Ồng Nguyễn Chu Hồi, Mpồl kwang bàng Quôk hội ƀòn dờng Hải Phòng đơs là, Rơndap ù tiah tơrgùm jơh ală bơta kâp dà lơgar geh uă bơta pa, bal mờ rơndap ù tiah sap sèng phan bơna gùng lòt, tàm hơ̆ pal bơsong bơta ờ tàm tơrbŏ bal gùng lòt bơh ală càr tiah kềng gah dà lềng đah tô dà lơgar mờ tàm gùl lơgar. Kung jat ồng Nguyễn Chu Hồi đơs, rơndap ù tiah neh sền sơwì tus ală phan bơna ndai nàng dipal mờ rài lơh sa sồ mờ sền gàr tiah ơm kis gơ wèt mờ ală tiah sền gàr brê bơnơm, li la siñ họk nàng kờñ tơnguh pràn jak rơcang sơndră mờ tam gơl trồ tiah: “Phan bơna sồ tàm tơrbŏ bal ù tiah tŭ do ờ di mìng là rơndeh oto, rơndeh par mờ gam tàm tơrbŏ bal tàm internet. Phan bơna dơ̆ 3 là gơ dờp mờ tam gơl trồ tiah, tŭ do pal geh phan bơna geh is, pal tam wơl brê, brê bam dà hang kềng gah dà lềng nàng tơrmù ƀà bơta gơ rềng bơh trồ tiah lơh aniai, tam gơl trồ tiah. Bơta do ai gŏ là, Rơndap ù tiah tơrgùm jơh ală bơta kâp dà lơgar neh lơh jat jơnau kờñ bơh rài pa dê mờ neh sơn đờm kờp dŭ tus jơnau tus bal uă rlau tai, tus bal geh cồng nha bơh măi mok dê”.

Ai gơ wèt mờ ồng Bùi Hoài Sơn, Mpồl kwang bàng Quôk hội ƀòn dờng Hà Nội đơs, Rơndap ù tiah tơrgùm jơh ală bơta kâp dà lơgar neh sền gròi tus broă tàm tơrbŏ kơ̆ kơljap mờ ală phan bơna niam chài, sền gròi tus broă bơsong ring niam bơta gơ rềng đah bơtàu tơnguh mờ prap gàr, ngui niam ală bơta kuơ niam chài, kah yau. Sền gàr, ngui niam ală bơta kuơ niam chài niam bơnĕ bơh niam chài ală jơi bơtiàn kòn cau dê; bơtàu tơnguh pràn kơldang lơh sa mờ măi mok niam chài, lơh gơlik ală phan bơna, broă drơng ala nhơl chờ geh mat kă bro, bơngă pin dờn mờ bơta gơ rềng tàm ală lơgar rềp bal mờ tàm dunia, jat nùs nhơm Nghị quyết pơrjum dờng dơ̆ 13 Đảng dê: “Rơndap ù tiah tơrgùm jơh ală bơta kâp dà lơgar neh geh ală jơnau gròi sền nền nòn gơ wèt mờ gah niam chài mờ kuơmàng bol he neh sền gròi tus ală phan bơna niam chài. Dilah bol he geh ală phan bơna niam chài dipal bè ƀảo tàng, hìu đơs crih, hìu sền sră, ràng tơlik… hơ̆ là bơnàng jă nàng bol he bơyai lơh ală broă lơh dipal mờ bơta bơtàu tơnguh bơh dà lơgar dê. Bulah bè hơ̆, kung kờñ pal geh tai ală jơnau gròi sền ndai mờ bol he geh uă tiah niam chài krơi is geh ală bơta krơi is bè bơta kuơ mờ ală bơta niam krơi sơ ƀơi. Dùl Rơndap ù tiah tơrgùm jơh ală bơta kâp dà lơgar mìng gơtùi lam lơh ngan ngồn mờ gơ dipal mờ bơta krơi is bơh dà lơgar dê tŭ gơ jat tàm ală bơta kuơ, ală bơta krơi is bơh niam chài dê”.

Đơs là Rơndap ù tiah tơrgùm jơh ală bơta kâp dà lơgar tơngai bơh nam 2021 tus nam 2030, broă wèt sền tus nam 2050 là dùl tàm ală tơngume jal mhar tài gơ rềng tơn tus rơndap ù tiah ală tiah dê, ồng Lê Hữu Trí, Mpồl kwang bàng Quôk hội càr Khánh Hòa đơs loh: “Jat tàm adat rơndap ù tiah, đơs ngan là Rơndap ù tiah tơrgùm jơh ală bơta kâp dà lơgar pal geh ai tơlik gờñ rlau nàng lơh bơnàng jă ai ală tiah in ai tơlik ală rơndap ù tiah kâp càr, kâp hơ đơm. Mơya kuơmàng là rơndap ù tiah do den tŭ tơngai geh lơyài rlau mơya bơta kuơmàng là bơta niam, bồ tơngoh kơlôi sơnơng mờ broă sền sơ wì jŏ tơngai nàng dà lơgar bơtàu tơnguh mhar mơya pal kơ̆ kơljap rài lơh sa dà lơgar dê kung bè bơtàu tơnguh ală bơta kơ̆ kơljap mpồl bơtiàn bol he dê, tàm tơngai tŭ do mờ broă sền sơ wì tus nam 2050”.

Tàm pơrjum nisơna dơ̆ 2 bơh Quôk hội khoă XV dê, dờp gơnoar jàu bơh Thủ tướng Cíñ phủ dê, Ƀộ trưởng Ƀộ Kế hoạc mờ Đầu tư ồng Nguyễn Chí Dũng yal sră yal bè Rơndap ù tiah tơrgùm jơh ală bơta kâp dà lơgar tơngai bơh nam 2021 tus nam 2030, broă wèt sền tus nam 2050. Jat hơ̆, Rơndap ù tiah tơrgùm jơh ală bơta kâp dà lơgar tơngai bơh nam 2021 tus nam 2030, broă wèt sền tus nam 2050, tơlik jơnau kờñ tus nam 2030 Việt Nam là lơgar gam bơtàu tơnguh geh rài lơh sa mờ măi mok pa, priă lơh geh kờp bal uă, gơguh lơh sa jat tàm bơnàng jă khoa họk kông nghệ, tam gơl pa, bơceh pa mờ tam gơl sồ; broă lơh bơyai lơh ù tiah bơtàu tơnguh dà lơgar geh cồng nha, ring bal, kơ̆ kơljap, mòn gơs ală bă tiah, tiah tờm lơh sa, tiah drà pràn, geh mpồl rơndap tap sèng phan bơna kuơmàng ring bal, tam gơl pa; gàr niam ală bơta tàm pơnring dờng, tơnguh bơta pràn kong jai bơh rài lơh sa dê; tiah ơm kis, brê bơnơm geh sền gàr, gơ dờp mờ tam gơl trồ tiah; rài kis phan bơna, nùs nhơm bơh làng bol dê geh tơnguh; sền gàr dà lơgar, sền gàr lơngăp lơngai geh gàr kơ̆ kơljap.