Bè ală tơngume broă lơh tờm tàm nhai 2, Củ tịc Quôk hội sồr ală anih lơh broă tơrgùm rơcang niam ai dơ̆ pơrjum bơh Ủy ƀan Thường vụ Quôk hội dê in (kờp dŭ jŏ jòng tàm 4 ngai); mờ kung lơh jat Broă lam lơh bơh Đảng đoàn Quôk hội dê lơh jat Nghị quyết Pơrjum dờng Đảng gùt lơgar dơ̆ 13. Dùl tơngume ndai kuơmàng ngan hơ̆ là Pơrjum gùt lơgar tơn jơh broă lơh Hội đồng Ñân zân ală càr, ƀòn dờng gơ wèt dà lơgar (kờp dŭ bơyai lơh tàm càr Quảng Ninh).

Bè ală tơngume lơh broă tàm quý 1 mờ gùt nam, Củ tịc Quôk hội ồng Vương Đình Huệ sồr Ủy ƀan adat boh lam đơng lam lơh broă lơh Bơt bơtàu adat boh lam, kơrnuat boh lam nam 2024, tam gơl Broă lơh bơt bơtàu adat boh lam, kơrnuat boh lam nam 2023, ală anih lơh broă ndai rơcang lài pơgồp bal mờ ală anih lơh broă geh gơ rềng ai tơlik ală rơndap broă lơh nàng yal Ủy ƀan Thường vụ Quôk hội, Quôk hội in jat gơnăp gơnoar.

Mìng is bè rơndap lơh Adat Ù tiah (tam gơl), Củ tịc Quôk hội sồr ală anih lơh broă lơh jat Nghị quyết bơh Ủy ƀan Thường vụ Quôk hội dê bè ai jơnau đơs làng bol, jat nùs nhơm pơn đơl pràn uă ngan rlau jơh, lơh gơs mờ yal Ủy ƀan Thường vụ Quôk hội in tàm nhai 3.

Gơ rềng tus broă lơh jat sền, Củ tịc Quôk hội ồng Vương Đình Huệ sồr: “Lam lơh ală broă lơh jat sền nam do dê, 4 tơngume jat sền kuơmàng ngan, bè: năng lượng, sră măi, sră bơto sră măi; 3 broă lơh jơnau kờñ dà lơgarl ală broă lơh sơnơm, jơh ală broă do ndrờm kal ke mờ geh sền gròi uă; sùm sơlơ tơnguh jat sền bè broă lơh sa dờng, ală bơta drà kă bro priă jền, cứng khoán, drà kă bro ù tiah hìu đam, drà trái phiếu mpồl lơh sa kă bro. Hội đồng Zân tộk, ală Ủy ƀan kơlôi sơnơng nàng rơ wah ală tơngume pal tơrgùm mblàng lơh loh, lùp ală broă geh sền gròi uă tŭ do, bè sền sơ wì cih mat rơndeh rơndồ là bơta kal ke ngan. Ală tơngume do dilah kơp Quôk hội lùp den lơyài, den tàng gơtùi lam lơh mơ. Bè hơ̆ den tàng, Hội đồng Zân tộk, ală anih lơh broă Quôk hội rơ wah ală broă ngan ngồn, di mờ bơta geh ngan rài kis, ờ gŏ di lơh gơs hơ̆ sồng lời tềng hơ̆, kung ờ lời wơl bơta ờ niam lơi. Bơta gơlik geh pa den bol he pal geh ală broă lơh pa”.

Jat broă rơndap lơh, Ủy ƀan Thường vụ Quôk hội, Quôk hội geh lam lơh lùp mờ hơ jơnau lùp nàng jat sền ală broă gơlik geh tàm rài kis, Củ tịc Quôk hội tơngkah pal ai tơlik jơnau sac rơ wah ală broă di, ngan ngồn kung bè pơn jat tai kơlôi sơnơng nàng tam gơl pa broă rơndap lơh mờ broă lơh lùp, hơ jơnau lùp: “Lùp mờ hơ jơnau lùp ờ di là bơta tơrlòng Ƀộ trưởng, kwang atbồ gah broă lơh mờ là bal mờ gơp lơh loh ală broă gơlik geh nàng bơsong ală broă ngan ngồn tàm rài kis geh ai tơlik. Loh làng, song dơpă, lơh loh bơta geh ngan broă gơlik geh, nàng jòi geh broă lơh tă bơsong. Bè broă rơcang ală tơngume jat sền tàm nam tơnơ̆, jat añ, bol he jat sền broă lơh jat ală Nghị quyết bè broă lơh bơtàu tơnguh wơl, bơtàu tơnguh lơh sa mpồl bơtiàn, ală rơndap broă lơh kuơmàng dà lơgar, ală Nghị quyết bơh Đảng dà lơgar, Nghị quyết Quôk hội, tơnơ̆ hơ̆ Cíñ phủ ai tơlik ală broă lam lơh jat broă rơndap lơh nàng lơh; kờp sền wơl broă lam lơh broă lơh jat sền sră nggal pơlam lơh jat jơnau cih adat boh lam bơh Hội đồng Zân tộk, ală Ủy ƀan dê bè lam lơh broă lơh jat sền mờ jat Nghị quyết pơlam bơh Thường vụ Quôk hội dê gơ wèt mờ Hội đồng Ñân zân ală kâp, halà broă bơcri priă dà lơgar tàm tơngai tus do pal kờp sền jơh nàng jòi git jơnau bơh tài sùm lơyài bè do”.

Nam do, Quôk hội geh lam lơh ai sră pồ pin dờn gơnoar broă bơh Quôk hội pồ mờ kĭ tơn pồ, bè hơ̆ den tàng, Củ tịc Quôk hội đơs nền, broă lơh rơcang lài nàng kwang bàng Quôk hội in sền sơ wì di khà pin dờn gơ wèt mờ ală gơnoar broă kung là kơnòl kuơmàng ngan bơh Hội đồng Zân tộk, ală Ủy ƀan, ală Ƀan bơh Ủy ƀan Thường vụ Quôk hội dê mờ Ủy ƀan Thường vụ Quôk hội. Củ tịc Quôk hội kung sồr rơcang niam mờ gờñ ală tơngume lơh nền, kờp dŭ kes priă dà lơgar; broă lơh cribơyai mờ lơgar ndai Nghị viện, tàm hơ̆ geh ală dơ̆ lòt còp lơgar ndai bơh Củ tịc, ală Phó Củ tịc Quôk hội, Pơrjum Nghị sĩ kơnòm să gùt plai ù bơh lơgar he bơyai lơh.