Song dơpă mờ geh kơnòl. Hơ̆ là jơnau đơs bal bơh kwang bàng mờ cau tĕ khà dê tàm 2 ngai mờ nggùl lùp mờ hơ jơnau lùo. Ală kwang bàng Quôk hội neh geh jơnau lùp lơyah, loh làng, jat mpồl broă, đơs di bơta geh ngan rài kis; kuơmàng, ờ rơngòt đơs tus ală broă geh sền gròi uă tàm mpồl bơtiàn. Song dơpă đơs ală bơta ờ niam, ală kwang bàng kơp kờñ Cíñ phủ, ală ƀộ, gah broă lơh pơn jat tai geh ală broă lơh kràñ cê, geh cồng nha, tài bơta bơtàu tơnguh mhar, kơ̆ kơljap bơh dà lơgar dê: “Lùp mờ hơ jơnau lùp bal mờ dùl nùs nhơm duh hồl, song dơpă, tơrgùm bơh broă sồr lơh bơh Củ tịc Đoàn dê kung bè jơnau đơs bơh cau lùp mờ jơnau hơ bơh ală kwang atbồ gah broă lơh dê, bơh Phó Thủ tướng Cíñ phủ dê mờ nùs nhơm song dơpă, cèng bơta bơt bơtàu”.

“Ală jơnau lùp tŭ kwang bàng pơyua tus kwang atbồ gah broă lơh neh hơ di ngan. Añ gŏ gơ lơh niam ngan mờ ală broă lơh Ƀộ trưởng neh đơs”.

Poan nă kwang atbồ gah broă lơh neh hơ jơnau lùp ndrờm là ală Ƀộ trưởng, kwang atbồ gah broă lơh dơ̆ sơn rờp hơ jơnau lùp tàm Quôk hội khoă XV. Mờ nùs nhơm loh làng kơnòl, loh làng broă lơh mờ hơ pơrgon tàm broă sồr lơh, atbồ, đơng lam, ală Ƀộ trưởng, kwang atbồ gah broă lơh neh ờ pleh ală jơnau lùp mờ jơnau tàm pơndang bơh kwang bàng dê, geh broă lơh ngan ngồn mờ uă broă kwang bàng đơs. Bàr, pe nă kwang bàng Quôk hội đơs: “Añ gŏ Ƀộ trưởng Ƀộ Tài nguyên mờ Môi trường pin dờn, song dơpă hơ tơn tàm jơnau lùp bơh kwang bàng Quôk hội dê. Bơnah hơ jơnau lùp bơh Ƀộ trưởng dê 1/5 là añ niam nùs. Añ neh neh yơr ƀàng tàm pơndang nàng lơh loh tai ală broă lơh sơgràm dà lềng tàm broă lơh tơnhàu bràs lơh gơ rềng tus tiah kis dà lềng”.

“Gah Kông thương, anih atbồ dà lơgar pal geh dùl jơnau kơlôi sơnơng, sền sơ wì ală jơnau lơi lơh mpồl lơh sa kă bro ruc bơh drà kă bro. Ală mpồl lơh sa kă bro hơ̆ kă bro gah lơi. Sơnam lơh broă bơh mpồl lơh sa kă bro hơ̆ dê là kàr lơi nàng geh broă lơh dong kờl dipal. Geh bè hơ̆ den bol he hơ̆ sồng geh broă lơh dong kờl mpồl lơh sa kă bro”.

Hơ jơnau lùp tềng đap Quôk hội, Ƀộ trưởng Ƀộ Tài nguyên mờ Môi trường ồng Đặng Quốc Khánh đơs loh kal ke bè phan lơh broă ai ală rơndap broă lơh kuơmàng dà lơgar in, ngan là rơndap broă lơh gùng rơndeh ntoat mhar; đơs ală broă nàng lơh kis wơl ală “dà dờng neh chơt” tài ƀơ̆ ƀơl kơn jơ̆ ngan.

Đơs nền tơrgùm sền gròi bơtàu tơnguh niam chài tiah làng bol jơi bơtiàn dồ êt nă cau, Ƀộ trưởng Ƀộ Văn hóa – Thể thao mờ Zu lịc ồng Nguyễn Văn Hùng đơs là: Broă lơh phan bơna niam chài kâp hơ đơm là bơta pal geh mờ tơl nàng lơh gơs tiah ơm kis niam chài. Mờ kung pà git, rơp geh broă lơh dong kờl pa lơh gơlik bơta ƀuơn ngan rlau jơh ai cau pơrjum, cau chài in tơnơ̆ tơngai pơrlòng, bơyai lơh…

Hơ tềng đap Quôk hội, Phó Thủ tướng Cíñ phủ ồng Trần Hồng Hà đơs nền ală broă lơh đơng lam giă nàng kờñ gàr jơnau kờñ sền gròi bơta roh giă priă tŭ lam lơh tam gơl wơl priă nhai bơh ngai 01/7 tus. Mò Phạm Thị Thanh Mai, mpồl kwang bàng ƀòn dờng Hà Nội đơs: “Phó Thủ tướng là cau geh mờng chài hơ jơnau lùp tàm ală dơ̆ pơrjum Quôk hội dê. Bol hi sền gŏ ală broă gơ wèt gah broă lùp Phó Thủ tuớng kung git loh, đơs song tàm ală broă geh lùp. Geh ală tơngume ngan ngồn mờ jơh bal mờ broă rơndap lơh den bol hi kơp kờñ pal geh tŭ tơngai nàng hơ pơrgon lam lơh mờ pal geh broă rơndap lơh lam lơh jat. Bơta do kuơmàng ngan nàng cau tĕ khà, làng bol, kung bè Quôk hội in jat sền”.

Bal mờ ală broă lơh mờ jơnau hơ pơrgon geh ală ƀộ trưởng, kwang atbồ gah broă lơh đơs tàm dơ̆ pơrjum do, kwang bàng mờ cau tĕ khà kơp kờñ là, gùng dà broă lơh jat sền rơp geh lơh jat jơh nùs nàng gàr ală broă lơh geh lam lơh, lơh geh cồng nha tơnơ̆ dơ̆ lùp mờ hơ jơnau lùp tàm bơta ngan ngồn.