Đơs sồr lơh tàm dơ̆ lơh broă, Củ tịc Quôk hội ồng Trần Thanh Mẫn pà gĭt, nam 2024, bulah dà lơgar gam uă kal ke, mơya gơguh GDP kung gam lơh geh pơgăp 7% sơl, jơh 15 broă jàu bơh Quôk hội dê jàu lơh geh, sền gàr lơngăp lơngai rài kis mpồl bơtiàn geh gàr niam. Cíñ phủ, Mặt trận Dà lơgar Việt Nam gam jơh nùs lơh jăt broă tơn jơh hìu ing; broă lơh sền gàr dà lơgar, lơngăp lơngai geh gàr niam; broă lơh lơh broă mờ lơgar ndai geh tơngguh tai; broă lơh rơcăng lài tam dră sa kwề sa kwà, pơhì pơhà geh lơh pràn; nùs nhơm pin dờn bơh làng bol dê gơ wèt mờ Đảng, Dà lơgar geh tơngguh uă.

Củ tịc Quôk hội đơs sùm, lơh geh cồng nha do là bơta lơh ngan dờng ngan bơh jơh gùt Đảng, gùt ling klàng, gùt làng bol dê, tàm hơ̆ tă pơgồp dờng ngan bơh Quôk hội dê tàm broă lơh adăt boh lam, lơh nền ală broă kwơmàng dà lơgar dê jăt broă lơh tam gơl pa bồ tơnggoh kơlôi sơnơng mờ broă lơh adăt. Ala măt Anih duh broă Lơh kơnòl broă sùm Quôk hội dê, Củ tịc Quôk hội ồng Trần Thanh Mẫn jờng rơ ală tă pơgồp bơh ală Anih duh broă, ală mpồl lơh broă tàm Cơldŭ lơh broă Quôk hội dê. Đơs sùm tàm nam 2025 geh uă tềl kah kwơmàng dà lơgar dê, Củ tịc Quôk hội sồr ală anih lơh broă Quôk hội, Cơldŭ lơh broă Quôk hội, ală anih lơh broă gơ wèt Anih duh broă Lơh kơnòl broă sùm Quôk hội dê bañ hừh nùs mờ ală cồng nha neh lơh geh mờ kờñ pal lơh ngan rlau tai nàng bơsong ală bơta ờ hềt dipal, gam gơkòl. Ồng Trần Thanh Mẫn, đơs: Tus do, bol he pal lơh bè lơi bơsong geh tàm dơ̆ pơrjum dơ̆ 9, dơ̆ pơrjum dơ̆ 10 halà tềng đăp măt là dơ̆ pơrjum ờ bè ờs tàm nhai 02 nam 2025, là broă cồng nha ală sră pơ àr, alw sră yal, cồng nha lùp sền nền. Dơ̆ bàr là pơyua sră nggal  tus cau ala măt Quôk hội in lơh bè lơi gơ in di tŭ. Dơ̆ pe là cồng nha tă pơgồp jơnau đơs bơh Mpồl duh broă Jơi bơtiàn dê, ală Anih duh broă ală mpồl lơh broă, Cơldŭ lơh broă Quôk hội pal niam rlau. Bơta dơ̆ puan là broă lơh glài duh rơngòt bơta boh lam tàm anih lơh broă bol he dê là gơ pal lơh jăt kràñ lơh jăt niam rlau. Lơh bè lơi nàng bơngă, bơta pin dờn bơh Quôk hội dê pal geh tơngguh tai tàm mpồl bơtiàn, tàm làng bol. Kwơmàng là làng bol dòn kơnờm Quôk hội, Quôk hội pal tài làng bol drơng broă. Do là ală broă mờ bol he pal jơh nùs kah ngan tàm broă lơh, tàm bơsong broă lơh.

Is ồn broă lơh jăt Jơnau lơh nền tàm pơrjum sồ 18 bơh Dà lơgar dê bè rơndăp tăp sèng mpồl lơh broă kờñ pal geh lơh jăt kràñ lơh jăt niam. Di dơ̆ do, Củ tịc Quôk hội kơ̆p kờñ ală kwang bàng, kông cưk, viên cưk, cau lơh broă tơrgùm bal pràn, dồ nùs bal, tam klăc bal nàng sơrlèt kal ke. Củ tịc Quôk hội sồr, ală anih lơh broă Quôk hội dê, Cơldŭ lơh broă Quôk hội, ală anih lơh broă gơ wèt Anih duh broă Lơh kơnòl broă sùm Quôk hội pơn jăt tai tam gơl bồ tơnggoh kơlôi sơnơng lơh adăt, lơh pràn broă lơh jăt sền; jàu kâp, jàu gơnoar pràn nàng bơsong broă lơh loh gơnoar broă, loh broă, loh cau; mơkung jăt sền lòt sền mờ lơh tam gơl sră pơ àr gơnoar ătbồ tàm Quôk hội. Củ tịc Quôk hội kung tơngkah, tơngai tus tŭ do, ală mpồl lơh broă bơh Cơldŭ lơh broă Quôk hội dê pal rơcăng niam ală kơnòl broă, bè: broă lơh tơn jơh nam Quôk hội dê; sền swì săc rwah 10 broă tàm nam 2024; broă lơh sền gròi sa Tềp ai kwang bàng, công cưk, hìu bơnhă kal ke in. Is ồn, Anih duh broă Lơh kơnòl broă sùm bơyai lơh ală dơ̆ pơrjum dơ̆ 41, 42 tàm nhai 01, nhai 02 nam 2025 mờ dơ̆ pơrjum ờs bè ờs tàm nhai 02 nam 2025; rơcăng ai dơ̆ pơrjum dơ̆ 09, Quôk hội khoă XV; Bơyai lơh geh cồng nha Cribơyai Quôk hội bè lơh broă jăt sền mờ Dơ̆ jàu khà jờng Diên Hồng dơ̆ pe, pal lơh gơtùi, wil tơl, lơh gơlik geh jơnau lơh gơrề uă.

Lài hơ̆, jăt Kwang Gơnoar cih dờng Quôk hội, Kwang drơng kơnòl Cơldŭ lơh broă Quôk hội ồng Lê Quang Tùng, broă lam lơh tơn jơh Jơnau lơh nền tàm pơrjum sồ 18 bơh Mpồl Duh broă Đảng Dà lơgar khoă XIII dê tàm gah Quôk hội, bơh tŭ geh jơnau sồr tơn, Đảng mpồl Quôk hội neh đơng lam, sồr Anih duh broă Lơh kơnòl broă sùm Quôk hội lơh Mpồl Sồr lơh tơn jơh Jơnau lơh nền tàm pơrjum sồ 18 tàm Quôk hội dê bơh Củ tịc Quôk hội lơh Kwang ătbồ Mpồl Sồr lơh, ală Phó Củ tịc Quôk hội là Phó Kwang ătbồ Mpồl Sồr lơh. Củ tịc Quôk hội neh lam lơh jăt bè tam gơl pa, rơndăp tăp sèng tơrmù mpồl lơh broă tơngguh uă cồng nha, lơh broă gơtùi bơh ală anih lơh broă Quôk hội dê, ală anih lơh broă gơ wèt Anih duh broă Lơh kơnòl broă sùm Quôk hội, Cơldŭ lơh broă Quôk hội; geh jơnau cih đơs kwơmàng tàm Pơrjum gùt lơgar bơsram mờ lam lơh tơn jơh broă lơh jăt Jơnau lơh nền tàm pơrjum sồ 18 bè mìng dùl tơnggume “Broă lơh tă bơsong ală bơta gơkòl, bơta gơrềt bè adăt boh lam”.