Nam 2022, mờ jơnau sồr bơh bơta geh ngan dê, Quôk hội neh rơ wah lùp ală Ƀộ trưởng, kwang atbồ gah broă lơh tàm ală gah: Nông nghiệp mờ Phát triển Nông thôn; Tài cíñ; Ngân hàng, Giao thông Vận tải, Xây zựng, Nội vụ, Thông tin- truyền thông mờ thañ tra. Ală kal ke, kòl yan, ală bơta ờ niam, ờ pràn tàm broă lơh atbồ dà lơgar sùm geh đal git song dơpă, mblàng lơh loh uă gah, uă bơta tàm dơ̆ lùp mờ jơnau jơnau lùp tàm ală dơ̆ pơrjum Quôk hội. Bơta tàm pơgồp bal đah jơnau lùp bơh ală kwang bàng Quôk hội dê mờ bơnah hơ jơnau lùp bơh ală kwang Ƀộ trưởng, kwang atbồ gah broă lơh dê, tàm pơndang tus lồi broă geh đơs, lơh gơlik broă lơh. Ồng Trần Văn Lâm, mpồl kwang bàng Quôk hội càr Bắc Giang đơs là: “Jơnau lùp ngai sơlơ di broă kờñ lùp rlau. Bơnah hơ jơnau lùp bơh ală Ƀộ trưởng mờ Cíñ phủ dê ờ pleh, mờ đơs song tơn”.

Cồng nha bơh tơl dơ̆ lùp mờ hơ jơnau lùp dê ờ mìng tàm ală jơnau lùp đơs song tơn, lùp kơnòl, tàm ală jơnau hơ git loh, git bè gah broă lơh, song dơpă, tam gơl pa, geh tŭ ờ pleh dờp tìs bơh ală Ƀộ trưởng, kwang atbồ gah broă lơh dê. Cồng nha rlau là cau lùp mờ hơ jơnau lùp ndrờm geh bal dùl nùs nhơm bơt bơtàu nàng jòi broă lơh ai ală broă atbồ dà lơgar neh, gam mờ geh ai tơlik.

Dilah bè tàm ală dơ̆ lùp mờ hơ jơnau lùp, ală kwang bàng Quôk hội mờ ală Ƀộ trưởng, kwang bàng Cíñ phủ neh ai tơnggŏ loh làng nùs nhơm đơs song, đơs di bè ală bơta ờ niam bơh bơta geh ngan nàng ai tơlik ală broă lơh di tŭ, den broă rơ wah ală tơngume jat sền dong git uă rlau bơta ờ niam, kòl yan tàm tơl gah bơh atbồ dà lơgar dê. Broă lơh jat sền bơh Quôk hội dê bè bơta pơhì pơhà tàm 2 hìu sơnơm Bạch Mai mờ Việt Đức anih sồ 1 là dùl pơn yơu ngan ngồn. Tơnơ̆ dơ̆ jat sền bơh Quôk hội dê, Thủ tướng Cíñ phủ neh lòt sền tơn 2 rơndap broă lơh do mờ sồr crơng gơs Mpồl lơh broă sền sơ wì wơl jơh ală broă lam lơh rơndap broă mờ ai tơlik broă lơh ngan ngồn. Ồng Nguyễn Anh Trí, mpồl kwang bàng Quôk hội ƀòn dờng Hà Nội đơs, do là broă lơh pa tàm broă lơh jat sền bơh Quôk hội dê, ờ mìng bơt bơtàu mờ gam rơcang sơndră mờ broă git loh anih mờ kơnòl bơh ală bơta ờ niam dê: “Mpồl kwang bàng jat sền bơh Quôk hội dê mờ geh jơnau đơs. Tơnơ̆ hơ̆ mơ tơn, Thủ tướng Cíñ phủ lam bồ mpồl tus nàng bơsong. Bơta do ai gŏ bơta kuơ bơh broă lơh jat sền Quôk hội dê”.

Tàm nam 2022, 4 tơngume neh geh lam lơh jat sền, hơ̆ là: broă lơh rơndap ù tiah, broă lam lơh ngan ngồn tềm pềr, rơcang sơndră pơhì pơhà; wă làng bol, bơsong yal yă yal khài mờ broă rơndap tap sèng mpồl lơh broă hàñ cíñ kâp kơnhoàl, xã. Nùs nhơm 5T, hơ̆ là: di mờ bơta geh ngan, ngan ngồn, jơh nùs, dong dơpă mờ geh kơnòl uă geh ai tơnggŏ loh làng tàm ală tơngume jat sền.

Dơ̆ sơn rờp, ală Mpồl kwang bàng jat sền geh jà tai bơta tus bal bơh ală cau jak chài mờ kwang đơng lam bồ 2, 3 anih lơh broă geh gơ rềng dê. Dilah bè lài do, Mpồl kwang bàng Quôk hội mìng lam lơh jat sền tàm ală càr, ƀòn dờng mờ Mpồl kwang bàng Quôk hội dê mờ Ủy ƀan Thường vụ Quôk hội ờ tus lam lơh jat sền tơn den tŭ do, ală Mpồl kwang bàng Quôk hội pal lam lơh jat sền gơ wèt mờ jơh ală tơngume.

Ală bơta ờ niam geh song dơpă đơs tus nàng bơsong, ală jơnau sồr broă lơh dê geh ring bal mờ jơh ală broă lơh tìs geh đơs nàng kong kơnòl, bơsong… Pơn yơu bè  jat sền broă lam lơh broă lơh, adat boh lam bè wă làng bol mờ bơsong yal yă, yal khài, jat Phó kwang atbồ Ƀan zân nguyện, ồng Lưu Bình Nhưỡng, tơngume jat sền do dờp geh bơta kờñ uă ngan bơh làng bol dê. Tài bơh jat sền ờ di là broă lòt jòi bơta tìs, mờ là nàng kờñ lam lơh niam rlau, mờ dilah git gŏ broă lơh tìs den dan mờ ală anih lơh broă geh gơnoar bơsong jat jơnau cih adat boh lam dê: “Sền sơ wì bơta niam là bơh jơnau đơs làng bol dê. Bè hơ̆ jat tàm cồng nha jat sền nàng bol he sền sơ wì wơl, sền sơ wì bơta niam, kơnòl bơh kwang bàng dê, kuơmàng ală cau atbồ tàm broă lơh wă làng bol dê”.

Bơta đo was cồng nha broă lơh bơh Quôk hội dê hơ̆ là bơta niam nùs mờ bơta pin dờn bơh cau tĕ khà dê. Mờ cau tĕ khà- ală cau sùm jat sền nền nòn ală broă lơh bơh Quôk hội dê, sền sơ wì broă lơh jat sền bơh Quôk hội dê neh tam gơl pràn kơldang jơh bal bè bồ tơngoh kơlôi sơnơng mờ broă lam lơh. Do là jơnau đơs bơh cau tĕ khà dê: “Quôk hội pơn jat tai geh ală broă lơh tam gơl pa jat gùng dà jat sền rềp làng bol, di mờ bơta geh ngan tàm rài kis. Den tàng, jat sền bơh Quôk hội dê halà lùp kwang bàng Quôk hội pơn jat tai lơh bè Quôk hội khoă lài mơya tŭ do lơh kràñ cê, ngan ngồn rlau”.

Ală tam gơl pa bơh jat sền dê di bè Củ tịc Quôk hội ồng Vương Đình Huệ đơs nền, jat sền pal bơh nùs nhơm jơh nùs bơt bơtàu; pal gơtùi ngui ală broă lơh niam, ală broă lơh bơceh pa; jat sền pal tài bơh jơnau kờñ bơt bơtàu, bơtàu tơnguh: “Jat sền pal bơh nùs nhơm jơh nùs bơt bơtàu, đah bơt bơtàu mờ rơcang sơndră den bơt bơtàu kung gam là kuơmàng, jŏ jòng; rơcang sơndră là kràñ cê, jơh nùs, lơh tus gùng tus dà mờ sơrbac mhar. Bơt bơtàu adat boh lam là nàng bơt bơtàu bơtàu tơnguh. Broă lơh jat sền kung pal tài bơh jơnau kờñ bơt bơtàu bơtàu tơnguh. Quôk hội sùm tam gơl pa is să tờm he dê. Den tàng, tơl anih lơh broă bơh Quôk hội dê pal lam lơh niam jat sền is, tơl nă kwang bàng Quôk hội pal gròi sền is broă lơh he dê tàm tŭ lam lơh kơnòl broă, gơnăp gơnoar mờ geh kơnòl tềng đap cau tĕ khà nàng ngan ngồn pờ gơs dùl tŭ tơngai pa bềng bơta gơn kơnờm niam bơnĕ tàm broă lơh Quôk hội bè jơnau đơng lam mờ bơta kơp kơnờm bơh Tổng Ƀí thư ồng Nguyễn Phú Trọng dê đơs nền tàm Dơ̆ mut pơrjum dơ̆ 1, Quôk hội khoă 15”.

Jơnau đơs nền bơh Củ tịc Quôk hội ồng Vương Đình Huệ dê tàm broă lơh jat sền bơh Quôk hội dê ờ mìng tơngkah tơl nă kwang bàng Quôk hội, tơl anih lơh broă bơh Quôk hội dê git wă rlau tai kơnòl he dê. Jat sền nàng bơt bơtàu ală bơta niam bơnĕ, tài jơnau kờñ bơt bơtàu, bơtàu tơnguh kờñ pal geh bơta jơh nùs, bơta pơn dơl pràn, bơta lơh ngan lơh jat rơcang sơndră tài bơta kuơ bal bơh cau tĕ khà mờ làng bol dê, tài bơta kuơ bal bơh dà lơgar dê.