Ai jơnau đơs bè Rơndap broă lơh Adat tam gơl, bơtơl bàr pe bơta bơh Adat dong kờl adat boh lam, tơngume rề ơnàng cau geh dong kờl adat boh lam dờp geh uă jơnau đơs tă pơgồp bơh cau ala mat Quôk hội dê. Jat ală cau ala mat đơs, jơnau cih do ờ mìng gơ rềng niam ngan tus bơta ring bal tàm broă geh dong kờl adat boh lam mờ gam ai tơnggŏ bơta bơtàu tơnguh lơh sa mpồl bơtiàn bơh dà lơgar dê. Ring bal bơ tơl cau geh dong kờl adat boh lam ờ sa priă, mơya cau ala mat mò Lý Anh Thư, mpồl An Giang geh jơnau đơs: “Broă cih gùng dà ờ sa priă jơh ală bơta neh lơh mpờl gŏ bàr pe bơta ờ niam bè lơh gơlik bơta kơn jơ̆ dờng ngan tus kes priă dà lơgar; ờ hềt gơ glòm wil tơl ală mpồl cau geh jơnau kờñ mơya ờ gơ wèt mpồl cau ờ sa priă. Den tàng, añ sồr anih cih gơs pal kơôi sơnơng, bơ tơl jơnau cih tơrmù priă tă lơh broă drơng ala adat boh lam bơdìh mờ broă lơh ờ sa priă gam ngui tŭ do jat gùng dà: Rề ơnàng cau geh dờp broă drơng ala dong kờl adat boh lam mờ priă tă dipal. Bơdìh mờ ală cau geh priă lơh geh dồ êt ờ sa priă jơh ală bơta den gam geh mpồl cau priă lơh geh di mơ, cau lơh broă ntrờn tiah ơm kis halà làng bol jơi bơtiàn dồ êt nă cau, khi kung kờñ geh dong kờl dùl bơnah priă tă nàng geh dờp bơta dong kờl adat boh lam dồ bă ring bal”.

Đơs sùm, jơnau kờñ dut ndơl bơh gùng dà broă lơh dê là cồng nha sền gàr gơnoar, bơta kuơ dipal bơh cau geh dong kờl adat boh lam dê, cau ala mat mò Cao Thị Xuân, mpồl càr Thanh Hóa đơs là, pal tam gơl bơh gàr geh broă drơng ala gơ gơs gàr bơta niam bơh broă drơng ala dê: “Bơh mùl màl tàm ƀòn lơgar bol hi sền gŏ, làng bol ờ mìng kờñ geh dong kờl, mờ kờñ geh dong kờl tus gùng tus dà, sền gàr gơnoar kuơ dồ bă ngan ngồn. Dilah ờ, bơta pin dờn tàm adat boh lam rơp gơ tìp gơ rềng. Den tàng, añ sồr jơnau rơcang cih Adat kờñ pal sền gròi rlau tus broă cih gơs adat boh lam ală jơnau sồr bè bơta niam broă drơng ala dong kờl adat boh lam. Mờ kung kơlôi sơnơng gùng dà sền swì krơi is, pơgồp bal kơnòl mùl màl bơh cau lam lơh dong kờl adat boh lam, bơh hơ̆ gàr bơta ngan ngồn, pleh mìng đơs gời mờ bơr”.

Tàm dùl đah ndai, cau ala mat mò Nguyễn Thị Yến Nhi, mpồl càr Vĩnh Long dan, mpồl cih gơs pal kơlôi sơnơng, cih gơs adat boh lam broă lơh mpồl duh broă pơgồp bal làm gah dong kờl adat boh lam tàm broă yal yă: “Tàm tŭ tơngai ală anih lơh broă sền gàr adat boh lam geh bơta krơi is uă, broă cih gùng dà pơgồp bal đah ală anih lơh broă do mìng ơm tàm kâp sră nggal pơlam lơh jat kơrnuat boh lam ală gah den tàng cồng nha adat boh lam ờ hềt uă, bơta gơ rềng tàm broă lam lơh kung gam ờ hềt uă. Tàm tŭ hơ̆, jơnau sồr tam gơl wơl sền gàr adat boh lam gàr niam gơnoar kòn bơnus, gơnoar làng bol ai tơlik ngai sơlơ uă. Den tàng broă ai tơngume do tơmut tàm Adat dong kờl adat boh lam là pal geh ngan nàng gơtùi lơh gơlik dùl tơngume adat boh lam tơl pràn, gàr bơta ring bal đah ală gah broă mờ kơ̆ kơljap jŏ jòng tàm broă lơh jat ngan ngồn gơnoar kòn bơnus”.

Gơ wèt mờ Rơndap lơh Adat Hộ tịc (tam gơl), bàr pe jơnau đơs sồr ală anih lơh broă geh gơnoar sền swì, đal git mờ tơrgùm sră nggal neh cih tàm Adat Hộ tịc gam tam gơl mờ Adat Kăn kươk nam 2023. Cau ala mat Tô Á Vang, mpồl ƀòn dờng Cần Thơ geh jơnau đơs: “Bè bơta chài măi mok mờ yal tơnggit jơnau kờñ pal tơrbŏ bal 100%, ndrờm bal bè tŭ tơngai lam lơh mờ ring bal ngui sồ yal mat lơh bơta tờm nàng jòi git jơnau yal tơnggit hộ tịc tàm VNeID. Bè rơndap tap sèng sră nggal, lam lơh dùl mpồng sồ, tơrgùm broă drơng ala dà lơgar hộ tịc tàm VNeID, ngui VNeID ala mờ photo halà ai wơl sră pơ àr”.

Kơlôi mờ jơnau cih tàm sèng 2, bơta 7, jat tàm bơta geh ngan, Củ tịc Anih duh broă Làng bol kâp sàh jàu gơnoar nàng kĭ ală bơta sră pơ àr hộ tịc, ờ kờp sră yal mat sơnđan ngai deh, sră yal chơt, sră kup bau, cau ala mat ồng Nguyễn Trường Giang, mpồl càr Lâm Đồng sồr kờp dŭ wơl jơnau cih do: “Dùl nă cau kờñ pal geh sră pơ àr nàng lơh ală sră pơ àr ies tơp ƀồc. Tŭ do ờ ai Củ tịc Anih duh broă Làng bol sàh jàu gơnoar, pơn yơu geh 1 nă cau hơ̆ lòt Hà Nội pơrjum Quôk hội, jơh dùl nhai, den ờ git là làng bol pal lơh bè lơi. Sră yal mat ngai deh gơtùi kơp. Sră kup bau kung kờñ pal geh mơ nàng lơh ală sră pơ àr ndai. Den tàng añ sồr pal ngac ngar nàng lơh gơlik bơta niam làng bol in”.