Kwang gơnoar cih Quôk hội, Kwang atbồ Cơldŭ lơh broă Quôk hội Bùi Văn Cường pà git: Nam 2024, Ủy ƀan Thường vụ Quôk hội tơrgùm rơcang lài, hòi tus mờ đơng lam ală dơ̆ pơrjum Quôk hội; Broă lơh lơh adat boh lam; Broă lơh jat sền; Sền sơ wì, lơh nền ală broă kuơmàng; Broă lơh lơh broă mờ lơgar ndai mờ lơh broă bal dunia; Broă lơh bơta kơp kờñ làng bol; Pơlam lơh broă bơh kwang bàng Quôk hội, mpồl kwang bàng Quôk hội dê mờ gàr niam ală bơta pal geh lơh broă bơh kwang bàng Quôk hội dê; Pơlam lơh broă bơh Hội đồng Ñân zân mờ bơyai lơh ală dơ̆ pơrjum bơh Ủy ƀan Thường vụ Quôk hội dê tàm nam 2024.

Ală jơnau đơs ai tơnggŏ bơta ring bal uă tàm broă sơlơ tơnguh tai jơnau pal jat tàm broă lam lơh broă lơh, ngan là pal pơlam nùs nhơm sơlơ tơnguh tai jơnau pal jat, sồr ală anih lơh broă, mpồl lơh broă geh gơ rềng lam lơh tơl làm, jơh nùs ală jơnau sồr bè pơyua sră nggal tàm dơ̆ pơrjum. Tàm hơ̆, pal sền gròi tus broă rơcang lài sră nggal tơl khà bơta niam, di tơngai hơ pơrgon, nàng Mpồl duh broă Jơi bơtiàn, ală Ủy ƀan bơh Quôk hội dê in sền sơ wì mờ ală kwang bàng bơh Ủy ƀan Thường vụ Quôk hội dê geh tai bơta nàng kơlôi sơnơng sră nggal nền nòn, pơgồp bơnah tơnguh cồng nha, bơta niam dơ̆ pơrjum dê.

Củ tịc Quôk hội Vương Đình Huệ đơs là, broă tam gơl broă lơh nam 2023 là bơta pal lơh, tài kờp dŭ lài mờ bơta geh ngan krơi is. Bulah bè hơ̆, Củ tịc Quôk hội ring bal jơnau đơs bơh ală Kwang geh jơng tàm Ủy ƀan Thường vụ Quôk hội dê là broă tam gơl tơngume uă ir, bơta do pal ai mờng chài: “Geh tŭ pah nhai gời, ờ hềt đơs tus pah nam halà pah quý, tŭ neh tơmut mơya tàm tŭ pơrjum den tă wơl, tơmut wơl. Bơta do là kơnòl bơh ală mpồl sơn rờp dê, ală Ủy ƀan dê, pal ai mờng chài nàng pơgồp bal mờ ală anih lơh broă bơh Cíñ phủ dê. Tơnơ̆ do digơlan kung sền tìs di jat pah nhai là kàr lơi broă lơyài mờ pal tam gơl bơh mpồl lơi kong kơnòl. Pa mơ tam gơl den pal tam gơl wơl tai tơngume. Pa do, Quôk hội kràñ cê ngan tàm broă do. Añ sồr là nam 2024 pal sền gròi kơ̆ broă do, nàng jòi git kơnòl bơh ală cau dùl nă să, mpồl bal geh gơ rềng dê lời gơbàn bơta lơyài, pal kràñ cê tàm bơta do”.

Ai jơnau đơs tàm jơnau yal broă lơh bơta kơp kờñ làng bol bơh Quôk hội dê nhai 10 mờ nhai 11 nam do, Ủy ƀan Thường vụ Quôk hội đơs là, cau tĕ khà sền gròi ngan bè bơta mìu nhàc dà kŏ dà cò tàm tiah tàm gùl lơgar; giă xăng, gia đèng; kal ke bơh mpồl lơh sa kă bro dê bulah neh bơtàu tơnguh wơl mơya rài kis bơh làng bol tàm uă tiah kung gam gơtìp kal ke, ngan là hìu bơnhă geh priă jền lơh geh ờ uă, ală tiah uă kal ke… Phó Củ tịc Quôk hội Trần Quang Phương đơs nền tơngume rềp ndo làng bol kơlôi rơcang mờ ờ suk bè bơta broă lơh tìs bơh cau tìs dê, tàm hơ̆ geh uă broă tung kơñau tràl sơbil ngan. Mblàng lơh loh bơta kơlôi rơcang do, Thứ trưởng Ƀộ Kwang àng Trần Quốc Tỏ pà git: “Bàr, pe broă ting kơñau gơlik geh tàm tơngai lài là geh ngan mờ làng bol kung đơs bơta kơlôi rơcang he dê. Ală broă gơlik geh den bol hi ndrờm gàr dồ bă sơrbac mhar, di tŭ lùp khàu git nền mờ lơh glài cau lơh tìs dồ bă sơrbac mhar, nền nòn, di jơnau sồr. Mơya bơh cồng nha lùp khàu den gŏ là tàm tơngai mờr sa tềp tàm lồi nam den cau lơh tìs gơguh uă, do là bơta geh ngan. Dơ̆ 2 tai là 2, 3 nă cau lơh tìs uă ngan là ngir ma túy, geh tềl tơnggŏ “ngáo đá” kung uă sơl. Dơ̆ 3 den kung là tài ală cau gơtìp aniai ờ lơh jat nền nòn jơnau sồr bè pràn jak tơngkah lài, rơcang ngac mờ rơcang lài pơgồp bal rơcang sơndră, broă do bol hi neh pơgồp bal mờ kâp hơ đơm, mờ ală mpồl lơh broă tàm ƀòn lơgar, ngan là cau gơtìp aniai nàng lơh niam broă lơh mblàng yal, rơcang sơndră”.

Ủy ƀan Thường vụ Quôk hội sồr Cíñ phủ đơng lam ală Ƀộ, gah broă lơh geh gơ rềng mờ ală tiah tềng đap mat mhar geh broă lơh bơsong ală anih tơrlah halà ntrờn ală hìu bơnhă làng bol lik bơh tiah sơbơng roh nàng gàr niam rài kis mờ broă lơh sa. Ƀộ Lao động, Thương ƀiñ mờ Xã hội bơsong, gàr niam gơnoar kuơ ai ală cau gơtìp kòp broă lơh in. Ƀộ Kông thương geh broă lơh atbồ geh cồng nha broă lơh tac phan online nàng gàr niam gơnoar kuơ cau ngui sa in. Ƀộ Kwang àng sơlơ tơnguh tai ală broă lơh gàr niam lơngăp lơngai, ring lơngai mpồl bơtiàn, ngan là tàm dơ̆ sa tềp Tây mờ sa tềp bơhiàn yau mờr tus.