Mờ 90,51% cau ala mat Quôk hội ring bal, Quôk hội neh pờ tê ring bal Jơnau lơh nền tàm pơrjum bè broă rơndap lơh bơtàu tơnguh lơh sa – mpồl bơtiàn nam 2026. Jơnau lơh nền tàm pơrjum git nền 15 broă jàu tờm ngan, tàm hơ̆: Khà gơguh kờp jơh phan lơh gơs tàm lơgar (GDP) pơnđơl pràn geh bơh 10% rlau hơđang. GDP kờp bal dùl nă cau geh bơh 5 rbô 400 tus 5 rbô 500 dolar Mỹ. Do là ală broă jàu dờng ngan, mơya jat ală cau al amat đơs, tŭ cribơyai bè broă do den ndrờm gơtùi geh bơnàng jă nàng pin dờn là rơp lơh gơtùi jơnau kờñ ai tơlik bal mờ bơnàng jă neh lơh geh tàm tơngai lơh broă do. Cau ala mat ồng Trần Văn Lâm, Mpồl Bắc Ninh đơs nền, ală cồng nha gơguh lơh sa neh lơh geh bal mờ ală gùng dà broă lơh, bơta dong kờl neh geh Quôk hội lơh sir tàm ală dơ̆ pơrjum rềp ndo, là bơta gơn kơnờm nàng Việt Nam mut tàm nam 2026 mờ bơta crăp rơcang, pin dờn: “Gơguh lơh sa nam do geh rlau 8%. Mờ ală bơta pal geh ai tơngai tơnơ̆ di neh geh Quôk hội tàm uă dơ̆ pơrjum pa do tàm bơyai nàng git nền tam gơl ală gùng dà, broă lơh adat boh lam, lơh gơlik uă broă pràn dong kờl cíñ phủ in nàng chồl tơnguh gơguh lơh sa tàm nam 2026 mờ  jơh gùt tơngai tơnơ̆ in mờ jơnau kờñ dờng rlau mờ bol hi pin dờn là, mờ ală bơta mờ bol he neh mờ gam lơh den cồng nha lơh geh rơp lơh gơtùi jơnau kờñ geh ai tơlik”.

Mờ 88,61% cau ala mat ring bal, mho do, Quôk hội ring bal Jơnau lơh nền tàm pơrjum bè kờp dŭ tă dơ̆ ngui kes priă dà lơgar nam 2026. Jat hơ̆, jơnau lơh nền ring bal kờp dŭ tă dơ̆ ngui kes priă dà lơgar nam 2026 mờ khà rề dia là rlau 2 tơlak 500 rbô tơmàn đong. Kờp jơh tă dơ̆ ngui kes priă dà lơgar là rlau 3 tơlak tơmàn đong, uă ngan là nàng bơ tơl ai ală càr, ƀòn dờng in gàr niam lam lơh tă tơm priă nhai bơh sơn rờp là 2 tơlak 340 rbô đong dùl nhai.

Dùl broă ndai kung geh ală cau ala mat Quôk hội mờ cau tĕ khà gùt lơgar sền gròi ngan, hơ̆ là broă live stream tac phan. Tŭ ai jơnau đơs bè Rơndap lơh adat kă bro phan tàm điện tử, ală cau ala mat đơs, do là dùl adat kuơmàng ngan, ờ mìng tam gơl broă lơh tac blơi tàm internet mờ gam là bơnàng jă phan bơna bơh rài lơh sa sồ dà lơgar dê. Cau ala mat mò Hoàng Thị Thanh Thúy, Mpồl càr Tây Ninh đơs là, bulah jơnau rơcang cih adat boh lam cih kơnòl bơh cau live stream tac phan dê mơya kung gam uă bơta ờ niam bè: ờ hềt geh mpồl gròi sền lài mờ tŭ yal tơnggit tac ală phan lơh gơ rềng tus pràn kơldang să jan, tŭ tơngai prap gàr jơnau tơnggit lơyah, ờ hềt cih loh kơnòl gơ rềng bal tŭ yal tơnggit jơnau tìs: “Nàng kờn jơnau rơcang cih dipal rlau mờ bơta geh ngan gam gơlik geh mhar ngan bơh kă bro phan bơh live stream dê, sồr pal sền sơ wì, bơ tơl mpồl gròi sền lài mờ tŭ pờ tơlik tơn gơ wèt mờ ală dơ̆ live stream yal tơnggit bơta kuơ is ồn gơ wèt mờ phan bơna lơh gơ rềng tus pràn kơldang să jan; lơh loh kơnòl gơ rềng bal bơh cau live stream dê dilah yal tơnggit jơnau sơrlèt ir halà tìs pơndrờm mờ sră pơ àr phan bơna; rề ơnàng tŭ tơngai prap gàr jơnau tơnggit live stream; bơ tơl kơnòl loh làng ală bơta pal geh nàng live stream, gròi sền jơnau đơs tă pơgồp, seeding ờ ngan mờ geh broă lơh nàng tơngkah lài tŭ git gŏ khà cau sền uă nisơna”.

Mờ 15 tơlak nă cau dờng bal mờ điện thoại ngac ngar, mơya jơnau rơcang cih adat boh lam den ờ hềt geh jơnau cih is ồn nàng sền gàr gơnoar kuơ mờ bơta niam ờdo ờdă bơh kơnòm dềt dê tàm kă bro phan tàm điện tử. Den tàng, cau ala mat mò Nguyễn Thị Việt Nga, mpồl ƀòn dờng Hải Phòng sồr: “Tŭ mờ sền gŏ live stream geh tơngume ờ di mờ bơhiàn ờs mờng bè niam chài, jơnau cih bơh adat boh lam dê lơh aniai tus kơnòm dềt den kờñ pal geh mpồl yal jơnau pơgồp bal đah măi mok sồ mờ anih lơh broă atbồ nàng jùt mhar mơ ală tơngume hơ̆”.

Lơh loh bơta do, Phó Thủ tướng ồng Bùi Thanh Sơn pà git: “Jơnau rơcang cih adat boh lam tŭ do kung neh lơh ngan tơrgùm ală tơngume mờ bol he gơtùi atbồ niam cau ngui kung bè cau tờm ngui măi mok sồ nàng kă bro phan tàm điện tử. Bơdìh hơ̆ tai, adat boh lam kung neh cih loh kơnòl bơh cau live stream mờ cau tac dê. Ngai do, bol hi rơp pơn jat tai cih dờp jơnau đơs bơh ală cau ala mat dê, nàng sồr anih cih gơs pơn jat tai bơ tơl, lơh sir tơngume do, ngan là broă sền gàr gơnoar kuơ kơnòm dềt”.