Tàm pơrjum, Củ tịc Quôk hội ồng Trần Thanh Mẫn đơs loh, pơrjum dờng cau ala mat Đảng ƀộ Quôk hội dơ̆ 1 geh lơh tàm tŭ tơngai dà lơgar he pa mut tàm tơngai bơtàu tơnguh pa, tềng đap jơnau sồr ngai sơlơ uă, tơlik gơnoar broă, kơnòl broă dờng ngan gơ wèt mờ Đảng ủy Quôk hội, pơgồp bơnah lơh gơlik bơta gơn kơnờm bơtàu tơnguh pràn kơldang tàm broă lơh bơt bơtàu mờ sền gàr dà lơgar: “Do ờ mìng là tŭ nàng sền sơl, sền sơ wì song dơpă, tơl làm ală cồng nha, bơta ờ niam, jơnau bơh tài gơbàn ờ niam, jơnau bơsram mờng chài bơh tơngai lơh broă lài dê mờ gam ai tơlik lài broă rơndap lơh, jơnau kờñ kuơmàng, gùng dà bơtàu tơnguh mờ kơnòl broă tờm tàm tơngai lơh broă bơh nam 2025 tus nam 2030; mờ kung sac rơ wah, pồ tơl mpồl kwang bàng đơng lam geh tơl nùs nhơm, pràn jak, bồ tơngoh nàng lơh kơnòl bơh Đảng, Quôk hội mờ làng bol dê jàu”.

Tàm pơrjum, ală kwang geh jơng tàm Mpồl Lơh kơnòl broă sùm Đảng ủy Quôk hội neh ai jơnau đơs mùl màl bè broă rơcang sră nggal pơrjum dờng, ală broă lơh mblàng yal, wă nac, drơng broă, lam lơh broă dong kờl mờ broă lơh sền sơ wì, jat sền.

Củ tịc Quôk hội ồng Trần Thanh Mẫn đơs niam ală mpồl dềt, ală mpồl Đảng, Anih duh broă sền sơ wì mờ Cơldŭ lơh broă Đảng ủy neh crăp rơcang, jơh nùs lam lơh kơnòl broă, gàr bơta niam, tơngai pơrgon ală tơngume rơcang lài pơrjum dờng in; broă lơh kwang bàng geh lam lơh di jơnau sồr, di broă rơndap lơh, gàr bơta ring bal jơnau đơs, song dơpă, di tŭ pồ tơl ală gơnoar broă, kâp ủy. Sồr lơh kơnòl broă mpồl màl ai ală kwang geh jơng tàm Mpồl Lơh kơnòl broă sùm Đảng ủy sồr lơh pơrjum dờng ală đảng ƀộ gơ wèt. 

Sră nggal pơrjum dờng neh bơt bơtàu ală jơnau rơcang cih, lam lơh ai jơnau đơs làm uă, cih dờp, lơh sir jat tơngai hơ pơrgon. Tơngume, jơnau đơs kờñ pơyua tàm pơrjum dờng bơh sơn rờp lơh geh bơta ring bal uă. Broă lơh sền sơ wì, jat sền geh sền gròi, gàr ală broă rơndap lơh bè jơnau sồr cíñ trị, sră nggal, broă lơh tơn pồ ală gơnoar broă tờm. 

Bè broă lơh bơt bơtàu sră nggal pơrjum dờng, Củ tịc Quôk hội jàu Mpồl dềt cih sră nggal cih dờp wil tơl ală jơnau đơs tă pơgồp bơh ală ci ƀộ, đảng ƀộ gơ wèt, cau geh jơnau git wă jrô, đảng viên, cau lơh broă. Ală jơnau yal pal đơs di bơta geh ngan, đơs song dơpă, tơl làm, đơs di ngan cồng nha neh lơh geh, bơta niam, bơta ờ niam tàm tơngai lơh broă lài, jơnau bơh tài gơlik geh, jơnau bơsram mờng chài ai tơnggŏ loh làng gùng dà, kơnòl broă tờm mờ ai tơlik broă lơh ngan ngồn gơtùi lơh geh cồng nha, cèng bơta tam gơl pràn tàm tơngai lơh broă tus: “Ală sră nggal Pơrjum dờng pal lơyah, geh bơta niam, ƀuơn cribơyai, lơh gơlik bơta ring bal uă tàm pơrjum dờng. Tàm hơ̆, jơnau yal cíñ trị là jơnau yal tờm, pal jat jơnau sồr lơh, jơnau lơh nền, broă rơndap lơh dờng tàm ală jơnau rơcang cih sră nggal pơrjum dờng dơ̆ XIV bơh Đảng dê; Jơnau yal sền tìs di bơh kâp ủy dê pal geh bơta crăp rơcang drơng wơl, tơnguh nùs nhơm sền is tìs di mờ sền tìs di mờ git loh kơnòl broă bơh mpồl bal, cau nă să is dê bè cồng nha broă lơh đơng lam, sồr lơh bơh Đảng ủy Quôk hội dê. Sră nggal pơrjum pal lơh jat tàm gùng dà ai tơlik lài bơh Ƀộ Cíñ trị, Ƀan Ƀí thư dà lơgar dê là bơta bal, mơya bơta is ồn bơh Quôk hội dê bơt bơtàu adat boh lam, jat sền mờ lơh nền ală broă kuơmàng bơh dà lơgar dê”.

Bè broă lơh kwang bàng, Củ tịc Quôk hội jàu jơnau sồr pơn jat tai kờp sền nền nòn, gàr lam lơh di jơnau sồr bơh Đảng dê, lơh niam broă sền sơ wì kwang bàng, broă yal tơnggit kwang bàng Mpồl đơng lam khoă pa gàr bơta ring bal, song dơpă, loh làng, geh bơta tàm pơn jat, tam gơl pa, sền dờng màng bơta niam, geh khà mờ rơndap tap sèng dipal, kâp ủy tơngai lơh broă pa kờñ pal pơn rơ ngan bè nùs nhơm cíñ trị, bồ tơngoh jak, huềng nùs, mờng kwèng rài kis, pràn jak, bơngă pin dờn. Mờ kung lơh niam broă lơh mblàng yal, lơh gơlik bơta ring bal, tam klac tàm dơlam is, gàr kơ̆ bơta duh rơngòt bơh Đảng dê.

Củ tịc Quôk hội pin dờn là, mờ bơta tam klac bal, lơh ngan uă mờ nùs nhơm geh kơnòl bơh jơh gùt mpồl kwang bàng, đảng viên dê, broă rơcang pơrjum dờng cau ala mat Đảng ƀộ Quôk hội dơ̆ 1 rơp geh lơh di tơngai pơrgon, gàr bơta niam, pơgồp bơnah bơyai lơh geh cồng nha pơrjum dờng đơs is mờ Pơrjum dờng Đảng dơ̆ 14.