Ƀộ trưởng Ƀộ Gùng lòt rê Jun pơndiang ồng Nguyễn Văn Thắng sền dồ êt sră dan bơh Cíñ phủ dê bè gùng dà bơcri priă Rơndăp broă lơh gùng rơndeh ồs lòt mhar tàm gơl gùng đah Tô- đah Jum. Jăt mờ hơ̆, gơl gùng rơndeh ồs lòt mhar sơnđờm tàm ƀòn dờng Hà Nội mờ tơn jơh tàm ƀòn dờng Hồ Chí Minh lòt gan ù tiah 20 càr, ƀòn dờng dê; bơta jòng rlau 1 rbô 540 kơi sồ; kờp jơh priă bơcri rlau 1 tơlak 700 rbô tơmàn đong (pơgăp 67 tơmàn dolar Mỹ). Digơlan sơnđờm mŭt lơh rơndăp broă lơh nam 2027; pơnđơl lơh sir jơh gơl gùng tàm nam 2035. Ai jơnau đơs bè tơngume do, Củ tịc Quôk hội ồng Trần Thanh Mẫn pà gĭt, Ƀộ Cíñ trị, Ƀan Ƀí thư sền gròi ngan tus rơndăp broă lơh gơl gùng rơndeh ồs lòt mhar tàm gơl gùng đah Tô- đah Jum. Ồng Trần Thanh Mẫn, đơs: Dilah lơh geh gùng rơndeh ồs lòt mhar đah Tô- đah Jum do mờ priă bơcri lơh kờp jơh là pơgăp 67 tơmàn dolar Mỹ, dà lơgar bol he rơ̆p geh tơl bơta bơtàu tơngguh. Ờ gŏ di là lơh mơ tơn ờ mờ lơh sir tŭ tơngai 2025, nam 2025. Dilah rŭc lơyah gờñ rlau tai den sơlơ niam. Tŭ do, lơgar bơdìh geh ală rơndăp broă lơh dờng tus nđờ dơ̆ rơndăp broă lơh do mờ cau lam lơh tàm tơngai ờ hềt tus 3 nam. Gơ wèt mờ he den añ sơning là, lơh tam gơl pa wơl sră nggal gơnoar ătbồ den kung là să tờm he, lơh sră nggal gơnoar ătbồ kung bơh să tờm he ai tơlik. Bè hơ̆ pal lơh bè lơi nàng tă bơsong kal ke, gơkòl.

Tơnơ̆ tŭ iăt jơnau yal lùp sền wơl kung bè jơnau yal mblàng lơh loh bơh Cíñ phủ dê, jơnau đơs pơndŭt tơngume do, Phó Củ tịc Quôk hội ồng Nguyễn Đức Hải pà gĭt, Anih duh broă Lơh kơnòl broă sùm Quôk hội ring bal dan mờ Quôk hội sền swì lơh nền gùng dà bơcri priă rơndăp broă lơh gùng rơndeh ồs lòt mhar tàm gơl gùng đah Tô- đah Jum tàm dơ̆ pơrjum dơ̆ 08, Quôk hội khoă XV. Do là rơndăp broă lơh geh broă lơh dờng ờ hềt tŭ lơi geh tàm lơgar he. Tài bè hơ̆, Anih duh broă Lơh kơnòl broă sùm Quôk hội sồr, Cíñ phủ pơn jăt tai kờp sền wơl dồ bă nền nòn nàng kờp dŭ bơh sơnrờp kờp jơh priă bơcri mờ broă rơndăp lơh wăc rùp bơh chờm nàng tềm pềr geh cồng nha, bơtơl jơnau yal loh ală broă rơndăp lơh tàm pơndrờm nàng lơh loh cơng tàng săc rwah đah gùng bơh rơndăp broă lơh dê.

Tŭ lam lơh rơndăp broă lơh gùng rơndeh ồs lòt mhar tàm gơl gùng đah Tô- đah Jum, kờñ pal sền wơl tai bè bă sre tam kòi, bă brê pal tam gơl mờ ală gùng dà broă lơh nàng lơh geh ală broă jàu bè ù tam kòi, khà bă ù geh brê, kâp gơnăp gơnoar neh lơh nền; sền swì gơrềng bơh rơndăp broă lơh dê tus tiah ơm kis kơlôi sơnơng tai bè broă rơndăp khà ƀlàng rơndeh ồs, sền swì nền gơrềng jơnau gơrềng tus tŭ tơngai lơh jăt rơndăp broă lơh nàng geh gùng dà broă lơh pơnđơl tus nam 2035 sền bal lơh sir jơh gùt gơl gùng; sền ngăc broă ai ù tơm wơl, dong kờl, ntrờn ơm kis pa; broă săc rwah cau bơcri priă, broă jăt ngui lơh geh măy mŏk cau lơh broă, phan ngui lơh, jơnau kờñ đèng tàm ală tŭ bơ̆t bơtàu mờ lam lơh jăt rơndăp broă lơh.

Bè priă ai lơh jăt rơndăp broă lơh kờp jơh priă bơcri ai rơndăp broă lơh dờng ngan, geh bal priă tă lơh mờ priă tă ai lòt rê. Den tàng bè hơ̆, nàng gơtùi lơh jăt ngan ngồn, gàr niam lơngăp lơngai priă jền dà lơgar pal sền swì nền nòn rlau, ơn tàm bơta dà lơgar gam lam lơh uă rơndăp broă lơh phan bơna kờñ ngan, jal mhar ngan tàm broă gùng lòt rê jun pơndiang, jun năng lượng nàng geh gùng dà broă lơh kơryan bơta ờ niam, ngan là pleh bơta ờ niam tài bơh ờ lơh sir ai ngui tài bơh ờ tơl priă lơh, bơta ờ niam roh tàm pơnring kes priă tàm tơngai di mơ tơngai tŭ ală priă dồs tus tơngai tơm mờ tơm wơl uă; bơta ờ niam kơldìng uă ir tàm dồs càn lơgar bơdìh dê, gơrềng tus bơta rơcăng lài bè priă jền, kes priă dà lơgar dê.

Anih duh broă Lơh kơnòl broă sùm Quôk hội ring bal kờñ pal geh ală broă lơh niam ngan rlau jơh nàng lơh jăt rơndăp broă lơh. Bulah bè hơ̆, nàng gơtùi lơh jăt ngan ngồn mờ tơngguh bơta gơtùi dờn, sồr Cíñ phủ kờp sền nền wơl 19 broă lơh yal loh làng rlau, sền swì gơrềng nền nòn, mìng cih tàm Jơnau lơh nền tàm pơrjum ală broă lơh ngan ngồn kờñ ngan, ờ huan gàr geh broă jàu broă, pơgồp bal sok sền gơnoar đah ală anih lơh broă, mpồl lơh broă, broă sền swì, jăt sền, ờ lời gơlik hoàc hươr pơhì pơhà, ờ niam, sền ngăc tus ală broă lơh, anih lơh broă lùp sền wơl, sồr ờ gŏ di ai tam gơl wơl halà sền swì nền gơrềng tŭ sồr.