Ngai 13/01, sền jơnau yal mìng dồ tơnggume tàm Pơrjum gùt lơgar bè tam gơl pràn bơtàu tơngguh jak chài, măy mŏk, tam gơl pa bơceh lơh mờ tam gơl sồ dà lơgar dê, ồng Trần Thanh Mẫn, Kwang bàng tàm Ƀộ Cíñ trị, Củ tịc Quôk hội đơs nền pơn jăt tai pơgồp bal lam kờp sền nền wơl, sền wơl mờ tơn jơh, đơs wơl broă lam lơh jăt broă lơh, adăt boh lam; ring bal gĭt wă bè kơnòl broă “ai adăt boh lam gơgơs bơta pràn tàm pơrlòng”.

Jăt tàm bơta hơ̆, Quôk hội rơ̆p tơrgùm tàm ală kơnòl broă, broă lơh tờm bè tơngguh uă gĭt wă, tam gơl pràn bè tam gơl pa bồ tơnggoh kơlôi sơnơng bè anih, gơnoar broă bơh jak chài, măy mŏk, tam gơl pa bơceh lơh, tam gơl sồ dê. Ngai 10/01/2025, Đảng mpồl Quôk hội neh ai lơh jăt broă rơndăp lơh lơh broă sồ 3260 nàng lơh jăt Jơnau lơh nền tàm pơrjum, tàm hơ̆ gĭt nền loh jơnau kờñ, broă jàu, jàu kơnòl loh làng, tŭ tơngai loh làng mờ lam lơh bal mờ nùs nhơm sơrbac mhar, jơh nùs lơh ngan uă ngan rlau jơh; cih loh kơnòl cau lam bồ, kwang bàng, kông cưk, viên cưk, cau lơh broă dê; sền swì cồng nha lơh broă tam gơl sồ, ngui cồng nha lơh geh jak chài, măy mok dê tàm lơh jăt gơnoar broă, kơnòl broă; đòm jăt nùs nhơm tam gơl pa, bơceh lơh, lơh lài, khin kơlôi, khin lơh, khin kong kơnòl.

“Is ồn, tàm Pơrjum tơn jơh bơh Cíñ phủ dê nam 2024 pa do, ồng Tổng Ƀí thư Tô Lâm pơn jăt tai đơs sùm: ală kơrnoăt boh lam kờñ pal geh lơh sir, nàng tơl tơnggume mìng geh cih tàm dồ nơm adăt lơm. Ătbồ jăt cồng nha, kờñ pal sang tĕ jơnau dan den pà mờ dong kờl jơh lơm; tam gơl pa tam pà kes priă dà lơgar jăt tàm cồng nha bơta lơh geh, tam gơl bơh sền swì bơh chờm tus sền swì tơnơ̆. Broă ătbồ jak chài pal lơh gơlik geh bơta gơn kơnờm tam gơl pa, bơceh lơh bè nùs nhơm “jàu 10” tàm broă lơh sa sươn sre”.

Jăt tàm bơta Cíñ phủ yal mờ lơh jăt Broă lơh lơh adăt boh lam, kơrnoăt boh lam sồr, Quôk hội rơ̆p ai jơnau đơs, sền swì ring bal ală rơndăp broă lơh Adăt tàm 06 broă tờm kwơmàng; Bè jak chài, măy mŏk, tam gơl pa bơceh lơh, măy mŏk sồ: lơh sir 8 Adăt. Bè bơcri priă mờ priă jền: kờp sền nền wơl, lơh sir 12 Adăt. Bè rơndăp mpồl lơh broă, kwang bàng, kông cưk, bơto, bơsram, bơtàu tơnguh mpồl cau lơh broă: kờp sền nền wơl, tam gơl, lơh sir 11 Adăt. Bè mpồl lơh sa kă bro, kă bro phan: kờp sền nền wơl, lơh sir 3 Adăt. Bè sền gàr niam lơngăp lơngai, niam lơngăp lơngai tàm anih internet, anih sồ, kờp sền nền wơl lơh sir 3 Adăt. Bè tam gơl sồ, ngui jak chài, măy mŏk, tam gơl pa bơceh lơh: lơh sir tơnggume gơrềng tus adăt boh lam nàng lơh pràn bơ̆t bơtàu, lam lơh broă Quôk hội sồ, Cíñ phủ sồ, Gơnoar ătbồ sồ. Bơdìh hơ̆ tai, pơn jăt tai kờp sền nền wơl, lơh pa ală sră nggal kơrnoăt boh lam ndai geh gơrềng.

Jăt tàm nùs nhơm hơ̆, jăt ồng Trần Thanh Mẫn, Củ tịc Quôk hội: “Tềng đăp măt là mhar pơgồp bal rơcăng, jơh nùs lam lơh Broă lơh lơh adăt boh lam, kơrnoăt boh lam sồr nam 2025. Sồr mpồl duh broă đảng Cíñ phủ, Cíñ phủ, ală ƀộ, gah: sền gròi broă bơyai lơh sền swì, tơn jơh lơh jăt, kờp sền nền wơl, sồr tam gơl, bơtơl, lơh pa kơrnoăt boh lam tàm broă jak chài, măy mŏk, tam gơl pa bơceh lơh, tam gơl sồr pal lơh jơnau sồr bơta niam, tŭ tơngai jăt jơnau sồr”.

Gơ wèt mờ Mpồl duh broă Làng bol ală kâp, Củ tịc Quôk hội sồr, jăt tàm bơta geh ngan, pơgồp bal ai lơh jăt gùng dà, broă lơh jăt gơnăp gơnoar nàng pơn jờng, chồl tơngguh bơtàu tơngguh kơlôi sơnơng jak chài, măy mŏk, tam gơl pa bơceh lơh, tam gơl sồ, tơngguh uă cồng nha lơh geh, lơh gơtùi mờ geh cồng nha lơh broă bơh ală anih lơh broă dà lơgar, mpồl lơh sa kă bro, mpồl cau, cau dồ nă să is dê tàm ù tiah ƀòn lơgar.

Củ tịc Quôk hội ồng Trần Thanh Mẫn đơs là, mùl màl bơh dà lơgar dê gam gơ tơlik ală broă jal mhar pal bơsong, Làng bol gam ơm kơ̆p mờ kơ̆p gơn tàm ală gùng dà broă lơh nền bơh Đảng, Dà lơgar dê. Tàm nùs nhơm hơ̆, Quôk hội rơ̆p pơn jăt tai tam gơl pa pràn kơldang, tơngguh uă bơta niam, cồng nha lơh broă, bè jơnau đơs bơh Tổng Ƀí thư ồng Tô Lâm dê tàm Pơrjum tơn jơh broă lơh nam 2024, lam lơh jăt kơnòl broă nam 2025 bơh Cíñ phủ dê, mờ gơnoar ătbồ ƀòn lơgar dê, là; tơngai tŭ do dà lơgar neh geh tơl bơta rơcăng mờ bơta pràn, tơl bơta kơ̆p kờñ mờ jơh nùs lơh ngan nàng mŭt tàm rài brồ să bơtàu tơngguh pas pràn, bơtàu tơngguh sùm bơh jơi bơtiàn dê; tơl tŭ niam gam tus mờ bol he pal geh gĭt di tŭ, tài bơh dilah lời thoar tê tĕ, bol he rơ̆p geh tìs mờ jơnau kah yau mờ làng bol.