Ngai 19/7, Mpồl kwang bàng jat sền bơh Quôk hội dê bơh Thượng tướng ồng Trần Lưu Quang, Phó Củ tịc Quôk hội lơh kwang atbồ mpồl neh geh dơ̆ lơh broă mờ kwang đơng lam bồ càr Dăk Lăk bè cồng nha lam lơh jat ală Nghị quyết bơh Quôk hội dê, geh: broă lơh jơnau kờñ dà lơgar bơt bơtàu ƀòn lơgar pa; broă lơh tơrmù rƀah kơ̆ kơljap tơngai bơh nam 2021 tus nam 2025 mờ broă lơh bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm tơngai bơh nam 2021 tus nam 2030.

Yal mờ mpồl kwang bàng lơh broă, tơnơ̆ mờr 3 nam lam lơh 3 broă lơh jơnau kờñ dà lơgar, muh mat ƀòn lơgar tàm càr Dăk Lăk neh geh bơta tam gơl niam. Rài kis làng bol tàm tiah jơi bơtiàn dùl êt nă cau rơhời geh tam gơl niam, bơta niam chài- mpồl bơtiàn geh uă tam gơl niam, khà hìu bơnhă rƀah ngai sơlơ gơmù. Ală anih lơh broă cíñ trị geh gàr kơ̆ kơljap mờ pồ tơl. Bơta lơngăp lơngai cíñt trị, rơndap tap sèng lơngăp lơngai mpồl bơtiàn geh gàr kơ̆.

Bulah bè hơ̆, bơdìh mờ ală čồng nha lơh geh, tàm tŭ lam lơh 3 broă lơh jơnau kờñ dà lơgar tàm càr Dăk Lăk kung gơtìp uă kal ke, ờ niam. 2, 3 broă geh jàu jat broă rơndap lơh ờ gơtùi lơh geh jat jơnau ai tơlik. Bơta niam tơrmù rƀah ờ hềt ngan ngồn kơ̆ kơljap, pơhìn gơbàn rƀah mờ rƀah wơl là uă ngan.

Đơs 2, 3 jơnau bơh tài lơh gơbàn kal ke tàm broă lam lơh 3 broă lơh jơnau kờñ dà lơgar, ală kwang bàng đơs là: Cau lơh broă mờ pràn jak bơh mpồl kwang bàng dê nàng lam lơh ală broă lơh tàm kâp hơ đơm gam ờ hềt tơl mờ ờ hềt pràn. Priă tă lơh broă lơh rơndap ai jơla lơh gơ rềng tus tơngai lam lơh, cồng nha lơh geh ờ uă. Bal mờ hơ̆, 2, 3 rơndap broă lơh, tơngume dềt bơh 3 broă lơh jơnau kờñ dà lơgar dê ờ hềt gơtùi lam lơh mờ ai priă là tài ờ hềt geh sră nggal pơlam lơh jat ndrờm bal, wil tơl bơh dà lơgar mờ ală ƀộ, gah broă lơh dà lơgar. Ồng Đinh Xuân Hà, Kwang atbồ Sở Kế hoạc mờ Đầu tư càr Dăk Lăk pà git: “Neh geh 2, 3 sră nggal geh tam gơl, bơ tơl, bulah bè hơ̆ kung gam bơta gơ tàm rơndap rơndồ. Kuơmàng, sră nggal do tề lam, lơh cơng tàng nàng tàm pơn dờm mờ sră nggal ndai, sền sră nggal ndai den jat 1 sră nggal ndai tai. Tơl dùl gơl geh tơngume krơi tàm tŭ lơh jat den tơl tiah geh dùl bơta git wă krơi is”.

Ƀí thư Tỉñ ủy càr Dăk Lăk ồng Nguyễn Đình Trung kung đơs ală kal ke, ờ niam, bè: broă jàu ù ai làng bol jơi bơtiàn dùl êt nă cau in gam uă kòl yan, pal geh broă lơh dipal mờ bơta geh ngan, bơta kwang bàng lơh broă sùm tàm kâp hơ đơm kung kờñ pal geh uă broă lơh dipal mờ bơta krơi is tiah Tây Nguyên dê; tơngume, cau geh dờp kuơ tàm ală broă lơh tơngai bơh nam 2021 tus nam 2025 geh uă bơta pa den tàng broă lơh kờp sền, git nền tơl khà kờp điểm tam pà, git mat rơndap broă lơh bơcri priă gam uă kwi kuơ...

Đơs tàm dơ̆ lơh broă, Thượng tướng Trần Quang Phương, Phó Củ tịc Quôk hội cih dờp mờ đơs niam cồng nha lam lơh ală broă lơh jơnau kờñ dà lơgar mờ Dăk Lăk neh lơh gơtùi. Bal mờ hơ̆, mờ nùs nhơm jat sền là bơta bơtàu nàng bal mờ gơp tă bơsong kal ke, bơh dơ̆ lơh broă tàm càr, Phó Củ tịc Quôk hội sồr: “Ală kwang bàng đơng lam bồ càr pal geh jơnau pơlam cih dờp, geh jơnau yal bơ tơl wil tơl ală jơnau đơs bơh mpồl lơh broă mờ kwang bàng geh jơng dê, cih ală tơngume gam kòl yan nàng pơn jat tai geh jơnau dan. Dơ̆ 2 là pơn jat tai sền gròi, đơng lam uă rlau tai, sơlơ tơnguh broă lơh bơh mpồl đơng lam dê mờ pơgồp bal jơh nùs, di tŭ đah ală anih lơh broă, mpồl lơh broă, hòi jà bơta pràn tơrgùm bal nàng rơhời tam gơl mờng kwèng lơh sa nàng bơtàu tơnguh lơh sa mpồl bơtiàn”.

Tơngai lài, Quôk hội neh lam lơh Broă rơndap lơh sền sơ wì, jat sền bơta geh ngan lam lơh ală broă lơh jơnau kờñ dà lơgar nam 2023 tàm 3 tiah. Mùl màl là: Sền sơ wì, lòt sền bơta geh ngan mờ lơh broă tơn pơgồp bal mờ pờ tơlik tàm internet mờ 14 càr tiah dòr mờ tiah kơh bơnơm đah tô dà lơgar tàm càr Yên Bái; Sền sơ wì, lòt sền bơta geh ngan mờ lơh broă tơn pơgồp bal mờ pờ tơlik tàm internet mờ 19 càr tiah đah tô tàm gùl lơgar mờ Tiah kềng gah dà lềng tàm gùl lơgar mờ tiah Tây Nguyên tàm càr Bình Định; Sền sơ wì, lòt sền bơta geh ngan mờ lơh broă tơn pơgồp bal mờ pờ tơlik tàm internet mờ 13 càr tiah ring dà dờng Cửu Long tàm càr Bạc Liêu.

Phó Thủ tướng kung jàu Ƀộ Kế hoạc mờ Đầu tư đơng lam, pơgồp bal mờ ală Ƀộ, anih lơh broă: Phòng Nông nghiệp mờ Phát triển Nông thôn, Lao động- Thương ƀiñ mờ Xã hội, Ủy ƀan Jơi bơtiàn mờ ală Ƀộ, anih lơh broă, càr, ƀòn dờng geh gơ rềng rơcang jơnau yal, sră nggal drơng ală dơ̆ lơh broă mờ ală càr, ƀòn dờng in, tàm hơ̆ tơngkah sền sơ wì ală jơnau bơsram mờng chài, yal ală broă lơh niam, jơnau bơceh lơh tàm broă lơh bơt bơtàu, lơh sir kơrnuat, broă lơh mờ lam lơh jat, ai priă bơcri lam lơh ală broă lơh jơnau kờñ dà lơgar tàm ală tiah; kờp sền nền nòn, git gŏ ală kal ke, kòl yan nàng geh jơnau sồr, jơnau dan ală broă lơh ngan ngồn nàng tă bơsong, sơlơ tơnguh mhar tơngai lam lơh jat. Cơldŭ lơh broă Cíñ phủ pơgồp bal mờ ală Ƀộ, anih lơh broă geh gơ rềng rơcang lài tơngume, broă lơh mờ bơta pal geh ndai nàng lam lơh jat broă rơndap lơh.