Dơ̆ Pơrjum dơ̆ 10 rơp mut lơh tàm ngai 20/10 tus mờ kờp dŭ tơn jơh tàm ngai 12/12. Kờp dŭ Quôk hội rơp sền swì, lơh nền: 45 rơndap lơh adat boh lam, jơnau lơh nền tàm pơrjum gơ wèt broă lơh bơt bơtàu adat boh lam, 13 mpồl tơngume bè lơh sa – mpồl bơtiàn, kes priă dà lơgar, jat sền mờ lơh nền ală broă kuơmàng ndai bơh dà lơgar dê, mờ kung geh 13 mpồl tơngume ală anih lơh broă pơyua jơnau yal nàng cau ala mat Quôk hội in kơlôi sơnơng. Thủ tướng Cíñ phủ ồng Phạm Minh Chính đơs là, broă bơt bơtàu ală adat boh lam jat tàm nùs nhơm dà lơgar gơnoar adat boh lam sàh hội củ nghiã bơh làng bol dê, tài làng bol, ai làng bol lơh tờm. Thủ tướng Cíñ phủ sồr 2 anih lơh broă tam pà bal, pơgồp bal jơh nùs, geh cồng nha; ală ƀộ, gah lơh broă dà lơgar kờñ pal pơgồp bal mờ Mặt trận dà lơgar jat nùs nhơm cih dờp nàng iat jơnau đơs bơh làng bol, cau geh jơnau git wă jrô, cau kơlôi sơnơng jak chài dê; broă lam lơh ờ wil tơl, gơ jă gơ jal, ờ mìng lơh jat ală jơnau sồr bè broă rơndap lơh, sră pơ àr, mờ gam gàr bơta niam, tơnguh mhar tơngai hơ pơrgon lam lơh tai.

Bơdìh hơ̆ tai, broă lơh rơcang lài ală rơndap lơh adat boh lam pal nền nòn, jơh nùs, tơl làm; pơgồp bal jơh nùs, bơnĕ bơnài đah ală anih lơh broă; tơnguh nùs nhơm geh kơnòl bồ tơngoh jak, mờ kung ngui bồ tơngoh jak kòn bơnus lơh gơs. Thủ tướng Cíñ phủ ồng Phạm Minh Chính đơs sùm: “Pơn jat tai tam gơl bồ tơngoh kơlôi sơnơng, lơh pràn tam gơl wơl bơceh lơh adat boh lam, tam gơl bơh bồ tơngoh kơlôi sơnơng kơn jơ̆ bè atbồ gơ gơs bồ tơngoh kơlôi sơnơng bè bơt bơtàu mờ drơng broă. Do là dùl jơnau sồr dờng ngan tàm tơngai tŭ do. Lơh jat bơta geh ngan sơn đờm bơh ngan ngồn, ki ngàm bơta ngan ngồn mờ ai ngan ngồn lơh khà đo was. Bồ tơngoh kơlôi sơnơng bol he dê pal tam gơl tàm bơta do. Añ dan yal mờ ală oh mi, priă jền lơh geh bơh bồ tơngoh kơlôi sơnơng, bơta gơn kơnờm sơn đờm bơh bơta tam gơl pa, bơta pràn là sơn đờm bơh làng bol. Den tàng bơh nùs nhơm lơh adat boh lam, bơt bơtàu adat boh lam den he kung kơlôi sơnơng mờ pơlam lơh jat jơnau sồr do”.

Ring bal mờ ală jơnau đơs pơn dut bơh Thủ tướng Cíñ phủ ồng Phạm Minh Chính dê, Củ tịc Quôk hội ồng Trần Thanh Mẫn tơngkah wơl, tơngai bơh tŭ do tus dơ̆ pơrjum ờ gam uă tai, ngan là tàm tŭ tơngai geh uă broă kuơmàng bè rơcang Pơrjum dờng Đảng gùt lơgar dơ̆ 14, tĕ khà cau ala mat Quôk hội khoă XVI mờ Mpồl duh broă Làng bol ală kâp tơngai lơh broă bơh nam 2026 tus nam 2031. Bulah bè hơ̆, Quôk hội, Cíñ phủ kung gam pal rơcang gơ in niam ai dơ̆ pơrjum dơ̆ 10 in, pơrjum dut ndơl bơh tơngai lơh broă Quôk hội khoă XV dê. Củ tịc Quôk hội tơngkah, ală anih cih gơs sră nggal kờñ pal lơh jat di Adat yal sră nggal kơrnuat boh lam, ală jơnau cih, jơnau pal jat neh geh yal. Tơnơ̆ pơrjum do, Kwang gơnoar cih dờng Quôk hội pơgồp bal mờ Kong kơnòl Cơldŭ lơh broă Cíñ phủ rơndap tap sèng wơl tơngume gơ in dipal mờ tŭ tơngai bơyai lơh ală pơrjum Đảng dê. Bàr gah kờñ pal pơn jat tai pơgồp bal mhar rlau bơnah broă rơcang lài sră nggal, tơmut tàm APP Quôk hội dê nàng ală cau ala mat Quôk hội in kơlôi sơnơng.

Củ tịc Quôk hội pà git, bơh nùs nhơm jal mhar, tàm dơ̆ pơrjum do, Quôk hội mờ Cíñ phủ ring bal ờ ơm rlô tàm dơ̆ pơrjum: “Quôk hội kung ờ lam lơh lùp, hơ jơnau lùp mờ tam gơl mờ broă lơh, Cíñ phủ pơyua jơnau yal wil tơl nàng Quôk hội in cribơyai tàm dùl ƀùi. Anih lơh broă yal rơndap broă lơh pal rơcang lài tơngume nàng gơtùi yal pơgồp bal ală sră yal mờ Ƀộ trưởng, Kwang lam bồ gah lơh broă drơng tơngume hơ̆ in nàng yal. Tơrmù tŭ jơ sền tơl sră yal jòng mờr 5 phuk, rơndap tap sèng tŭ tơngai dipal ală adat boh lam, jơnau lơh nền tàm pơrjum cribơyai mờ tŭ tơngai Quôk hội sền sơ wì pờ tê ring bal. Tài bơta is ồn, den tàng pơrjum Quôk hội dơ̆ do den bol he rơp tam pà mpồl nàng cribơyai. Bơh nùs nhơm cribơyai jat mpồl lơh sa, mpồl bơtiàn, mpồl adat boh lam jak chài măi mok, sền gàr dà lơgar, lơngăp lơngai bol he tam pà gơs mpồl adat boh lam nàng cribơyai”.

Củ tịc Quôk hội sồr ală Ƀộ trưởng, Củ tịc Mpồl duh broă Jơi bơtiàn, Kong kơnòl Anih duh broă pal lơh tus gùng tus dà ală rơndap lơh adat boh lam bơh anih lơh broă he dê cih gơs, yal, sền swì tus tŭ geh Quôk hội ring bal. Bal mờ hơ̆, ală Ƀộ trưởng kờñ pal sồr gah broă lơh he dê tơnguh pràn broă ngui măi mok yal jơnau tơnggit, tam gơl sồ, ngan là ngui bồ tơngoh jak bơh kòn bơnus lơh gơs tàm broă kờp sền ală adat boh lam yau, jơnau rơcang cih adat boh lam pa nàng lơh mhar, lơh geh cồng nha. Củ tịc Quôk hội ồng Trần Thanh Mẫn ring bal mờ Thủ tướng Cíñ phủ ồng Phạm Minh Chính tŭ đơs là, 2 gah kờñ pal pơgồp bal jat nùs nhơm tam klac bal; đơs sùm, pơrjum là cồng nha bal bơh Cíñ phủ, Quôk hội dê mờ bơta đơng lam bơh Mpồl đơng lam Đảng dà lơgar, Ƀộ Cíñ trị, Ƀan Ƀí thư mờ Tổng Ƀí thư ồng Tô Lâm dê.