Đơs tàm pơrjum, Củ tịc Quôk hội ồng Trần Thanh Mẫn pà git, pơrjum dơ̆ 8 geh uă tơngume ngan rlau jơh tàm ală dơ̆ pơrjum bơh bồ tơngai lơh broă Quôk hội khoă XV tus tŭ do. Jat hơ̆, Quôk hội rơp sền sơ wì 39 tơngume, tàm hơ̆ geh 29 tơngume gơ wèt broă lơh lơh adat boh lam, 10 mpồl tơngume bè lơh sa – mpồl bơtiàn, kes priă dà lơgar, jat sền, broă lơh kwang bàng mờ ală broă ndai. Pơrjum dơ̆ 8 rơp mut pơrjum tàm ngai 21/10 tus. Kờp dŭ tơngai lơh broă là 29 ngai. Pơrjum geh lơh gơs 2 dơ̆.

Pơrjum geh lơh lài mờ tơngai bơyai lơh pơrjum 1 nhai nàng ală anih lơh broă cih sră nggal, sền sơ wì in geh tŭ tơngai lơh jat di Adat ai tơlik sră nggal adat boh lam, mờ kung nàng cribơyai, ring bal bè tơngume pơrjum dơ̆ 8, ngan là ală anih lơh broă ai jơnau đơs sền sơ wì bè tơngai pơrjum, tŭ tơngai, bơta niam lơh geh jat jơnau sồr, broă rơcang lài tơngume ală rơndap lơh adat boh lam, jơnau lơh nền tàm pơrjum nàng bơ tơl tàm tơngume pơrjum dơ̆ 08 jat tơngu me neh tơrmù lơyah.

Jat Củ tịc Quôk hội ồng Trần Thanh Mẫn đơs, tơngai lài, broă lơh pơgồp bal đah Cíñ phủ mờ ală anih lơh broă Quôk hội ngai sơlơ nền nòn, bơnĕ bơnài, ngan ngồn mờ geh cồng nha, ală anih lơh broă neh tơnguh nùs nhơm geh kơnòl, rơcang lài bơh gờñ, bơh ngài, lơh broă ngai mang nàng rơcang ai ală rơndap lơh adat boh lam, jơnau lơh nền tàm pơrjum yal Quôk hội in.

Tàm tơngai tŭ do, Củ tịc Quôk hội ồng Trần Thanh Mẫn tơngkah: “Càl rbut dờng sồ 3 pa do gơlik geh kal ke, gơ lời wơl jơnau ờ niam kơn jơ̆ kơn jut ngan. Tus tŭ do, ờ hềt gơtùi kờp tơrgùm jơh ală hoàc huơr. Jơh gùt Đảng, jơh gùt làng bol, jơh gùt ling klàng he dê sơlơ gơguh tai kal ke, bơta lòng pa. Cíñ phủ pal ơm tềng đap ală kal ke, kơn jơ̆ tai tàm broă ai, tă dơ̆ ngui kes priă, lam lơh jơnau kờñ gơguh lơh sa, gàr kơ̆ kơljap broă lơh sa dờng, kơryan roh giă priă mờ gơguh giă ală bơta phan nàng gàr niam rài kis làng bol in. Bè hơ̆ den tàng, Đảng mpồl Quôk hội, Mpồl đơng lam Đảng Cíñ phủ rơp pơgồp bal ngan ngồn, geh cồng nha, geh broă lơh di tŭ, lơh jat jơnau sồr bơta geh ngan dê tài bơta bơtàu tơnguh lơh sa – mpồl bơtiàn, gàr niam rài kis làng bol mờ chồl tơnguh gơguh lơh sa”.

Tơnơ̆ tŭ iat ală jơnau đơs cribơyai, jơnau đơs bơh ală Ƀộ trưởng, Kwang atbồ gah broă lơh, kwang đơng lam bồ Mpồl duh broă Jơi bơtiàn, ală Anih duh broă bơh Quôk hội dê, Thủ tướng Cíñ phủ ồng Phạm Minh Chính jờng rơ bơta pơgồp bal bơh Đảng mpồl Quôk hội mờ Mpồl đơng lam Đảng Cíñ phủ dê ngai sơlơ niam rlau; pà git, pơrjum nàng kờñ kờp sền ală broă gam gơ kòl, pal geh ring bal nàng chồl tơnguh mờ sơlơ tơnguh tai bơta niam dơ̆ pơrjum dê. Bè hơ̆ den tàng Thủ tướng sồr 2 gah pal geh bơta tàm pơgồp bal niam bơh broă cih jơnau rơcang cih adat boh lam, jơnau lơh nền tàm pơrjum. Thủ tướng Cíñ phủ kung sồr ală Ƀộ, ală gah broă lơh jơh nùs, rơcang lài, pơgồp bal dồ bă nền nòn mờ geh cồng nha mờ Mpồl duh broă Jơi bơtiàn, ală Anih duh broă bơh Quôk hội dê: “Bơdìh mờ broă pal lơh gơs gùng dà broă lơh, lơh jat ngan ngồn ală jơnau lơh nền bơh Đảng dê nàng bol he in lam lơh jat. Bol he pal pơn jat tai tam gơl pa bồ tơngoh kơlôi sơnơng lơh adat boh lam, bơh bơta mìng tơrgùm ai broă lơh atbồ in gơ gơs tơrgùm ai broă lơh atbồ geh cồng nha, mơya kung pal pơgồp bơnah lơh gơlik bơta bơtàu tơnguh. Añ gŏ pal tam gơl pa tàm ală anih cih adat bọh lam, kung bè ală anih lơh broă sền sơ wì. Bơh hơ̆, hơ̆ sồng gơtùi hòi jà tơl bơta priă jền tă pơgồp. Tŭ do, priă jền bol he dê gam gơ kòl. Bol he mìng tơrgùm atbồ geh cồng nha là neh niam rau. Bulah bè hơ̆, bơdìh hơ̆ tai pal lơh gơlik ù tiah pa, lơh gơs ai bơta bơtàu tơnguh in nàng hòi jà tơl bơnah priă jền tă pơgồp bơh mpồl bơtiàn, làng bol dê”.

Thủ tướng đơs là, gơ wèt tàm tơl bơta geh ngan bơh ală rơndap lơh adat boh lam dê nàng gơtùi lơh geh ală jơnau sồr ngan ngồn, mơya gơ wèt mờ ală broă gam tam gơl, geh uă bơta gơ rềng den pal tơrgùm jơh. Broă lơh lơh adat boh lam pal geh lơh jat nùs nhơm, bơta lơi neh loh, neh git nền, neh geh ai gŏ là di, lam lơh geh cồng nha mờ uă ngan là ring bal den rơp cih gơs adat boh lam. Ai ală broă ờ hềt loh làng, bơta geh ngan gam uă tam gơl, gam gơlik geh kal ke, ờ gơtùi git lài den khin cha lơh tơrlòng lài, lơh jài ai mờng chài jài mờ rề ơnàng rơhời.

Đơs pơn dut pơrjum, Củ tịc Quôk hội ồng Trần Thanh Mẫn sồr, ală anih cih adat boh lam pal pơyua sră nggal tus Quôk hội in lài mờ ngai 01/10, tàm hơ̆ sền gròi uă tàm 6 tơngume tờm tàm 1 dơ̆ pơrjum pal gàr bơta niam.