Quôk hội lơh kơrnoăt boh lam nàng kờñ gơguh lơh sa mờ bơta niam nùs cau làng bol dê

VOV4.K’Ho- Tàm Dơ̆ pơrjum ờ bè ờs dơ̆ 09, Quôk hội khoă XV, poh lài ală cau ala măt cribơyai tàm jơnum bè ală rơndăp broă: Adăt Rơndăp Cíñ phủ (tam gơl); Adăt Rơndăp Gơnoar ătbồ ƀòn lơgar (tam gơl) mờ Jơnau rơcăng cih Jơnau lơh nền tàm pơrjum Quôk hội dê cih bè bơsong bàr pe broă gơrềng tus rơndăp tăp sèng mpồl cau mpồl lơh broă dà lơgar dê. Bơta niam nùs bơh cau làng bol dê mờ gơguh lơh sa là gai was sền swì pràn jak lơh broă, cồng nha lơh broă mờ geh cồng nha bơh Cíñ phủ, kâp gơnoar ătbồ dê mờ là jơnau kờñ dờng ngan rlau jơh, là anih tus tŭ tam gơl ală adăt do.

Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

Cribơyai tàm jơnum bè rơndăp broă lơh Adăt Rơndăp gơnoar ătbồ ƀòn lơgar tam gơl, ală cau ala măt dồ nùs ring bal mờ jơnau đơs sơlơ pà kâp, pà gơnoar, tài bơh do là gùng dà bơsong bơta gơkòl tŭ do. Adăt ờ gŏ di cih loh làng, nền cê tơl broă lơh mờ mìng cih ală broă gơcèng bơta pal jăt lơm, tŭ geh pà gơnoar, ƀòn lơgar lơh nền, ƀòn lơgar kong kơnòl. Bulah bè hơ̆, tŭ pà gơnoar pràn kơldang rlau ai ală kâp gơnoar in rơ̆p lòt pơn jăt bal mờ jơnau kơlôi sơnơng bè broă sơmờm gơnoar. Ồng Hoàng Văn Cường, Cau ala măt Mpồl Hà Nội, đơs bè do: “Ai gùng dà broă lơh lơh bè lơi nàng pleh sơmờm gơnoar, sơmờm gơnoar broă, dùl tàm ală gùng dà broă lơh hơ̆ là gơnoar lòt pơn jăt bal yal loh làng, song dơ pă, yal lơh loh. Tŭ hơ̆, ală cau kwang bàng, lơh jăt lơh niam geh pràn jak lơh broă, bơceh lơh, nùs nhơm bơh jơnau đơs pơndŭt 14 bơh Ƀộ Cíñ trị dê bè pơn jờng ală cau khin lơh hơ̆ sồng lơh geh cồng nha”.

Tus bal cribơyai tàm jơnum, Tổng Ƀí thư ồng Tô Lâm tơngkah: ai bơta niam nùs bơh cau làng bol dê nàng sền swì cồng nha lơh broă, lơh broă gơtùi mờ geh cồng nha bơh Cíñ phủ, gơnoar ătbồ ală kâp dê. Bơta do gơ jăt tàm bơta sền sơnơng, jơnau tơl pràn gơdờp tam gơl pa, pràn jak lơh jăt broă lơh bơh kâp gơnoar ătbồ dê.

“Tơngguh uă bơta niam drơng broă ai cau làng bol in, chồl tơngguh bơta tus bal bơh mpồl bơtiàn dê tàm ală tŭ tơngguh uă cồng nha bơh mpồl lơh broă sră pơ àr gơnoar ătbồ dê mờ lơh pràn kơldang rài làng bol lơh tờm. Dilah ờ hòi tơrgùm geh pràn bơh cau làng bol dê den kal ke ngan. Kờñ pal pơn jờng, cih bè lơi nàng lơh geh bơta hơ̆. Jàu găp gơnoar mơya sră pơ àr gơnoar ătbồ kung kwơmàng ngan sơl. Jơh ală gơnăp gơnoar den lời hŭi tĕ sră pơ àr gơnoar ătbồ, lời hŭi tĕ gơnoar broă drơng làng bol in rao”.

Ai jơnau đơs tàm Adăt Rơndăp Cíñ phủ (tam gơl), Củ tịc Quôk hội ồng Trần Thanh Mẫn đơs sùm nùs nhơm pà kâp pràn ai Cíñ phủ in nàng Cíñ phủ rơcăng lài lơh nền jăt tàm nùs nhơm bơta geh ngan tàm rài kis là gai was nàng bơsong ală anih gơkòl, gơ kơryan nàng lơh geh bơta ƀươn bơta pràn in bơtàu tơngguh. Ală broă neh geh bơta geh ngan sền swì tơnggŏ den bơsong tơn. Mờ nùs nhơm hơ̆, Củ tịc Quôk hội sồr, tŭ ai jơnau đơs tam gơl ală adăt geh gơrềng pal pơn jăt tai kờp sền nền, nàng gơ in dipal mờ ală jơnau cih bơh Sơnoa boh lam dê.

“Gơ wèt mờ Adăt Rơndăp gơnoar ătbồ ƀòn lơgar (tam gơl) rơ̆p pà kâp pràn rlau ai gơnoar ătbồ ƀòn lơgar in jăt jơnau đơs, ƀòn lơgar lơh nền, ƀòn lơgar lơh, ƀòn lơgar kong kơnòl. Tŭ do, Quôk hội neh tam gơl pa bồ tơngoh kơlôi sơnơng lơh Adăt hơ̆ là Quôk hội pà gơnoar pràn rlau ai Anih duh broă Lơh kơnòl broă sùm Quôk hội in. Tài bơh broă pơrjum bơh Anih duh broă Lơh kơnòl broă sùm Quôk hội dê rơcăng lài rlau nàng bơsong ală broă jal mhar. Gơ wèt mờ Quôk hội tàm tơngai tus, ờ ătbồ sră cih măt bơcri priă, mờ tàm Cíñ phủ tơn kung ờ ătbồ nàng kờñ tơrmù uă ngan rlau jơh broă dan- pà”.

Dùl tàm ală jơnau pal jăt gĭt nền loh làng gơnăp gơnoar là Thủ tướng Cíñ phủ pal “ờ lơh nền ală broă loh làng gơ wèt kơnòl broă bơh Ƀộ trưởng, Lam bồ anih lơh broă ndrờm pal mờ Ƀộ dê bal mờ gơnoar broă kwang bàng Cíñ phủ gơ wèt mờ gah, broă jàu jàu drơng kơnòl”. Cau ala măt Mpồl Quôk hội ƀòn dờng Hồ Chí Minh ồng Nguyễn Minh Đức, sồr: Cih gơ in loh broă pà gơnoar, jàu gơnoar, pà kâp ătbồ bơh Thủ tướng Cíñ phủ tus dì ală ƀộ, gah.

“Jàu gơnoar đah Thủ tướng Cíñ phủ mờ Ƀộ trưởng halà Lam bồ gah den jàu gơnoar ală tơngume lơi? Jàu gơnoar ai Củ tịc Anih duh broă Làng bol càr halà ƀòn dờng gơ wèt Dà lơgar jàu gơnoar ală tơngume lơi? Tàm do pal geh pơlam gùng nàng tơnơ̆ do geh Jơnau lơh nền Cíñ phủ dê nàng bơto pơlam loh làng ngan. Dilah ờ geh jơnau là bơh jŏ lài ƀòn lơgar pal là sră nggal dan, mờ lùp tai jơnau đơs tài ờ gŏ loh”.

Ală cau ala măt đơs là, jơh gùt lơgar gam lơh jăt dơ̆ tam gơl bơta yau gơgơs bơta pa tàm mpồl cau mpồl lơh broă Dà lơgar mờ tŭ tơngai mhar ngan, den tàng bè hơ̆ kờñ ngan pal ai lơh jăt mơ tơn Jơnau lơh nền tàm pơrjum Cih bè bơsong bàr pe broă gơrềng tus rơndăp tăp sèng mpồl cau mpồl lơh broă dà lơgar, nàng kờñ lơh geh cơng tàng kơrnoăt boh lam lơh jăt broă rơndăp tăp sèng mpồl cau mpồl lơh broă bơh ală anih lơh broă dà lơgar dê tàm kâp Dà lơgar mờ ƀòn lơgar.

Viết bình luận