Tàm tơngai lài, rơndap broă sồ 8 neh cèng wơl uă tam gơl niam ai rài kis cau ùr mờ kơnòm dềt tàm tiah kal ke in, ai tơnggŏ loh làng ngan bơh ală broă lơh dong kờl broă lơh sa, mblàng yal tơnguh jơnau git wă, rơcang lài kơryan bơta bau gờñ, tam lơh tam pờng tàm hìu bơnhă. Tàm tŭ lam lơh, Mpồl tam klac cau ùr Việt Nam là mpồl tờm ngan lam lơh jat ală tơngume bơh Rơndap broă lơh sồ 8 dê. Mpồl neh ai gŏ bơta crăp rơcang, geh kơnòl mờ pơnđơl pràn dờng ngan, bơh broă bơyai lơh tus ai priă bơcri. Kơnờm bơh hơ̆, uă cau ùr rƀah, cau ùr nă să, kơnòm ùr tàm tiah sar lơgar ngài neh geh dờp ală broă dong kờl, bơh hơ̆ brồ guh tàm rài kis.

Bulah bè hơ̆, bơdìh mờ ală cồng nha niam, broă lam lơh Rơndap broă lơh sồ 8 kung gơtìp uă kal ke. Geh rlau 200 khà sồ nàng jat sền, tàm hơ̆ geh rlau 70 khà sồ gơ rềng tus ùr klau. Jat ồng Phùng Quốc Huy, Phó lam bồ Cơldŭ đơng lam pơgồp bal dà lơgar Broă lơh jơnau kờñ dà lơgar, bơta do mùl màl ngan, mơya gơ lơh gơlik bơta kơn jơ̆ dờng ngan ai kwang bàng tàm kâp sàh, kâp kơnhoàl lài do in, tiah mờ khà kwang bàng mìng drơng dùl kơnòl broă dồ êt ngan. Khi ờ geh tơl cau mờ phan bơna nàng tơrgùm jơnau yal tơnggit wil tơl. Phan bơna măi mok yal tơnggit jơnau tàm uă tiah gam ờ pràn, lơh broă git mờ jat sền jơnau yal kal ke ngan: “Tàm tŭ bơt bơtàu broă lơh, uă rơndap broă lơh dềt ndai ndrờm geh cih “ai lài cau ùr in”. Bulah bè hơ̆, bol he mìng rơp ơm wơl tàm broă lam lơh jat jơnau lơh nền mờ ờ hềt gơtùi lơh ngan ngồn “ai lài bè lơi”. Bơta do lơh bol he ờ gơtùi lơh gơ gơ gơs dùl broă jàu bè ùr klau mùl màl tàm ală rơndap broă lơh hơ̆ nàng gơtùi đo was mờ sền sơ wì”.

Den tàng, nàng tơnguh bơta ring bal ùr klau tàm tơngai tus, kờñ pal geh ală broă lơh cèng bơta ngan ngồn rlau. Lài ngan, kờñ pal tơrgùm priă jền tàm ală broă lơh neh ai gŏ geh cồng nha, ala mờ rah rài. Pơn rơy bè ală broă lơh sa ai cau ùr jơi bơtiàn dồ êt nă cau, ală ơdŭ bơta bơta chài kis, mblàng yal jơnau rơcang lài kơryan bau gờñ… neh ai gŏ cồng nha loh làng mờ pal geh lam lơh uă.

Dơ̆ 2 pal sền sơ wì wơl broă lơh tam pà priă jền. Dilah tơl mpồl mìng rài rài mờ dồ êt priă jền is, broă tơrgùm mờ ai priă bơcri rơp kal ke ngan. Ồng Phùng Quốc Huy đơs là, pal gàr sùm dùl bơnah priă is ai mpồl cau ùr in nàng lam lơh ală broă lơh tờm, bè hơ̆ den rơp ƀuơn rlau tàm broă atbồ mờ lam lơh ngan ngồn. Bơdìh hơ̆ tai, kờñ pal sơlơ jàu gơnoar ai ƀòn lơgar in, jàu tai broă mờ priă jền nàng gơnoar atbồ sàh, kơnhoàl in rơcang lài bơceh lơh ală broă lơh dipal mờ bơta geh ngan mờ jơnau kờñ mùl màl bơh tơl tiah dê: “Bol he kờñ pal tơrmù ƀà priă jền gơ ơm wơl tàm dà lơgar, ala mờ hơ̆ là jàu uă rlau ai kâp hơ đơm in. Ƀòn lơgar là tiah git loh ngan rlau jơh rài kis làng bol, jàu gơnoar khi in rơp dong ală broă lơh di mờ bơta geh ngan mờ geh cồng nha rlau”.

Dùl broă ndai kung pal sền gròi ngan là tơn jơh ală bơhiàn ờ niam gam gơlik geh bè bau gờñ, bau cau rềp jơi nòi… Do kung là ală jơnau tờm ngan lơh gơ kòl tus bơta bơtàu tơnguh bơh cau ùr mờ kơnòm dềt jơi bơtiàn dồ êt nă cau dê. Bal mờ hơ̆, kờñ pal pơgồp bal đah ală gah broă nàng pleh gơ tàm rơndap rơndồl kơnòl broă, ngui geh cồng nha priă jền.

Broă tơnguh gơnoar broă bơh cau ùr dê, sền gròi kơnòm dềt in ờ mìng là gơnoar kuơ dipal mờ gam là bơcri ai tơnơ̆ do jŏ jòng. Tàm tơngai tus, ring bal ùr klau pal geh lam lơh ngan ngồn rlau, hơ̆ là geh jơnau kờñ mùl màl, geh bơta đo was loh làng, geh priă jền tơrgùm bal, geh bơta tus bal rơcang lài bơh gơnoar atbồ kâp hơ đơm dê. Geh bè hơ̆ den bol he hơ̆ sồng ngan ngồn cèng wơl bơta tam gơl niam, kơ̆ kơljap ai rài kis bơh cau ùr mờ kơnòm dềt tàm tiah jơi bơtiàn dồ êt nă cau in – pơgồp bơnah lam lơh geh cồng nha broă rơndap lơh dà lơgar bè ring bal ùr klau tus nam 2030.