Đơs tàm dơ̆ tìp măt, Củ tịc Quôk hội Vương Đình Huệ đơs là, Quôk hội neh geh dồ nam cồng nha ngan bal mờ 10 broă lơh pơnrơ ngan neh geh sră ƀăo săc rwah. Kwơmàng tàm ală ngai lơh broă bơh sơnrờp nam 2024 dê, Quôk hội neh bơyai lơh geh cồng nha dơ̆ pơrjum nisơna dơ̆ 05, ring bal uă tơngume kwơmàng, ngan là ring bal Adat Ù tiah (tam gơl) mờ Adat Ală mpồl ai càn priă (tam gơl), geh ală cau jak gah broă do, làng bol, mpồl lơh sa kă bro tàm lơgar mờ bơdìh lơgar đơs niam ngan. Mờ lài tŭ ơm rlô sa tềp bơhiàn yau dà lơgar dê tơn, Củ tịc Quôk hội neh kĭ cơng tàng ngan ngồn 2 adat kwơmàng do.

Ala măt Đảng đoàn Quôk hội, Ủy ƀan Thường vụ Quôk hội, Củ tịc Quôk hội chờ hờp mờ jờng rơ ală kwang bàng Quôk hội, ală anih lơh broă Quôk hội dê, ală anih lơh broă bơh Ủy ƀan Thường vụ Quôk hội dê, kwang bàng, kông cưk, viên cưk mờ cau lơh broă Cơldŭ Quôk hội dê neh jơh nùs jơh tồr, duh hồl, bơceh lơh mờ neh lơh geh ală cồng nha jak ngan bơh nam 2023 dê. Đơs wih đơs wơl, nam 2024 là dồ nam krơi is ngan, là nam ală gah lơh broă, ală kâp, ală anih lơh broă, ală tiah ndrờm pal tơnguh mhar nàng lơh jơh ală broă jàu bè lơh sa- mpồl bơtiàn bơh jơh tơngai lơh broă dê, Củ tịc Quôk hội đơs là, Quôk hội gơtùi lơm pơñiờ să bè ală cồng nha neh lơh geh tàm nam 2023, mơya kung ờ gŏ ai gơnoar hưh nùs, ờ rơcăng ngăc. Digơlan bơnah broă lơh bơh nam do dê dờng ngan, bơdìh mờ ală broă lơh sùm tàm broă lơh adat boh lam, jăt sền dờng ngan rlau jơh, lơh nền ală broă kwơmàng dà lơgar dê mờ ală broă lơh ndai, Cơldŭ lơh broă Quôk hội dê gam pal jơh nùs rơcăng lài nàng wèt tus tơngkah kir sơnrai 80 nam ngai Tĕ khà pồ geh Quôk hội bơh sơnrờp. Den tàng bè hơ̆, Củ tịc Quôk hội Vương Đình Huệ, tơngkah: Añ neh đơs uă dơ̆ ngan là tŭ jiơ là mpồl cau. Tài bè hơ̆, bol he pal sơnđờm lơh broă bơh ală ngai sơnrờp nhai bồ nam tơn mờ jăt ală broă rơndăp lơh broă lơh broă neh ai tơlik. Bol he pơn jăt tai pơnđơl pràn nàng wèt tus dồ Quôk hội ngai sơlơ lơh broă mờng chài, rề ơnàng làng bol lơh tờm, tơnguh bơta gơnoar adat boh lam, mơya sùm jăt sền nhơm tă rài kis dê nàng lơh geh jơnau kờñ tàm rài kis geh ngan, sền gàr broă lơh bơh Quôk hội dê tài bơh jơnau kờñ dờng màng ngan rlau jơh là bơta kwơ dà lơgar mờ jơi bơtiàn. Jơh ală gùng dà broă lơh nền bơh Quôk hội dê mùl màl ai làng bol mờ mpồl lơh sa kă bro ơn tàm anih tờm. Mờ nùs nhơm tam gơl ală bơta ờ bè ờs gơgơs bè ờs, di tŭ, gàr niam ai jơnau kờñ bơceh lơh dà lơgar bơtàu tơnguh mhar, kơ̆ kơl jăp mờ mŭt gơrờm bal mờ dunia.

Củ tịc Quôk hội tơngkah ală anih lơh broă Quôk hội dê, ală Ƀan bơh Ủy ƀan Thường vụ Quôk hội dê mờ kwang bàng, kông cưk, viên cưk, cau lơh broă bơh Cơldŭ lơh broă Quôk hội dê lơh jăt nùs nhơm sồr lơh bơh Tổng Ƀí thư Nguyễn Phú Trọng dê tàm dơ̆ tìp măt mờ nting bơr chờ hờp sa tềp ală kwang bàng đơng lam bồ, kwang bàng đơng lam bồ Đảng, Dà lơgar lài do, là: “Nam 2023 neh tam klăc rao, nam 2024 sơlơ pal tam klăc rlau tai. Nam 2023 neh lơh geh cồng nha rao, nam 2024 pal cồng nha rlau tai”.

Di dơ̆ bồ sơnam pa Giáp Thìn, Củ tịc Quôk hội Vương Đình Huệ nting bơr kơ̆p kờñ ală kwang bàng Quôk hội, ală anih lơh broă Quôk hội dê, ală anih lơh broă bơh Ủy ƀan Thường vụ Quôk hội mờ kwang bàng, kông cưk, viên cưk, cau lơh broă Cơldŭ lơh broă Quôk hội dê geh dồ nam pa Giáp Thìn pas sơm bơtàu tơnguh.

Lài hơ̆, Kwang cau gơnoar cih dờng, Kwang ătbồ Cơldŭ lơh broă Quôk hội Bùi Văn Cường neh yal cồng nha lơh broă tàm dơ̆ sa tềp bơhiàn yau dà lơgar dê nam Giáp Thìn 2024. Jăt hơ̆, Ủy ƀan Thường vụ Quôk hội neh mblàng yal, sồr Duh broă sùm Mpồl duh broă Jơi bơtiàn, ală anih lơh broă gơ wèt Ủy ƀan Thường vụ Quôk hội lơh jăt kràñ Jơnau sồr sồ 26 bơh Ƀan Ƀí thư, Jơnau sồr sồ 30 bơh Thủ tướng Cíñ phủ dê mơkung tơngkah lơh jăt niam ală broă dong kờl sền gàr niam rài kis mpồl bơtiàn, dong kờl trang gàr rài kis phan bơna mờ nùs nhơm bơh kwang bàng, kông cưk, viên cưk, cau lơh broă, ală hìu bơnhă cíñ săc, cau geh rài kis kal ke in.

Ală broă lơh lòt còp, nting bơr sa tềp bơh Củ tịc Quôk hội, ală Phó Củ tịc Quôk hội, ală kwang bàng Thường vụ Quôk hội dê jăt bơta jàu kơnòl, pal lơh niam, lơngăp lơngai, tềm pềr, geh cồng nha mờ dipal mờ bơta geh ngan.

Ală anih lơh broă Quôk hội dê, anih lơh broă gơ wèt Ủy ƀan Thường vụ Quôk hội neh jơh nùs sơrbac mhar ai lơh jăt ală broă lơh, broă rơndăp lơh lam lơh broă lơh nam 2024 pal lơh di tơngai.