Hìu pa ơnàng rlau 50 thơk vuông bơh hìu bơnhă bi Dương Thị Thành dê, sàh Ia Phí, càr Gia Lai gam mŭt tàm tơngai lơh sir. Bèp bi dê là cau lơh broă lòt tam lơh mờ cau sò tơm gơtìp bơtờp sơnơm khih hoá họk, ai să tờm bi cèng tàm să jơnau gơlời wơl sơnơm khih dioxin mờ bơta gơ aniai khun ntìng gòr ngkời bơh mè deh. Sùm tàm rlau 20 nam do, pe nă mè mờ kòn kis tàm hìu neh ờ gam niam tai. Tus tŭ do, kơnờm bơta dong kờl bơh Dà lơgar dê bal mờ ală tơngai lơh broă bơh kwang bàng, cau ling Mpồl ling dờng 17, Trung đoàn 48, Sư đoàn 320, Ling mpồl 34 dê, jơnau kơ̆p kờñ bè dồ nơm hìu kơ̆ kơl jăp gam rơhời gơgơs ngan ngồn tàm rài kis. Bi Dương Thị Thành ngoh rơngăc yal:

"Cau ling rê lơh hìu ai ală cau làng bol kal ke bè hìu bơnhă añ dê in bal mờ kơ̆p gơn geh dồ nơm hìu ơm tơnơ̆ do. Hìu bơnhă brờn ngan, ưn ngài Đảng ủy mờ gơnoar ătbồ neh dong kờl ai mè kòn añ dê in nàng añ mờ kòn klau geh đau dồ rài tơnơ̆ do”.

Tàm sàh Ia Ly, hìu bơnhă ồng Nguyễn Văn Tân kung gam ờ ru ngan ơm kơ̆p ngai ntrờn mŭt tàm hìu pa. Là cau lơh broă tam lơh mờ cau sò tơm gơtìp bơtờp sơnơm khih hoá họk, ală kòn ồng dê kung cèng tàm să jơnau gơlời wơl den tàng ờ tơl pràn lơh broă njơ̆. Hìu yau lơh bơh 30 nam lài neh ờ gam niam tai uă ngan mơya uă nam do hìu bơnhă ờ tơl priă jền lơh niam wơl. Tŭ do, mờ bơta tơrgùm tê bal bơh Dà lơgar dê, cau ling, cau pròc mhàm mờ cau ƀòn bal dê, hìu pa gam geh lơh jal mhar lơh sir lài mờ kàl mìu. Ồng Nguyễn Văn Tân ngoh rơngăc pà gĭt:

"Hìu añ dê lơh bơh nam 1996 den tàng neh ờ gam niam tai. Kung bơtuah ngan sơl geh Đảng, Dà lơgar mờ đah mpồl ling dong kờl lơh ai hìu bơnhă añ in dồ nơm hìu niam tre rlau. Ưn ngài Đảng, gơnoar ătbồ mờ mpồl ling neh dong hìu bơnhă geh hìu drơng mờ mìu nhàc càl rbŭt dờng, nàng gĭt là ờ cau lơi gơtìp lời ơm wơl hờ ngkời”.

Bơh ngkời bơta chờ bơh ală hìu bơnhă dê là ală ngai lơh broă ờ ngòt tơngai duh mìu sa bơh kwang bàng, cau ling mpồl crong dê. Bơh tă sờr hìu đam yau, tờ jrong hìu, pơnring bơnàng ù, jun pơndiang phan lơh hìu tus tơngguh kơlik, tuh ƀê tông…jơh ală ndrờm geh ală cau ling să tờm tơn lơh, pơgồp bơnah gơmù uă ngan priă tă apah cau lơh ai ală hìu bơnhă in. Thiếu tá Phạm Văn Tạo, Lam bồ Mpồl ling dờng 17, pà gĭt:

"Lơh jăt broă lơh tơn jơh hìu ing, hìu ồm sèt ñhăt dà mìu ai cau lòt tam lơh mờ cau sò tơm geh kòn gơtìp bơtờp sơnơm khih hóa họk in, Trung đoàn 48 jàu dồ nơm hìu geh 7 nă kwang bàng, cau ling să tờm tơn lơh. Bol hi jơh nùs lơh ngan lơh sir gờñ rlau tơngai kờp dŭ, sơrlèt jơh ală kal ke nàng lơh gơs niam kơnòl broă”.

Lơh jăt jơnau lơh nền bơh Chính phủ dê bè dong kờl tơn jơh hìu ing, hìu ồm sèt ñhăt dà mìu ai kòn deh bơh cau lơh broă tam lơh mờ cau sò tơm gơtìp bơtờp sơnơm khih hóa họk in, jơh gùt càr Gia Lai geh 79 hìu geh dong kờl lơh pa mờ lơh niam wơl hìu ơm. Tơl nơm hìu gam rơhời lơh sir là bơtơl tai dồ nơm hìu geh lơh gơs bơh nùs nđàc ling klàng mờ làng bol dê. Ồng Võ Lê Xuân Thiện, Chủ tịch Anih duh broă Làng bol sàh Mang Yang, pà gĭt, bơh broă dong kờl lơh hìu ơm, ală ƀòn lơgar kung gĭt nền do là broă sơnđờm lơh nàng ală hìu bơnhă dờp bơta dong kờl mpồl bơtiàn dê kơ̆ kơl jăp rài kis, rơhời bơtàu tơngguh lơh sa tơnơ̆ tŭ geh tiah ơm kơ̆ kơnhăp.

"Tàm ù tiah sàh Mang Yang tơnơ̆ tơmŭt bal, tŭ do geh 169 hìu bơnhă dờp bơta dong kờl mpồl bơtiàn dê, geh cau geh dà kơlhề mờ kăc màng. Tus jiơ do, ală hìu bơnhă sền bal neh geh hìu ơm kơ̆ kơl jăp. Nam 2026, ƀòn lơgar gam pơgồp bal lơh 2 nơm hìu jăt broă lơh bơh Gah Đơng lam Ling klàng càr. Tơnơ̆ tŭ làng bol geh hìu ơm kơ̆ kơl jăp, sàh rơ̆p pơn jăt tai sền gròi dong kờl bơtàu tơngguh lơh sa, tơngguh uă rài kis”.

Ngan bơh bơta sền gròi hơ̆, bơta chờ hờp kơ̆ anih ơm gam mpờl gŏ tàm uă hìu bơnhă. Tàm sàh Mang Yang, hìu pa ơnàng 65 thơk vuông  bơh bi Nguyễn Văn Dũng dê là kòn bơh cau lơh broă lòt tam lơh mờ cau sò tơm gơtìp bơtờp sơnơm khih hoá họk kung gam lơh sir sơl. Mờ hìu bơnhă 5 nă cau bơh bi dê, hơ̆ ờ mìng là tiah dòp mìu jơm tơngai lơm mờ gam là anih kơldìng nàng ùr bơklau bi iang nùs lơh broă, ală kòn geh bơta bơsram sră niam rlau.

"Ùr bơklau oh gĭt ưn ngài ngan tŭ Đảng, Dà lơgar mờ gơnoar ătbồ ƀòn lơgar neh dong kờl bơ̆t bơtàu ai hìu bơnhă in hìu nàng ơm, iang nùs lơh broă lơh sa mờ ală kòn geh hìu nàng pơnđơl bơsram sră, gơgơs cau làng bol niam tơnơ̆ do drơng ai dà lơgar, ai mpồl bơtiàn in”.

Rài tam lơh mờ cau sò tơm neh lòt ngài mơya ală jơnau gơlời wơl kung gam geh sùm tàm rài kis bơh uă hìu bơnhă dê. Tài bè hơ̆, tơl nơm hìu pa geh bơtàu gơs ờ mìng dong làng bol kơnhăp anih ơm mờ gam là cơng tàng tơnggŏ loh làng ngan ai jơnau pal jăt “Hùc dà kah tô dà”. Bơta kah rơngal wơl gam geh sùm tàm tơl nơm hìu, tơl rài kis geh bơtơl tai bơta pin dờn mờ gơn kơnờm.