Tus bal mờ đơng lam dơ̆ tìp mat ală rơnàng cau ala mat Quôk hội bơh ală tŭ tơngai, Tổng Ƀí thư ồng Tô Lâm đơs nền, 80 nam sền wơl, gùng bơtàu tơnguh bơh Quôk hội Việt Nam dê là dùl gùng kơ̆ dơn, bơceh lơh mờ ngai sơlơ tam gơl pa. Bơh dơ̆ tĕ khà kah yau ngai 06/01/1946, dơ̆ tĕ khà làng bol lơh tờm sơn rờp tàm kah yau lơgar he dê, Quôk hội neh lơh nền ală broă dờng màng bơh dà lơgar dê; ring bal Sơnua boh lam, lơh gơs bơnàng jă adat boh lam ai dùl dà lơgar lơngăp lơngai is in, lơh nền gùng dà, broă lơh dờng; jat sền dờng ngan rlau jơh broă lơh bơh Mpồl lơh broă sră pơ àr gơnoar atbồ dê; mờ kung ring bal broă lơh mờ lơgar ndai Nghị viện, pơgồp bơnah tơnguh gơnoar broă bơh dà lơgar dê tàm muh mat ală lơgar: “Bol he jờng rơ Quôk hội ờ di mìng bè dùl mpồl lơh broă gơnoar atbồ dà lơgar dờng ngan rlau jơh, mờ lài ngan là dùl Hìu bal bơh ală cau ala mat làng bol dê – neh geh tŭ àñ ơnòng tềng pơnì kơnòl broă kơn jơ̆ kơn jut mờ dờng màng ngan, iat làng bol, đơs jơnau đơs làng bol dê, sền gàr bơta kuơ dipal làng bol dê”.

Yal tus rlau 2 rbô 200 nă cau ala mat tus bal pơrjum bè bàr pe cồng nha kung bè bàr pe broă rơndap lơh bơtàu tơnguh dà lơgar tàm tơngai tus, kuơmàng là broă pơnđơl pràn lơh geh cồng nha Jơnau lơh nền tàm Pơrjum dờng cau ala mat Đảng gùt lơgar dơ̆ XIII mờ rơcang gơ in nàng bơyai lơh geh cồng nha Pơrjum dờng cau ala mat gùt lơgar dơ̆ XIV bơh Đảng dê, gàr lam lơh geh cồng nha 2 jơnau kờñ 100 nam mờ Đảng neh ai tơlik. Tổng Ƀí thư đơs loh bè 3 broă rơndap lơh mùl màl là gàr gơnoar lơh tờm, tơl làm kơnhoàl ù tiah, sền gàr ring lơngai, lơngăp lơngai, rơndap tap sèng mpồl bơtiàn; bơtàu tơnguh dà lơgar mhar mờ kơ̆ kơljap jŏ jòng sùm mờ ngai sơlơ gơguh niam, drơng jơnau kờñ ngai sơlơ uă bè rài kis phan bơna, nùs nhơm bơh làng bol dê. Do kung là jơnau kờñ dờng ngan rlau jơh bơh Đảng, bơh Củ nghĩa sàh hội dê. Bè rơndap tap sèng mpồl lơh broă bơh ală anih lơh broă cíñ trị dê, rơndap wơl ù tiah lơh broă sră pơ àr gơnoar atbồ bơh dà lơgar dê nàng bơtàu tơnguh, Tổng Ƀí thư ồng Tô Lâm pà git: “Bơta lơh broă bơh ală mpồl bal, anih lơh broă, mpồl lơh broă dê tàm ală anih lơh broă cíñ trị 3 kâp, ngan là kâp sàh lơh broă ndrờm bal, lơh broă niam ngan, gơtùi drơng jơnau kờñ bơh làng bol dê, drơng làng bol in niam rlau, ƀuơn rlau. Bơta gơ rềng đah dà lơgar, kâp càr mờ kâp sàh gam rơhời lơh gơs tàm dùl mpồl lơh broă sră pơ àr gơnoar atbồ pa. Broă rơndap lơh, rơndap tap sèng wơl mpồl lơh broă sră pơ àr gơnoar atbồ neh dong kơnòl broă đơng lam mpồl bơtiàn, đơng lam ƀòn lơgar geh cồng nha rlau, ngac ngar rlau, tam gơl wơl sră pơ àr gơnoar atbồ pràn kơldang mờ jrô ơnàng, di mờ bơta geh ngan rlau, làng bol geh drơng mhar rlau, niam rlau”.

Tàm dơ̆ tìp mat, Củ tịc Quôk hội ồng Trần Thanh Mẫn jơh nùs ưn ngài Đảng dà lơgar, Ƀộ Cíñ trị, Ƀan Ƀí thư ală tơngai lơh broă; jơh nùs ưn ngài bè bơta tam klac bal, pin dờn, lòt bal, dong kờl ngan ngồn, di tŭ, geh cồng nha bơh Cíñ phủ, ală anih lơh broă sền gàr adat boh lam, Mặt trận dà lơgar, ală mpồl, ƀộ, gah lơh broă, ală càr, ƀòn dờng mờ làng bol gùt lơgar; ai tơnggŏ nùs nhơm ki ngàm bè ală tă pơgồp kuơmàng bơh ală cau ala mat Quôk hội dê bơh ală tŭ tơngai. Củ tịc Quôk hội ồng Trần Thanh Mẫn kơp kờñ, ală cau ala mat Quôk hội sùm sền gàr bơta gơ rềng nền nòn, tơrbŏ bal đềt mềr mờ Đảng, Dà lơgar mờ Làng bol: “Pơn jat tai tă pơgồp ai Quôk hội in, ai broă lơh kac màng dờng màng bơh Đảng, jơi bơtiàn he dê in, bè Tổng Ƀí thư ồng Tô Lâm neh geh tŭ đơs “Sền wơl nàng lòt tus – kah ưn ngài nàng cih dờp mờ cơnđuà tai”. Mut tàm tŭ tơngai pa, dà lơgar he gam ơm tềng đap ală tŭ niam mờ bơta ƀuơn dờng, mơya kung uă ngan sơl kal ke, bơta lòng. Quôk hội rơp pơn jat tai lam lơh jat ală jơnau lơh nền bơh Đảng dê, iat jơnau đơs bơh cau tĕ khà, làng bol mờ mpồl lơh sa kă bro dê; lòt bal mờ Cíñ phủ, pơgồp bal jơh nùs mờ ală anih lơh broă geh gơ rềng, lam lơh geh cồng nha broă lơh bơt bơtàu adat boh lam, jat sền dờng ngan rlau jơh, lơh nền ală broă kuơmàng bơh dà lơgar dê. Đòm jat nùs nhơm tam gơl pa, bơceh lơh, làng bol lơh tờm, tam klac bal, lơh gơs gùng dà broă lơh di tŭ ală Jơnau lơh nền tàm pơrjum bơh Đảng dê, ai ală jơnau lơh nền bơh Đảng dê ngui tàm ngan ngồn rài kis”.

Di dơ̆ do, Củ tịc Quôk hội ồng Trần Thanh Mẫn neh jàu Gai lòng kir sơnrai “Tài broă lơh Quôk hội Việt Nam” pà Tổng Ƀí thư ồng Tô Lâm, Củ tịc lơgar ồng Lương Cường, Thủ tướng ồng Phạm Minh Chính mờ ală kwang đơng lam Đảng, dà lơgar, Cíñ phủ, Mặt trận dà lơgar Việt Nam lài do mờ đơng lam Quôk hội kung jàu gai lòng kir sơnrai “Tài broă lơh Quôk hội Việt Nam” pà ală cau ala mat Quôk hội ală khoă in.