Sền bơh mùl màl, rơndap tap sèng thôn, jơnum làng bol tiah drà geh uă bơta kuơ niam ngan. Tŭ tơrmù khà thôn, jơnum làng bol tiah drà, mpồl kwang bàng lơh broă sră pơ àr gơnoar atbồ tàm ƀòn lơgar rơp dipal rlau, broă đơng lam bơh kâp ủy, gơnoar atbồ kâp sàh dê rơp geh lơh tơn mờ sơrbac mhar rlau. Mờ kung, kes priă lời ai mpồl kwang bàng mìng drơng dùl kơnòl in kung geh tềm pềr nàng tơrgùm tơnguh bơta dong kờl, gùng dà broă lơh lời ai kwang bàng tơnơ̆ rơndap tap sèng in. Phó pơgru dờng - Tiến sìh ồng Ngô Thành Can - Pơgru kâp dờng Hìu bơsram kơlôi sơnơng sră pơ àr gơnoar atbồ mờ đơng lam broă dà lơgar mblàng lơh loh: “Tơmut bal jơnum làng bol tiah drà, hơ̆ sồng là thôn, lài ngan là gơtùi drơng jơnau kờñ bal pal geh tàm broă lơh bơh gơnoar atbồ ƀòn lơgar 2 kâp dê. Dơ̆ 2, loh làng là tơrgùm dùl nàng pơn jat tai tơrmù dipal mpồl lơh broă sră pơ àr gơnoar atbồ, tơrmù ƀà mpồl đơng lam. Dùl bơta tai mờ bol he pal kah, hơ̆ là bơta kwang bàng, dong bol he tơrmù dipal kwang bàng nàng gơ in di mờ jơnau kờñ bơtàu tơnguh bal”.

Jat mò Nguyễn Thị Tú Thanh, Phó Kwang lam bồ Vụ gơnoar atbồ ƀòn lơgar, Ƀộ broă dơlam is, do là tơngume kuơmàng, gơ rềng tơn tus rơndap broă, broă lơh tàm ƀòn lơgar. Den tàng, broă bơt bơtàu Jơnau lơh nền Cíñ phủ dê bè lam lơh broă lơh bơh thôn, jơnum làng bol tiah drà dê neh geh kơlôi sơnơng nền nòn ngan mờ geh ơn tàm bơta tơrgùm bal jơnau sồr tơrmù dipal mpồl lơh broă sră pơ àr gơnoar atbồ, ngui geh cồng nha priă jền, dipal mờ bơta pràn tàm pơn ring kes priă ƀòn lơgar dê: “Lơh jat jơnau lơh nền bơh Đảng dê bè rơndap tap sèng thôn, jơnum làng bol ơm kis tiah drà, Ƀộ broă dơlam is neh geh Cíñ phủ jàu đơng lam Bơt bơtàu Jơnau lơh nền Cíñ phủ dê bè rơndap broă mờ broă lơh bơh thôn, jơnum làng bol ơm kis tiah drà dê mờ gùng dà, bơta dong kờl gơ wèt mờ cau lơh broă ờ drơng mìng dùl kơnòl, lơh bơnàng jă nàng ală ƀòn lơgar in lam lơh jat tàm tơngai tus. Gùng dà, broă lơh bal tàm rơndap tap sèng thôn, jơnum làng bol ơm kis tiah drà in là jat gùng dà tơrmù dipal mpồl đơng lam, tơrmù khà thôn, jơnum làng bol tiah drà mờ gàr bơta dipal mờ bơta geh ngan, mờ bơta krơi is bơh tơl bă tiah dê mờ bơh hơ̆ tơnguh cồng nha lơh broă tàm ƀòn lơgar, lơh gơlik bơta ƀuơn ai broă lam lơh jat ală kơnòl broă mờ tơrmù bơta kơn jơ̆ atbồ tơn bơh gơnoar atbồ kâp sàh dê”.

Bơta pal geh bơh broă rơndap tap sèng wơl thôn, jơnum làng bol tiah drà dê ai tơnggŏ tàm 3 bơta tờm: Lài ngan là tơrmù dipal mpồl cau lơh broă ờ drơng mìng dùl kơnòl; dơ̆ 2, tơrgùm priă jền bơcri priă lơh phan bơna niam chài; mờ dơ̆ 3 là tơnguh pràn jak atbồ is bơh mpồl bơtiàn dê. Bulah bè hơ̆, tơl bơta tam gơl bè sră pơ àr gơnoar atbồ, đơs pơn dut den ndrờm pal wèt tus dùl jơnau kờñ lơh geh mìng dùl lơm: Hơ̆ là drơng làng bol niam rlau. Tŭ tơmut bal, khà kờp làng bol gơguh uă, broă sac rơ wah ală cau lam bồ thôn, jơnum làng bol tiah drà rơp pal geh sac rơ wah nền nòn rlau.

Hơ̆ rơp là ală cau ngan ngồn geh bơngă pin dờn, geh pràn jak, rềp làng bol, tài làng bol. Ồng Nguyễn Tiến Dĩnh - Thứ trưởng Ƀộ Broă dơlam is lài do đơs là: “Pal bơsram dồ bă loh làng mờ geh kơnòl, lơh dồ bă kràñ cê, jơh nùs, bol he pal bơt bơtàu broă rơndap lơh dồ bă nền nòn. Mờ tŭ tơmut bal thôn mờ jơnum làng bol tiah drà geh bă tiah dờng rlau den khà broă kung rơp uă rlau sơl. Den tàng jơnau sồr gơ wèt mờ đơng lam thôn, jơnum làng bol ơm kis tiah drà kung pal sơlơ tơnguh tai tŭ jơ lơh broă. Dơ̆ 2 là pơgồp bal mờ kơnòl broă bơh cau lam bồ thôn, jơnum làng bol ơm kis tiah drà dê pal di mờ jơnau sồr bơh kâp hơđang dê”.

Broă lơh gơs rơndap tap sèng thôn, jơnum làng bol tiah drà tàm quý 2 nam do là dùl kơnòl broă cíñ trị kuơmàng, sồr pal geh bơta ring bal uă bơh bơta đơng lam Đảng tus nùs nhơm làng bol dê. Khat dùl bơta tam gơl lơi kung ờ gơtùi pleh ală kal ke bơh chờm, mơya mờ bơta sồr lơh kràñ cê bơh Dà lơgar, bơta rơcang nền nòn, ngac ngar bơh gơnoar atbồ ƀòn lơgar dê bal mờ bơta wă wờng bơh làng bol dê, ngan là tơnơ̆ rơndap tap sèng, thôn, jơnum làng bol tiah drà rơp lơh broă niam rlau, tàm pơn jat bơnĕ bơnài mờ mpồl lơh broă sră pơ àr gơnoar atbồ ƀòn lơgar 2 kâp, bơh hơ̆ lơh gơlik bơta ƀuơn ai bơtàu tơnguh phan bơna, atbồ mpồl bơtiàn tàm ƀòn lơgar.