Mờ bơta nền nòn, git kơrhia mờ geh kơnòl, tàm pơrjum dơ̆ 6, Quôk hội lơh nền tơn ruc tơngai ring bal rơndap lơh Adat ù tiah (tam gơl) nàng sền sơ wì dồ bă nền nòn bơta gơ rềng broă lơh, gàr niam ală adat boh lam tŭ geh ai tơlik pal lơh jat jơnau kờñ bơh rài kis dê, kuơmàng ờ gơlik geh bơta tàm dră wơl, ờ ring bal, gơ tàm rơndap rơndồl mờ ală adat boh lam ndai. Bơta do dờp geh bơta ring bal bơh kwang bàng Quôk hội dê. Bulah bè hơ̆, kwang ala mat Phạm Văn Hoà, Mpồl kwang bàng càr Đồng Tháp đơs là, broă tơn jŏ, ờ hềt ring bal Adat ù tiah rơp lơh gơbàn kal ke ai làng bol in: “Ờ hềt ring bal jơnau rơcang cih Adat ù tiah (tam gơl) jat añ den là pal lơh ngan. Bulah bè hơ̆, Adat ù tiah pal ring bal tàm nam do halà nam tơnơ̆, ờ gơtùi tơn jŏ tai. Tơn jŏ kàr lơi den bơta ờ niam tàm Adat ù tiah kung kal ke sơl, lơh gơbàn ờ suk tàm làng bol. Den tàng Adat ù tiah ờ hềt geh ring bal den geh dùl dơ̆ pơrjum nisơna lồi nam halà bồ nam 2024”.

Tus lồi nhai 12 nam 2023, jơnau rơcang cih Adat ù tiah (tam gơl) neh kờp sền nền nòn geh 232 tàm 265 bơta. Tơnơ̆ kờp sền, gam 35 mpồl bơta, sèng cih geh ală anih lơh broă ring bal pơn jat tai tam gơl, bơ tơl. Ủy ƀan Lơh sa bơh Quôk hội dê đơs là, dilah bơyai lơh pơrjum Quôk hội nisơna tàm nhai 1 nam 2024, mờ khà broă uă ngan, tŭ tơngai jal mhar, broă yal Quôk hội in ring bal là bơta gơ lòng ngan.

Tŭ do geh 3 tơngume pơn jat tai yal Ủy ƀan Thường vụ Quôk hội in sồr Cíñ phủ lơh loh rlau tai cơng tàng adat boh lam, geh jơnau đơs ngan ngồn mờ bơceh lơh broă rơndap lơh ngan ngồn: bè cau geh ngui ù sền gàr dà lơgar, sền gàr lơngăp lơngai pơgồp bal mờ broă lơh sa kă bro, bơt bơtàu lơh sa; bè gơnoar mờ kơnòl bơh mpồl lơh sa kă bro ling klàng, kwang àng dê tŭ ngui ù sền gàr dà lơgar, sền gàr lơngăp lơngai pơgồp bal mờ broă lơh sa, bơt bơtàu lơh sa; bè tơngume, broă lơh lơh nền giă ù mờ ală bơta, ală tŭ ngui tơl broă rơndap lơh.

Củ tịc Quôk hội Vương Đình Huệ đơs, rơncap lơh Adat ù tiah (tam gơl) là kuơmàng ngan. Bè hơ̆ den tàng, broă tam gơl, bơ tơl rơndap lơh adat do neh lòt gan 3 dơ̆ pơrjum mơya kung gam geh uă tơngume pơn jat tai pal geh sền sơ wì, Củ tịc Quôk hội sồr sền sơ wì wơl ală jơnau đơs mờ jơnau pal jat bè lơh adat boh lam. Tàm ală tơngume dờng, mìng gam cribơyai bè 3 tơngume dờng mờ 2, 3 broă ndai. Bè hơ̆ den neh geh cơng tàng adat boh lam nàng gơtùi yal Quôk hội in ring bal rơndap lơh Adat ù tiah (tam gơl) tàm pơrjum nisơna dơ̆ 5: “Ờ tơn ruc tơngai ring bal Adat ù tiah (tam gơl) tai. Tài Nghị quyết sồ 18 đơs loh pal lơh gơs Adat ù tiah tàm nam do. Dilah lời wơl tus pơrjum dơ̆ 7 den ờ di mìng geh 2 adat boh lam do lơm gời. Mờ pơrjum dơ̆ 7 kờp dŭ ring bal 9 adat boh lam. Dilah pơgồp wơl 2 adat boh lam do nàng gơ gơs 11 rơndap lơh adat boh lam den gam uă tơngume tai”.

Kờp dŭ lài, pơrjum nisơna dơ̆ 5 bơh Quôk hội khoă XV dê rơp pơrjum 3 ngai, sơn đờm mut pơrjum tàm ngai 15/01 do nàng sền sơ wì ală tơngume kuơmàng, jal mhar nàng lơh jat jơnau kờñ bơtàu tơnguh dà lơgar, tàm hơ̆ geh rơndap lơh Adat ù tiah (tam gơl).