Tŭ do, kơnòm dềt git ngui internet mờ mạng sàh hội bơh gờñ ngan. Broă bơsram, sền ală jơnau lơh prài bồ tơngoh halà tìp mat lơh kwèng tàm internet lơh ală oh ƀuơn ngan tam pà rùp hin, anih ơm, hìu bơsram halà uă jơnau tơnggit să tờm ndai mờ ờ hềt git wă tơl làm ală bơta aniai digơlan gơlik geh. Bơta pal kơlôi rơcang là kơnờm dềt digơlan gơ gơs là cau gơtìp aniai bơh ală broă lơh blac pơr lồm, sơ gràm gơnoar is să tờm dê halà gơtìp ngui jơnau tơnggit ai jơnau kờñ ờ niam in. Ờ mìng kơnòm dềt, uă mè bèp kung geh mờng kwèng pơnđàng rùp hin, video mờ jơnau yal bè kòn he dê tàm mạng sàh hội mờ ờ hềt gơtùi git lài jơh ală bơta aniai digơlan gơlik geh. Mìng bơh dùl pang rùp soh phan lòt bơsram, cau ndai kung gơtùi git mat hìu bơsram, tiah ơm kis halà tŭ tơngai ntrờn lòt rê kơnòm dềt dê. Jat ală jơnau geh jơnau git wă jrô bè lơngăp lơngai tàm internet, ală jơnau tơnggit tồn lah ờ geh bơta aniai lơi do digơlan gơtìp sơmờm dilah gơ mut tàm tê bol ờ niam.

Bè hơ̆ den tàng, jơnau cih bè sền gàr yal tơnggit jơnau să tờm bơh kơnòm dềt dê tàm Adat sền gàr yal tơnggit jơnau să tờm geh bơta gơ rềng ơnàng ngan mờ ală mpồl bal, mpồl lơh sa kă bro pal sền gròi uă tŭ lam lơh jat. Cau chài cah rơña ồng Nguyễn Đức Long - cau ai geh Sră cơng tàng ală lơgar bè sền gàr ndơp ndơr mờ gơnoar is jơnau tơnggit đơs sùm:

“Tŭ mờ kơnòm dềt bơh 7 sơnam rlau hơđang den kờñ pal geh bơta ring bal bơh kơnòm dềt mờ cau ala mat tŭ yal jơnau tơnggit bè rài kis is, jơnau yal ndơp ndơr să tờm kơnòm dềt dê. Tàm do, tơl nă cau gơtùi wă bè do, là yal jơnau tơnggit bè rài kis is, jơnau ndơp ndơr să tờm dê den bơta gơ rềng gơ dê là ơnàng ngan. Digơlan là jơi, mat sơnđan, sơnam, rùp hin, anih ơm kơnòm dềt dê… kung geh sền là jơnau yal bè rài kis is. Kĭ sră pơrgon sền gàr rềs àr mờ cau geh dờp kuơ halà cau geh sền gàr rềs àr là kơnòm dềt, pơn yơu bè hơ̆, den bol he pơn đàng jơnau yal bè rài kis is, jơnau yal ndơp ndơr să tờm dê, den tơl nă cau pal sền swì nền nòn, nàng pleh lơh tìs”.

Jat Bơta 24 bơh Adat sền gàr yal tơnggit jơnau să tờm, broă bơsong yal tơnggit jơnau să tờm bơh kơnòm dềt dê pal gàr jơnau pal jat là ơn bơta kuơ kơnòm dềt dê lài ngan. Gơ wèt mờ kơnòm dềt tơl bơh 7 sơnam rlau hơđang, tŭ bơsong yal tơnggit jơnau gơ rềng tus rài kis is halà jơnau yal ndơp ndơr să tờm dê, den pal geh bơta ring bal bơh jơh bal kơnòm dềt mờ mè bèp halà cau ala mat dipal dê. Bơta do ndrờm mờ broă ală mpồl bal, mpồl lơh sa kă bro halà măi mok ờ gơtùi tơrgùm jơnau tơnggit kơnòm dềt dê dồ bă bu ba bè lài do tai. Jơnau cih pa kung ai gŏ, adat boh lam wèt tus broă sền gàr kơnòm dềt, ki ngàm gơnoar is să tờm dê mờ jơnau đơs bơh kơnòm dềt dê tàm măi mok sồ.

Bơdìh hơ̆ tai, Adat Sền gàr yal tơnggit jơnau să tờm kung ai tơlik jơnau sồr uă rlau gơ wèt mờ mpồl lơh sa kă bro tàm broă bơt bơtàu gùng dà sền gàr ndơp ndơr, gròi sền kung bè jùt, sang tĕ đal git yal tơnggit jơnau să tờm. Ồng Phạm Hoàng Lâm - Cau geh jơnau git wă jrô bè atbồ lơngap lơngai jơnau tơnggit pà git:

“Adat cih là, jơnau yal să tờm dê tơnơ̆ tŭ geh jùt đal git den rơp ờ gam geh sền là yal tơnggit jơnau să tờm dê tai mờ bè hơ̆ den tàng ờ gơ wèt gơnoar tam gơl bơh Adat do dê. Jat adat do, jùt đal git, hơ̆ là broă tam gơl, jùt jơnau tơnggit nàng kờñ lơh gơlik jơnau yal pa mờ bơh hơ̆ ờ gơtùi git nền halà tơrbŏ tus dùl nă cau mùl màl. Tơnơ̆ tŭ sền swì nền ală sèng, ală bơta bơh Adat sền gàr yal tơnggit jơnau să tờm nam 2025 mờ is ồn là Bơta 14 gơ rềng tus jùt, sang tĕ đal git, jat bơta kơlôi sơnơng bol hi dê den Adat ndrờm bè wèt tus jơnau cih ờ prap wơl jơnau yal, ala mìng jùt bơta đal git.”

Gơ wèt mờ jơnau yal bơh kơnòm dềt dê - do là cau kờñ pal geh sền gàr is ồn - broă gàr niam yal tơnggit jơnau geh sền gàr niam ờdo ờdă sơlơ gơ gơs kuơmàng ngan, nàng kờñ kơryan jơnau pơhìn mpờl halà gơtìp ngui tìs tàm măi mok sồ. Ală bơta pa ngan do ai gŏ, Adat sền gàr jơnau yal tơnggit să tờm gam rơhời tus rềp ală jơnau sồr ală lơgar bè sền gàr gơnoar is să tờm bơh tơl nă cau dê, tàm hơ̆ lời ai bơta sền gròi uă ngan tus kơnòm dềt.