Jăt Ƀộ Lơh broă, Cau ling sồt să mờ Mpồl bơtiàn dê yal, uă jơnau kờñ dờng Quôk hội jàu bè Broă rơndăp lơh bơtàu tơngguh lơh sa- mpồl bơtiàn nam 2024 ndrờm kờp dŭ lơh geh, bè: Khà ờ geh broă lơh tiah ƀòn dờng ƀòn drà kờp dŭ geh hơđơm 4%, khà cau lơh broă neh bơsram broă lơh kờp dŭ geh pơgăp 70%; Khà cau lơh broă neh bơsram broă lơh geh sră cơng tàng dờng, dềt kờp dŭ geh pơgăp bơh 28 tus 28,5%. Kờp dŭ khà hìu rƀah jăt tơl jơnau sồr rƀah uă bơta lồi nam 2024 gơmù rlau 1% pơndrờm mờ lồi nam 2023. Bulah bè hơ̆, Phó Kwang ătbồ Anih duh broă Mpồl bơtiàn ồng Lâm Văn Đoan sồr pal kờp sền nền wơl, bơtơl tàm jơnau yal ală bơta gơrềng bơh dơ̆ mìu càl rbŭt dờng sồ 03 lơh aniai, bơh hơ̆ sền wơl ală jơnau kờñ pal lơh geh bơta di ngan mờ dipal. Ồng Lâm Văn Đoan, đơs: Pal kờp sền bơta hoàc hươr bơh dơ̆ mìu càl rbŭt dờng sồ 03 lơh aniai, geh jơnau đơs mờ gĭt nền wơl ală jơnau kờñ loh làng geh lơh geh halà ờ! Rơndăp broă lơh dềt hìu ơm, bol he ai kes priă dà lơgar 8 rbô tơmàn đong dong kờl ai pơgăp 100 rbô hìu rƀah, hìu pa jơh rƀah tàm jơh gùt lơgar, mơya is ồn hoàc hươr tài bơh dơ̆ mìu càl rbŭt dờng Yagi lơh aniai là 257 nơm hìu, loh làng ală broă jàu do gơ sồr sền wơl jơh.

Jơnau yal tàm dơ̆ pơrjum pà gŏ, nam 2024, bal mờ bơta bơtàu tơngguh wơl mờ bơtàu tơngguh ală gah, broă lơh sa, drà cau lơh broă geh sền gròi bơtàu tơngguh; sơlơ tàm tơn tìp đah cau kờñ jòi cau lơh broă mờ cau kờñ jòi broă lơh, dong kờl cau lơh broă jòi broă lơh mờ dơ̆ sơnrờp lam lơh tơrlòng lài drà jòi broă lơh pờ tơlik tơn tàm internet tàm gùt lơgar; di tŭ dong kờl làng bol, cau lơh broă gơtìp roh broă, tơrmù jiơ lơh broă; broă lơh mờ priă lơh geh bơh cau lơh broă dê geh gơguh sơl pơndrờm bal dồ tŭ mờ nam 2023. Gĭt gơ̆p lơh broă tàm ală mpồl lơh sa kă bro sền bal gàr kơ̆ kơl jăp, broă lơh lam cau lơh broă lòt lơh broă tàm lơgar ndai geh bơtàu tơngguh wơl niam ngan. Ală tiah lơh jăt wil tơl, di tŭ bơta dong kờl, broă dong kờl ai pà ai cau geh màng mờ kăc màng in, dong kờl mpồl bơtiàn, Sền gàr rềs àr mpồl bơtiàn, Sền gàr rềs àr ờ geh broă lơh, gơmù rƀah, sền gàr cau dờng sơnam kơnòm dềt geh rài kis kal ke ir…; broă tă tơm ờ ngui priă măt ai ală cau dờp broă dong kờl sền gàr lơngăp lơngai rài kis mpồl bơtiàn in geh lơh pràn. Jăt ală cau ala măt đơs, Ƀộ Lơh broă, Cau ling sồt să mờ Mpồl bơtiàn, broă lơh ai priă bơcri dà lơgar gam lơyài, tàm hơ̆ geh priă bơh broă lơh tơrmù rbah kơ̆ kơl jăp nam 2024 dê. Phó Kwang ătbồ Anih duh broă Mpồl bơtiàn Quôk hội dê mò Đào Thị Lan, sồr: Nam 2024 priă broă lơh, priă bơcri bơh bol he dê gam ờ uă, ai priă tus nhai 08 geh 47%. Tus jơh nam digơlan den lơh geh. Dan yal tai priă bơh nam 2022- 2023 dê tam gơl tus lơh jăt tàm nam 2024 den lơh jăt bè lơi geh lơh geh jăt ai priă jơh tàm nam 2024 halà ờ?

Jơnau yal broă lơh jăt Broă rơndăp lơh bơtàu tơngguh lơh sa- mpồl bơtiàn mờ Kes priă dà lơgar nam 2024, rơcăng broă rơndăp lơh mờ kờp dŭ lài kes priă dà lơgar nam 2025 gah cau lơh broă, cau geh màng mờ dà lơgar mờ mpồl bơtiàn, ala măt Ƀộ Lơh broă- Cau ling sồt să mờ Mpồl bơtiàn dê pà gĭt, bơh bơta Đơng lam bơh Đảng dê, bơta sồr lơh, đơng lam kràñ cê jơh nùs bơh Cíñ phủ dê, Thủ tướng Cíñ phủ dê; mờ bơta jơh nùs lơh ngan bơh kwang bàng, kông cưk, cau lơh broă gùt gah do dê mờ bơta pơgồp bal niam ngan bơh ală kâp, ală gah broă, ală tiah dê, Ƀộ Lơh broă, Cau ling sồt să mờ mpồl bơtiàn neh lam lơh jăt ndrờm bal, ngăc ngar mờ cồng nha ală kơnòl broă, broă lơh tàm gah broă cau lơh broă, cau geh màng mờ dà lơgar mờ mpồl bơtiàn; di tŭ bơsong, lơh wơl broă dong kờl; lơh jăt ală kơnòl broă sùm, mơkung sền gròi bơsong ală jơnau gam gơkòl, ală broă pa gơlik geh.

Tàm dơ̆ pơrjum, Anih duh broă Mpồl bơtiàn Quôk hội dê sồr Ƀộ Lơh broă, Cau ling sồt să mờ Mpồl bơtiàn lơh loh ală gơkòl gơrềng tus kơnòl tam pà priă jền kung bè ală gơkòl bè sră nggal bơto pơlam. Bơh hơ̆ dan broă lơh nàng kờñ rơcăng lài yal kes priă dipal, gàr niam lơngăp lơngai rài kis mpồl bơtiàn ai làng bol in.