Broă lơh kwang bàng neh geh lơh nền nòn jat di jơnau sồr bơh Đảng, adat boh lam bơh dà lơgar dê, lơh geh bơta ring bal uă bơh ală cau ala mat Quôk hội dê. Quôk hội neh ring bal Jơnau lơh nền bè broă ring bal pồ Phó Thủ tướng mờ jơh 432 nă cau ala mat Quôk hội geh mat ring bal. 3 kwang bàng geh ring bal pồ at gơnoar broă Phó Thủ tướng, geh: Kwang geh jơng tàm Ƀộ Cíñ trị ồng Nguyễn Hòa Bình, Kwang geh jơng tàm Đảng dà lơgar, Ƀộ trưởng Ƀộ Priă jền ồng Hồ Đức Phớc mờ Kwang geh jơng tàm Đảng dà lơgar, Ƀộ trưởng Ƀộ Cribơyai broă mờ lơgar ndai ồng Bùi Thanh Sơn. Pồ at gơnoar broă Ƀộ trưởng Ƀộ Sền gàr adat boh lam gơ wèt mờ ồng Nguyễn Hải Ninh mờ Ƀộ trưởng Ƀộ Phan kuơ geh is mờ Tiah ơm kis gơ wèt mờ ồng Đỗ Đức Duy.

Đơs tơn jơh pơrjum, ala mat Quôk hội, Anih duh broă lơh Kơnòl broă sùm Quôk hội, Củ tịc Quôk hội ồng Trần Thanh Mẫn jơh nùs ưn ngài bơta đơng lam bồ nền nòn ngan bơh Mpồl duh broă Đảng dà lơgar, Ƀộ Cíñ trị, Ƀan Ƀí thư dê, mờ tàm hơ̆ bơta đơng lam tơn bơh Tổng Ƀí thư, Củ tịc lơgar ồng Tô Lâm tàm broă rơcang lài mờ bơyai lơh pơrjum. Ală cau ala mat Quôk hội neh tơnguh nùs nhơm geh kơnòl, cribơyai dồ bă ring bal jơnau đơs, jơnau lơh nền broă lơh kwang bàng neh lơh geh bơta ring bal uă. Củ tịc Quôk hội ồng Trần Thanh Mẫn đơs nền: “Bol he pin dờn, tềng đap bơta đơng lam bồ bơh Đảng dê; bơta lơh bal bơh jơh gùt anih lơh broă cíñ trị, ală kâp, ală gah broă lơh dê; bơta lơh ngan pơn đơl pràn bơh gùt Đảng, gùt làng bol, gùt ling klàng, ală mpồl lơh sa kă bro, làng bol he tàm lơgar ndai dê den ngan là dà lơgar he rơp sơrlèt gan kal ke, bơta lòng, lơh gơs uă ngan rlau jơh ală jơnau kờñ bơtàu tơnguh lơh sa – mpồl bơtiàn, gàr niam lơngap lơngai dà lơgar, broă lơh mờ lơgar ndai mờ rơcang lài kơryan sa kuề sa kuà, broă ờ niam nam 2024 dê, pơgồp bơnah lam lơh jat geh cồng nha Jơnau lơh nền bơh pơrjum dờng cau ala mat gùt lơgar dơ̆ 13 bơh Đảng dê; rơcang lài Pơrjum dờng Đảng ƀộ ală kâp, wèt tus Pơrjum dờng cau ala mat gùt lơgar dơ̆ 14 bơh Đảng dê”.

Tơnơ̆ tŭ tơn jơh pơrjum, Cơldŭ lơh broă Quôk hội bơyai lơh pơrjum ƀău, yal bè cồng nha dơ̆ pơrjum. Kwang gơnoar cih Quôk hội, Kwang atbồ Cơldŭ lơh broă Quôk hội ồng Bùi Văn Cường pà git: pơrjum nisơna dơ̆ 8, Quôk hội khoă XV neh lơh geh cồng nha niam, ală kwang bàng lam lơh pồ halà ring bal pồ neh dờp geh bơta ring bal, pin dờn uă ngan: “Củ tịc lơgar den tàm Jơnau lơh nền bơh Đảng dà lơgar dê nhai 10 tus rơp pồ. Ƀộ trưởng Ƀộ priă jền rơp at tơn gơnoar broă do tus tŭ pồ Ƀộ trưởng pa. Ai Ƀộ trưởng Ƀộ Cribơyai broă mờ lơgar den geh pồ lơh Phó Thủ tướng mơya pơn jat tai lơh Ƀộ trưởng. Khà rơndap tap sèng bơh kwang bàng Cíñ phủ dê, bồ tơngai lơh broă den Jơnau lơh nền bơh Quôk hội dê rơndap tap sèng geh 4 Phó Thủ tướng, pa do Quôk hội ring bal bơh 4 Phó Thủ tướng gơguh 5 Phó Thủ tướng. Mat neh pồ, 2 Phó Thủ tướng neh geh mờ 3 Phó Thủ tướng pa ring bal pồ là gơ gơs 5”.

Kwang atbồ Mpồl Broă lơh cau ala mat ồng Nguyễn Thanh Hải kung pà git: jat kờp dŭ bơh Đảng dà lơgar dê, bơh tŭ do tus jơh nam 2024 rơp tơrgùm pồ tơl ală gơnoar broă đơng lam bồ kâp dờng mờ kâp ủy, gơnoar atbồ ală kâp nàng kờñ sơlơ tơnguh tai gơnoar broă đơng lam bồ bơh Đảng dê gơ wèt mờ kơnòl broă bơtàu tơnguh lơh sa – mpồl bơtiàn, niam chài, sền gàr dà lơgar, lơngăp lơngai, lơh broă mờ lơgar ndai mờ rơcang ai Pơrjum dờng Đảng ală kâp in wèt tus Pơrjum dờng Đảng gùt lơgar dơ̆ 14 bơh Đảng dê. Broă pồ tơl kwang bàng nàng gàr ai anih lơh broă cíñ trị in wil tơl rlau; tam klac rlau; bơnĕ bơnài rlau; lơh broă geh cồng nha rlau mờ lơh gơlik bơta ƀuơn rlau, niam rlau ai bơtàu tơnguh lơh sa mpồl bơtiàn in; tơnguh niam rài kis bơh làng bol dê; sơlơ tơnguh bơta đềt mềr mờ làng bol, lơh kơ̆ bơta pin dờn bơh làng bol dê gơ wèt mờ Đảng, mờ dà lơgar: “Kwang bàng tŭ do geh rơndap jat gùng dà geh gơguh, geh gơmù, geh mut, geh lik jat jơnau sồr kơnòl broă, jơnau kờñ broă lơh mờ pràn jak lơh gơs kơnòl broă bơh tơl nă cau dồ nă să mùl màl dê. Broă Quôk hội ring bal pồ 3 Phó Thủ tướng, 2 Ƀộ trưởng ngai do, ring bal ală jơnau lơh nền uă ngan, rlau 90% ai gŏ bơta “jơnau đơs Đảng dê, nùs nhơm làng bol dê”, “Đảng sac rơ wah, làng bol pồ” geh bơta ring bal, pin dờn uă ngan bơh cau ala mat Quôk hội dê là cau ala mat làng bol dê in”.