau tai nàng lơh jat jơnau sồr bơtàu tơnguh bơh dà lơgar dê. Broă lơh bơh Mpồl duh broă Làng bol dê pal lơh jat jơnau lơh nền bơh Đảng dê, lơh niam bơta làng bol lơh tờm, sơlơ rơcang lài kơryan sa kuề sa kuà, pơhì pơhà, broă ờ niam mờ ai bơta niam nùs bơh làng bol, mpồl lơh sa kă bro dê lơh bơta đo was: “Mpồl duh broă Làng bol ală kâp sơlơ tơnguh bơta đơng lam bơh Đảng dê gơ wèt mờ mpồl lơh broă mờ broă lơh bơh Mpồl duh broă Làng bol dê, do là bơta kuơmàng cèng bơta lơh nền. Broă lơh bơh Mpồl duh broă Làng bol dê mìng ngan ngồn geh cồng nha tŭ lơh jat ală jơnau lơh nền, jơnau lơh nền tàm pơrjum bơh Đảng dê, lơh bơta pơnđơl pràn chính trị bơh Đảng dê gơ gơs gùng dà, broă lơh bơh gơnoar atbồ kâp hơ đơm dê. Pơn jat tai bơsram uă mờ lam lơh jat geh cồng nha jơnau lơh nền bơh Đảng dê bè bơt bơtàu dà lơgar gơnoar adat boh lam Xã hội chủ nghĩa, tam gơl pa rơndap broă gơnoar atbồ ƀòn lơgar mờ lơh niam làng bol lơh tờm Xã hội chủ nghĩa. Rơcang lài kơryan sa kuề sa kuà, pơhì pơhà, broă ờ niam. Bơta niam nùs bơh làng bol, mpồl lơh sa kă bro dê là bơta đo was gơ wèt mờ broă lơh bơh Mpồl duh broă Làng bol dê”.