Cribơyai bè Rơndap broă lơh Adat Ròng kòn ròng (tam gơl), ală cau ala mat Quốc hội sồr lơh sir gùng dà, broă lơh sền gàr kơnòm dềt lài mờ tŭ, tàm tŭ mờ tơnơ̆ tŭ geh dờp lơh kòn ròng. Tàm hơ̆, kờñ pal gàr bơta ring bal ngan ngồn, lơh loh jơnau gơ rềng adat boh lam, is ồn gơ wèt mờ ală cau dờp kòn ròng geh bơta lơgar ndai. Cau ala mat Cil Bri, Mpồl càr Lâm Đồng sồr broă pơlam, mblàng lơh loh mờ ai jơnau đơs tàm tŭ pà, dờp kòn ròng pal geh lơh mờ dà đơs mờ broă lơh dipal: “Añ sồr bơtơl tàm sèng 3, bơta 20 jơnau pal jat pơlam, mblàng lơh loh mờ ai jơnau đơs pal mờ dà đơs, broă lơh mờ cau geh ai jơnau đơs gơtùi wă, dipal mờ sơnam, bơta dờng pràn kơnòm dềt dê, geh bơta dong kờl dà đơs bè nùs tồr tŭ pal geh. Do là bơta pal geh tờm ngan bơh bơta ring bal is dê”.

Jat cau ala mat Nguyễn Vũ Trung, Mpồl ƀòn dờng Hồ Chí Minh kờñ pal pơn jat tai lơh sir broă lơh gròi sền, git gŏ jơnau pơhìn bơh lài mờ tŭ jàu dờp kơnòm dềt tơn, ngan là tŭ kơnòm dềt geh tơlik bơh tiah ơm kis, nàng kờñ kơryan broă sơmờm sră pơ àr dờp kòn ròng nàng tac bro, tàm jàu tìs adat boh lam halà sơgràm aniai kơnòm dềt: “Añ sồr bơtơl loh tàm Bơta 5 bè ală broă lơh kơryan ờ ai lơh, là ờ ai sơmờm broă pà, dờp kòn ròng nàng rơ wah, tàm jàu wơl, dờp, jun pơndiang halà lam kơnòm dềt lòt nàng kờñ tac bro kòn bơnus, rồn bơklơn halà ai mô, phan tàm să jan, ờ ai broă pơgồp bal broă dờp kòn ròng mờ jơnau sồr ai is, ai, bơkiar mô, phan tàm să jan halà khat dùl bơta ƀư tê bè lơh sơnơm lơi tìs adat boh lam. Bơta pal geh bơh cau dờp kòn ròng dê kờñ pal cih loh”.

Gơ wèt mờ ròng kòn ròng geh bơta lơgar ndai, cau ala mat Lê Thị Ngọc Linh, Mpồl Cà Mau đơs sùm jơnau sồr bơt bơtàu gùng dà, broă lơh jat sền mờ bơsong jơnau yal tơnggit loh làng tŭ kơnòm dềt geh tềl tơnggŏ gơtìp pù pờng, sơgràm aniai, sang tĕ halà ờ geh gàr tơl ală bơta pal geh bè ròng siam: “Kờñ pal git loh mpồl dờp jơnau yal tơnggit, kơnòl pơgồp bal đah anih atbồ dà lơgar bè kòn ròng, anih lơh broă ala mat lơgar Việt Nam tàm lơgar ndai mờ mpồl lơh broă bè kòn ròng lơgar ndai. Mờ kung cih halà jàu jơnau sồr mùl màl bè tŭ tơngai yal, kơnòl hơ wơl, jat sền cồng nha bơsong mờ dong kờl sền gàr kơnòm dềt tàm ală tŭ pal geh”.

Tàm dùl bơta adat boh lam ndai, cau ala mat Nguyễn Danh Tú, Mpồl An Giang sồr lơh loh bơta gơ rềng, jơnau gơ lời wơl bơh broă tơn jơh ròng kòn ròng, ngan là broă lơh geh wơl bơta gơ rềng adat boh lam đah mè bèp tờm mờ kòn tờm: “Añ sồr sền swì bơ tơl jơnau cih: Bơta gơ rềng đah mè bèp tờm mờ kòn tờm geh lơh geh wơl kờp bơh tŭ bơta gơ rềng ròng kòn ròng tơn jơh. Bè hơ̆ den bulah kòn ròng neh tàu dờng halà ờ hềt tàu dờng, tŭ bơta gơ rềng ròng kòn ròng tơn jơh den broă git nền mè bèp bơh kòn ròng dê là mè bèp tờm cau hơ̆ dê là dùl bơta gơ rềng adat boh lam kuơmàng ngan bơh broă tơn jơh ròng kòn ròng dê. Dơ̆ 2 là tŭ tơn jơh ròng kòn ròng, anih cah rơña lơh nền jàu mè bèp tờm halà anih lơh broă, mpồl ndai in ròng siam, bơto bơtê, tàm bơta dilah kòn ròng ờ jai lơh broă. Bulah bè hơ̆ dilah kòn ròng neh tàu dờng, bulah ờ pràn lơh broă mơya geh jơtài nàng ròng is să tờm he dê den ờ duh pal jàu anih lơh broă, mpồl ndai in ròng siam, bơto bơtê”.

Mblàng lơh loh bè ală tơngume gơ rềng tus Adat Ròng kòn ròng (tam gơl), Ƀộ trưởng Ƀộ sền gàr adat boh lam ồng Hoàng Thanh Tùng đơs nền, Rơndap lơh adat pơn jat tai ai tơnggŏ nùs nhơm sền gàr uă ngan rlau jơh gơnoar kuơ mờ bơta kuơ niam ngan rlau jơh kơnòm dềt in. Ală broă lơh gròi sền nền nòn kung geh crơn ggơs nàng rơcang lài kơryan bơta ờ niam, kơryan bơta sơmờm ai priă mờ ờ ndrờm bal bơta kuơ. Gơ wèt mờ ală bơta sang tĕ halà tơn jơh ròng kòn ròng, ồng Hoàng Thanh Tùng đơs loh: ​​​​​​​“Tàm sèng 2, Bơta 23 neh cih mùl màl ngan gơ rềng tus bơta dilah broă sang tĕ jơnau lơh nền ròng kòn ròng lơh gơ lam tus bơta gơ rềng kơn jơ̆ tus bơta kuơ, gơnoar kuơ dipal kơnòm dềt gam là kòn ròng dê rơp pal sền swì mờ kơlôi sơnơng, jòi broă lơh ndai, ờ gŏ di sang tĕ. Gơ rềng tus jơnau gơ lời wơl bơh broă tơn jơh ròng kòn ròng dê den neh cih mùl màl ngan tơl bơta mùl màl den gơnoar kuơ kơnòm dềt dê rơp geh sền swì bè lơi. Tŭ lơi den jàu mè bèp ròng in, tŭ lơi den jàu wơl anih lơh broă, mpồl ndai in”.