Poh lài, Mpồl kwang bàng jat sền bơh Ủy ƀan Thường vụ Quôk hội dê neh lơh broă mờ Ủy ƀan Ñân zân càr Bình Định bè broă lam lơh jat Nghị quyết bơh Quôk hội dê bè tam gơl broă lơh sră măi bơto bơtê 3 kâp. Jat jơnau yal, càr Bình Định neh lơh gơs broă lơh bơto pơlam jat Broă lơh bơto bơtê 3 kâp nam 2018 ai rlau 12 rbô 700 nă cau pơgru mờ kwang bàng atbồ hìu bơsram 3 kâp. Sở Giáo zụk mờ Đào tạo càr Bình Định lam lơh lip, tac sră nggal bơto bơtê kâp hơ đơm ơdŭ 1, ơdŭ 2, ơdŭ 3, ơdŭ 6, ơdŭ 7 mờ ơdŭ 10 gàr bơta niam mờ tơl khà ai ală hìu bơsram tàm càr in jat jơnau sồr.

Tàm dơ̆ lơh broă mờ Mpồl kwang bàng jat sền bơh Ủy ƀan Thường vụ Quôk hội dê, Ủy ƀan Ñân zân càr Bình Định dan Dà lơgar pà sră ờ sa priă ai kơnòm bơsram tiah jơi bơtiàn kòn cau dùl êt nă cau, tiah kơh bơnơm ngài; dan Ƀộ Giáo zụk mờ Đào tạo gờñ yal rơndap broă pơrlòng jơh bơsram kâp 3 bơh nam bơsram 2024- 2025 nàng ală tiah in git tàm broă rơcang lài.

Phó Củ tịc Thường trựk Quôk hội ồng Trần Thanh Mẫn sồr càr Bình Định pơn jat tai ngui niam ală cồng nha neh lơh gơtùi, bơsong ală bơta ờ niam bơh gah Bơto bơsram dê mờ Mpồl kwang bàng jat sền neh đơs tus; tơrgùm hòi jà tơl bơta priă jền tă pơgồp nàng bơtàu tơnguh broă lơh bơto bơsram, sơlơ tơnguh tam gơl sồ tàm broă bơto bơsram: “Tơnguh bơta niam tơl khà mpồl cau pơgru mờ kwang bàng atbồ ală kâp. Sơlơ tơnguh tam gơl sồ ngui măi mok yal tơnggit jơnau, pơgồp bal ngui geh cồng nha ală tơngume rơndap broă, broă lơh jơnau kờñ dà lơgar, ală bơnah priă hòi jà tă pơgồp dipal bơh mpồl bơtiàn nàng geh tai priă jền bơcri ai tiah làng bol kòn cau, tiah kal ke in”.

Mpồl kwang bàng jat sền bơh Ủy ƀan Thường vụQuôk hội dê đơs là, broă ai tơlik sră nggal sồr lơh, pơlam lơh jat broă lơh bơto bơtê 3 kâp nam 2018 bơh càr Bình Định dê geh lam lơh nền nòn, lơh gơlik bơnàng jă cíñ trị- adat boh lam ƀuơn ƀuài ai ală sở, gah broă lơh, ală tiah in lơh jat.

Kung tàm tơngai lài sơl, Phó Củ tịc Thường trựk Quôk hội ồng Trần Thanh Mẫn bal mờ Mpồl kwang bàng jat sền bơh Ủy ƀan Thường vụ Quôk hội dê neh lơh broă mờ Ủy ƀan Ñân zân càr Hưng Yên bè broă lam lơh jat Nghị quyết bơh Quôk hội dê bè tam gơl pa broă lơh sră măi bơto bơtê 3 kâp.

Ƀí thư Tỉñ ủy Hưng Yên ồng Nguyễn Hữu Nghĩa pà git, càr neh ai lài bơcri priă blơi phan bơna ai gah bơto bơsram in, tàm hơ̆ broă tờm là lơh hìu bơsram, ơdŭ bơsram, mờ bơta lơh ngan lơh jat jơnau kờñ bơsram sră bơh jơh ală kơnòm bơsram dê: “Bơh bồ tơngai lơh broă bol hi neh ai tơlik Nghị quyết sồ 12 bè “Bơtàu tơnguh bơto bơtê mờ bơsram càr Hưng Yên tus nam 2025 mờ gùng dà ai tơlik lài tus nam 2030”. Nghị quyết ai tơlik jơnau kờñ bal, ală broă geh jàu bè bơtàu tơnguh mùl màl ngan, ờ mìng bơsong ală broă bè phan bơna mờ gam pơgồp bal mờ broă lam lơh broă lơh, sră măi pa tàm tơngai tus do, tơrgùm tàm 5 tơngume tờm: dùl là kòn bơnus, tàm hơ̆ tờm ngan là cau pơgru mờ mpồl kwang bàng atbồ bơh Gah bơto bơsram dê; dơ̆ 2 là phan bơna, măi mok; dơ̆ 3 là gơ rềng tus broă ai priă bơcri; dơ̆ 4 là sơlơ tơnguh bơta tă pơgồp bơh mpồl bơtiàn dê mờ dơ̆ 5 là gơ rềng tus kơnòl lam lơh jat broă do”.

Đơs pơn dut dơ̆ lơh broă, Phó Củ tịc Thường tựk Quôk hội ồng Trần Thanh Mẫn sồr, tàm tơngai tus, càr Hưng Yên pơn jat tai kờp sền, sền sơ wì rơndap ù tiah lơh hìu bơsram, nàng sền sơ wì, tam gơl, lơh jat niam rlau jơnau kờñ cau bơsram mờ tơnguh cồng nha bơto bơsram tơl làm: “Hòi jà ală bơnah priă jền bơcri gah bơto bơsram in, pal sơlơ tơnguh rlau tai bơta tă pơgồp bơh mpồl bơtiàn dê ai gah bơto bơsram in. Tŭ do geh uă hìu bơsram cau dùl nă să is, uă cau pơgru bơto tàm hìu bơsram ờ di dà lơgar den he pal chờ hờp ngan, mơya geh pal atbồ. Sơlơ tơnguh bơta tam pà kâp, tam pà gơnoar, sơlơ tơnguh bơta lơh tờm is mờ kong kơnòl is tàm ală hìu bơsram, hơ̆ sồng sơlơ tơnguh rlau tai broă lùp sền, sền sơ wì, lơh glài broă lơh tìs tàm gah bơto bơtê mờ bơsram”.