Tềng đap bơta ală dơ̆ khih phan sa gơlik geh tàm uă tiah mờ uă bơta, Kwang ala mat Nguyễn Minh Tâm, mpồl kwang bàng càr Quảng Bình sồr Cíñ phủ, Quôk hội pơn jat tai lơh sir ală broă lơh, adat boh lam nàng kờñ lơh gơlik jơnau pal jat adat boh lam bè atbồ dà lơgar bè kloh niam phan sa, ngan là phan sa tac kềng gah gùng. Tàm broă lơh rơcang lài kơryan ồs sa, bơrtoh, Kwang ala mat Nguyễn Minh Tâm đơs: gam bơta “kâp hơđang kràñ, kâp hơđơm den ờ lơh jat” tàm broă lơh jat ală broă lơh sền gròi bơta do: “Pơrjum dơ̆ 5, Ƀộ trưởng Ƀộ Xây zựng đơs nền rơp bal mờ Ƀộ Kwang àng nàng kờñ gàr niam ngan rlau jơh lơngăp lơngai, rơcang lài kơryan ồs sa, bơrtoh. Pơrjum dơ̆ 6 uă kwang bàng đơs bơta kơlôi rơcang tàm broă lơh rơcang sơndră mờ crùh ồs sa, ngan là tàm ală tiah drà dờng, mơya ală dơ̆ ồs sa nđàc sơnggit ngan tàm tơngai pa do ai gŏ, ndrờm bè bol he pơn jat tai ờ git lơh bè lơi tềng đap bơta do. Kơp kờñ ngan ală mpồl, gah broă lơh tàm kâp hơ đơm lơh broă kràñ cê, di tŭ, bơsong bơta kâp hơđang sồr lơh kràñ ai kâp hơ đơm ờ lơh jat, nàng ală jơnau sồr lơh bơh Cíñ phủ dê geh di tŭ lơh jat, nàng kờñ rơcang lài kơryan ală bơta jê sồt, roh rui bơh rềs àr ồs sa, bơrtoh lơh gơbàn tàm tơngai tus”.

Tàm gah bơto bơsram, kwang ala mat ồng Trần Đình Gia, mpồl kwang bàng càr Hà Tĩnh đơs là, tơnơ̆ tŭ tơngai lam lơh tơngume jơnau bơto bơsram, sră măi bơto bơtê pe kâp, uă phan bơna drơng broă bơto bơsram ờ hềt geh rơcang wil tơl, dipal, bơto bơtê, bơto pơlam cau pơgru ală môn tơrgùm bal gam uă kal ke. Bè sền gròi bơta bơto bơtê bơdìh tŭ jơ tàm ơdŭ, ồng Trần Đình Gia geh jơnau đơs: “Bơto bơtê mờ bơsram bơdìh tŭ jơ tàm ơdŭ là jơnau kờñ bơh mpồl bơtiàn dê, dilah geh atbồ, sền gròi, pơlam lơh jat geh cồng nha ală sră nggal pơlam atbồ, lam lơh bơto bơsram bơdìh tŭ jơ tàm ơdŭ ờ huan niam, lơh gơbàn bơta sơmờm, lơh gơ rềng tus gah do. Bơta do, gah bơto bơsram pal geh jơnau pơlam”.

Tàm pơndang tàm dơ̆ pơrjum bè jơnau đơs pal bơcri priă ai hìu sơnơm kâp hơ đơm in, kwang ala mat ồng Nguyễn Lân Hiếu, mpồl kwang bàng càr Bình Định đơs nền: dilah lơh jat broă lơh yau rah rài, ờ geh cồng nha mờ geh broă lơh bè do: “Añ dan sồr là tàm tơngai tŭ do, pal tơnguh cau lơh broă ai hìu sơnơm kơnhoàl in tài do là tiah mờ hìu sơnơm gơbàn ờ niam jơh bal bè kòn bơnus bal mờ phan bơna. Cau kòp geh priă den lòt hìu sơnơm kâp hơđang, ală cau ơm wơl là cau rƀah, cau kòp jroă, bơta kơn jơ̆ bè priă jền pal àñ is”.

Đơs nền jơnau gơtha niam ngan bơh broă lơh bơt bơtàu ƀòn lơgar pa dê lơh rài kis lơh sa, mpồl bơtiàn geh tơnguh, mơya kwang ala mat ồng Nguyễn Văn Huy, mpồl kwang bàng càr Thái Bình kơlôi rơcang bè bơta sền ờ sơp niam chài. Uă ù tiah, anih gơ wèt phan lời wơl niam chài, tiah tềl kah yau niam chài, anih pơrjum mpồl bơtiàn rơhời ờ gam, ală bơta kơlôi sơnơng ờ niam neh mờ gam gơ rềng tus mờng kwèng rài kis bơh làng bol tàm tiah ƀòn lơgar dê: “Nàng pơgồp bơnah pơn jat tai lam lơh bơt bơtàu ƀòn lơgar pa, lơh gơs ală broă lơh niam chài tàm bơt bơtàu ƀòn lơgar pa đơs is, añ sồr Cíñ phủ tơrgùm kơlôi sơnơng, tă pơgồp jơnau đơs nàng lơh ală adat boh lam bè niam chài, ală kal ke bè priă jền bơcri neh lơh gơ rềng tus bơtàu tơnguh niam chài, dan Cíñ phủ sền gròi kờp sền, pơlam nàng geh jơnau cih mùl màl rlau, tơl khà loh rlau bè ƀòn lơgar pa, ngan là ală broă gơ rềng tus niam chài”.

Kung tàm poh lài, Quôk hội tơrgùm cribơyai bè broă lơh sa, mpồl bơtiàn mờ kes priă dà lơgar nam 2023 mờ ală nhai bồ nam do. Ală kwang bàng đơs, lơh sa lơgar he dê gàr sùm khà gơguh niam, broă lơh sa dờng kơ̆ kơljap tàm tŭ dunia geh uă bơta ờ niam. Đơs nền bơta niam pal cih dờp ngan là tiah lơh sa suơn sre pơn jat tai ai gŏ gơnoar broă dong kờl rài lơh sa dê, ală kwang bàng kung sồr pal sền gròi bơta gơ pờ  bơh rài lơh sa dê, sền gròi tus drà kă bro tàm lơgar 100 tơlak nă làng bol, mờ kung sơlơ tơnguh tai tam pà kâp, tàm pà gơnoar ai ală tiah in nàng lơh geh bơta rơcang lài, ngac ngar, bơceh lơh.