Mờ cau geh bơngă pin dờn tàm làng bol kòn cau dùl êt nă cau là dùl tàm ală cau neh lơh rề ơnàng geh broă lơh hơ̆. Broă sơlơ yal tơngĭt jơnau ai cau geh bơngă pin dờn in là gùng dà di pal ngan, là bơta lơh jăt ngan ngồn gùng dà bơh Đảng dê, adat boh lam bơh Dà lơgar dê bè broă kòn cau mờ broă lơh kòn cau; tơngŏ bơta sền gròi bơh Đảng, Dà lơgar dê gơwèt mờ làng bol kòn cau dùl êt nă cau đơs bal mờ cau geh bơngă pin dờn đơs is.

Tŭ do, kờp jơh khà cau geh bơngă pin dờn tàm tiah làng bol ală kòn cau dùl êt nă cau là 29 rbô 567 nă (khà kờp nam 2021). Ală nam do, broă ai lơh jăt mờ lam lơh jăt ală broă lơh dong kờl ai cau geh bơngă pin dờn in pơgồp bơnah tơnguh uă bơta gĭt wă bơh jơh gùt mpồl bơtiàn dê bè broă lơh, gơnoar broă bơh cau geh bơngă pin dờn tàm làng bol kòn cau dùl êt nă cau dê mờ kơnòl bơh ală mpồl cau mờ cau dùl nă să is dê geh gơrềng tàm broă lơh ătbồ, hòi jà làng bol sền gàr lơngăp lơngai rơndăp tăp sèng niam mờ sền gàr Dà lơgar.

Broă lòt còp, pơndờm pơnđiang mờ dong kờl phan bơna mờ nùs nhơm ai cau geh bơngă pin dờn in tàm tơngai lài dờp geh uă ngan bơta sền gròi, sồr lơh mờ lơh jăt di tŭ wil tơl. Broă lơh dong kờl gơwèt mờ cau geh bơngă pin dờn tàm làng bol kòn cau dùl êt nă cau neh lơh gơlik geh mpồl ƀươn ngan nàng kâp ủy Đảng, gơnoar ătbồ, ƀan, ngàñ, mpồl cau, ƀòn lơgar mờ kwơmàng là ală cau să tờm tơn lơh broă lơh kòn cau in ngui nàng hòi jà mờ lơh rề ơnàng uă ngan rlau jơh gơnoar broă kwơmàng ngan bơh cau geh bơngă pin dờn dê. Bơh hơ̆, khi lơh rề ơnàng gơnoar broă jơh nùs ngan tàm ală broă bơh rài kis mpồl bơtiàn dê, geh uă tă pơgồp geh ngan tàm ală srơh tàm pơrlòng kờñ gơboh dà lơgar, bơtàu tơnguh lơh sa- mpồl bơtiàn, tơn jơh jơgloh tơrmù rƀah, bơ̆t bơtàu rài kis niam chài, sơlơ tơnguh tai mpồl tam klăc dờng jơh gùt jơi bơtiàn, sền gàr lơngăp lơngai cíñ trị, rơndăp tăp sèng niam mpồl bơtiàn mờ sền gàr tiah ơm kis ƀòn brê bơnơm tàm tiah jơi bơtiàn kòn cau dùl êt nă cau.

Tàm dơ̆ tìp măt đềt mềr cau geh bơngă pin dờn tàm ƀòn lơgar pa do, ồng Đỗ Trọng Hưng, Ƀí thư Tỉñ ủy Thanh Hoá đơs, mpồl cau geh bơnhă pin dờn tàm làng bol kòn cau dùl êt nă cau neh jơh nùs tus bal mờ hòi jà làng bol tus bal lơh ală broă lơh bơh mpồl bơtiàn dê, geh uă tă pơgồp geh ngan ai bơta bơtàu tơnguh lơh sa- mpồl bơtiàn in. Bơh bơngă pin dờn, mờng chài mờ bơta gĭt wă, cau geh bơngă pin dờn sùm lơh krơh lam lài, jơh nùs mblàng yal, hòi jà làng bol kòn cau dùl êt nă cau lơh jăt jơnau sồr, gùng dà bơh Đảng dê, adat boh lam Dà lơgar dê; bơ̆t bơtàu mpồl tam klăc dờng jơh gùt jơi bơtiàn, rơndăp tăp sèng niam mpồl bơtiàn tàm ƀòn lơgar, bơtàu tơnguh lơh sa; sền gàr bơhiàn bơh yau, ngui niam bơta niam chài krơi is kòn cau dê. Ồng Đỗ Trọng Hưng, sồr: Añ sồr ală cau geh bơngă pin dờn tàm làng bol kòn cau dùl êt nă cau pơn jăt tai lơh niam gơnoar broă cau tờm bơh he dê, sùm lơh krơh lam lài tàm broă lơh rài kis pah ngai, tàm pơndờm pơnđiang tề lam hìu bơnhă cau pròc mhàm, làng bol tiah ơm kis lơh jăt niam jơnau sồr bơh Đảng dê, adat boh lam bơh Dà lơgar dê, jơh nùs tus bal lơh ală srơh tàm pơrlòng kờñ gơboh dà lơgar, tơrgùm bơtàu tơnguh lơh sa- mpồl bơtiàn, lơh pràn lơh broă lơh sa, brồ guh klàs rƀah kơ̆ kơl jăp, rơcăng lài jòi lùp, đòm jăt mờ lam lơh ală broă lơh bơtàu tơnguh lơh sa- mpồl bơtiàn, bơh hơ̆ bơto pơlam làng bol lơh jăt bal. Sùm gàr bơta tam klăc đềt mềr mờ kâp ủy, gơnoar ătbồ mờ mpồl lơh broă geh gơnoar tàm broă tam dră mờ rơcăng sơndră mờ cau lơh tìs, kơryan broă lơh mblàng yal, bơto yal jơnau yàng ờ di tìs mờ adat boh lam tàm tiah kòn cau dùl êt nă cau mờ tiah kơh bơnơm, sền gàr mờ ngui niam bơhiàn niam chài krơi is bơh yau niam bơnĕ bơh jơi bơtiàn dê, gơ jăt bal mờ broă sang tĕ jơh ală bơhiàn bơh yau bơrngơl gơla ờ gam kwơ tai, bơ̆t bơtàu ƀòn lơgar niam chài, tiah làng bol ơm kis gơguh jak, pơgồp bơnah bơ̆t bơtàu ƀòn lơgar tờm ngai sơlơ jak chài bơtàu tơnguh, pas niam mờ lơh krơh lài.

Ală nam do, rài kis phan bơna mờ nùs nhơm bơh làng bol kòn cau dùl êt nă cau mờ tiah kơh bơnơm dê geh tam gơl loh làng ngan, khà hìu rƀah tàm làng bol kòn cau dùl êt nă cau gơmù mhar rlau; làng bol ngai sơlơ pin dờn dòn kơnờm tàm bơta đơng lam bồ bơh Đảng dê, bơta ătbồ bơh Dà lơgar dê, pơgồp bơnah sền gàr niam lơngăp lơngai cíñ trị, rơndăp tăp sèng niam jơh gùt mpồl bơtiàn. Lơh geh bơta do là kơnờm bơta tă pơgồp jơh nùs ngan bơh mpồl cau geh bơngă pin dờn dê. Jăt Kơrnoăt sồ 12 nam 2018 bơh Thủ tướng Cíñ phủ dê, cau geh bơngă pin dờn rơ̆p geh dong kờl phan bơna, pơndờm pơnđiang nùs nhơm di dơ̆ sa tềp bơhiàn yau dà lơgar dê, sa tềp bơh ală kòn cau dùl êt nă cau dê; Lòt còp, dong kờl tŭ gơtìp kòp jê; tìp kal ke; geh yal tơngĭt jơnau bơh ală ơdŭ bơto pơlam, tề lam bơta gĭt wă; lòt còp sền, bơsram, cribơyai bơta mờng chài mờ pà sră ƀăo...

Bal mờ hơ̆, ală kâp ủy Đảng, gơnoar ătbồ, mặt trận dà lơgar, mpồl lơh broă cíñ trị- mpồl bơtiàn neh bơyai lơh pà ờs mờng sră ƀăo Kòn cau mờ Bơtàu tơnguh mờ sră ƀăo ƀòn lơgar ai jơh ală cau geh bơngă pin dờn in tàm jơh gùt lơgar; bơyai lơh 4 rbô 453 dơ̆ pơrjum mblàng yal, yal tơngĭt jơnau; bơyai lơh 1 rbô 882 broă lơh bơto pơlam, tề lam bơta gĭt wă; bơyai lơh 24 rbô 303 dơ̆ lòt còp, tìp măt lơh kwèng lùp bơsram bơta mờng chài tàm ală càr, ƀòn dờng tàm càr lơgar Hà Nội ai cau geh bơngă pin dờn tàm jơh gùt lơgar in.

Mìng is tàm ală dơ̆ pơrjum yal tơngĭt jơnau, cau geh bơngă pin dờn geh kơno yal bè broă cíñ trị, lơh sa- mpồl bơtiàn bơh ƀòn lơgar dê nam lài mờ broă rơndăp lơh jơnau kờñ nam tơnơ̆; geh yal tơngĭt jơnau bè bơta lơngăp lơngai cíñ trị, rơndăp tăp sèng niam mpồl bơtiàn bơh ƀòn lơgar mờ tàm jơh gùt lơgar dê; bè ală jơnau jòi kai kơrmơi pa, broă lơh gơlik ring lơngai bơh ală bol gơjrañ kwềng dê tam dră lơh aniai Dà lơgar Việt Nam mờ broă lơh jăt broă lơh kòn cau, broă lơh dong kờl kòn cau tàm tơngai tus. Kwơmàng, Ƀan Kòn cau càr gam bơyai lơh ai uă cau geh bơngă pin dờn in ngan là khà cau geh bơngă pin dờn kơnòm să lòt bơsram, cribơyai bơta mờng chài mờ lòt còp bàr pe broă lơh tơrlòng lài bơtàu tơnguh lơh sa. Do là bơta ƀươn, tŭ niam nàng bơtàu tơnguh, rề ơnàng lơh uă ală broă bơceh lơh, broă lơh tơrlòng lơh sa jak, geh cồng nha tàm tiah làng bol kòn cau dùl êt nă cau. Ồng Nguyễn Văn Sài, Phó Kwang ătbồ Cơldŭ Lao động, Thương ƀiñ mờ Xã hội mờ Kòn cau kơnhoàl Văn Lãng, càr Lạng Sơn, pà gĭt: Bol añ geh lơh ngan tơrgùm broă lơh sồr lơh, pơlam gùng dà lơh bè lơi lơh rề ơnàng geh gơnoar broă cau geh bơngă pin dờn dê đơs bal, pơlam gùng dà ngan là mpồl cau geh bơngă pin dờn sơnam gam kơnòm nàng lơh niam gơnoar broă, uă cau geh bơngă pin dờn sơnam gam kơnòm den khi geh tă pơgồp uă bơta pràn, kwơmàng là khi ñhap ñhar rlau tàm bơtàu tơnguh lơh sa hìu bơnhă mờ bơyai lơh hòi jà làng bol...

Bơh ală ơdŭ bơto pơlam yal tơngĭt jơnau, cau geh bơngă pin dờn gam geh bơto yal, yal tơngĭt jơnau pa bè jơnau  sồr, gùng dà bơh Đảng dê, adat boh lam bơh Dà lơgar dê; broă bơtàu tơnguh lơh sa- mpồl bơtiàn gơ jăt bal mờ sền gàr kơ̆ sền gàr dà lơgar mờ bơta lơngăp lơngai; yal tơngĭt jơnau bè sền gàr rài kis niam chài krơi is mờ tam klăc jơi bơtiàn ƀòn lơgar. Kwơmàng, cau geh bơngă pin dờn geh bơto yal, gĭt nền ală bơta gĭt wă tờm mờ tơngume, gùng dà broă lơh mblàng yal, hòi jà tàm tiah làng bol kòn cau dùl êt nă cau nàng lơh bơnàng jă tàm broă lơh hòi jà làng bol tàm ƀòn lơgar. Jăt mò Ma Thị Như Trang, Phó Củ tịc Ủy ƀan Mặt trận dà lơgar Việt Nam kơnhoàl Hàm Yên, càr Tuyên Quang, đơs: Tŭ do, jơh gùt kơnhoàl geh 195 nă cau geh bơngă pin dờn tàm làng bol jơi bơtiàn kòn cau dùl êt nă cau, do là ală oh mi pơnrơ ngan tàm broă lơh jăt broă lơh mblàng yal hòi jà làng bol tàm ƀòn lơgar lơh jăt gùng dà, jơnau sồr bơh Đảng, adat boh lam bơh Dà lơgar dê, kwơmàng tàm broă lơh tơn jơh jơgloh tơrmù rƀah, bơ̆t bơtàu ƀòn lơgar pa tàm ƀòn lơgar.

Broă yal tơngĭt jơnau ai cau geh bơngă pin dờn ờ mìng là phan sa nùs nhơm lơm mờ gam là sră pơ àr kwơ, là jơnau kwơ nàng cau geh bơnhă pin dờn lơh jăt niam broă lơh mblàng yal jơnau sồr, gùng dà bơh Đảng dê, adat boh lam bơh Dà lơgar dê ai làng bol kòn cau dùl êt nă cau in; bơto yal bơta mờng chài bè bơtàu tơnguh lơh sa- mpồl bơtiàn, tơn jơh jơgloh tơrmù rƀah mờ pơgồp bơnah tàm broă prăp gàr, ngui niam bơhiàn niam chài krơi is ală jơi bơtiàn tàm ƀòn lơgar dê...Bơh hơ̆, neh dong làng bol kòn cau dùl êt nă cau tơnguh uă bơta gĭt wă, bơtàu tơnguh rài kis phan bơna mờ nùs nhơm ai hìu bơnhă, ƀòn lơgar in sền gàr kơ̆ lơngăp lơngai cíñ trị tiah kòn cau, tiah kơh bơnơm mờ tiah nhàr lơgar.