Bơh nam 2022 tus jơh nhai 6 nam do, Quôk hội geh jơnau lơh nền tơrmù 2% dia priă  gơguh tai gơ wèt mờ ală mpồl phan bơna, broă drơng ala gam ngui khà dia gơguh tai 10% (gam 8%). Nàng kờñ chồl tơnguh lơh gơlik phan, tac bro phan, tơnguh jơnau kờñ ngui sa, lơh jat jơnau kờñ gơguh lơh sa geh 85 rlau hơđang, Cíñ phủ pơn jat tai yal Quôk hội in Jơnau rơcang cih Jơnau lơh nền tàm pơrjum bơh Quôk hội dê bè tơrmù dia gơguh tai ai 6 nhai lồi nam 2025 mờ ai jơh gùt nam 2026 in. Mùl màl, rề ơnàng mpồl cau geh tơrmù 2% dia priă gơguh tai gơ wèt mờ phan bơna, broă drơng ala drơng ai broă lơh gơlik, tac bro phan, lòt nhơl, ngui sa bè: phan bơna, broă drơng ala măi mok yal tơnggit jơnau, phan bơh phan kră neh mòn lờs, chah, zờu lơh gơlik ờ bơrlŭ, phan dà sơnơm, chah tàm bơnah broă blơi bơh lơgar ndai mờ chah tac tàm bơnah tac bro, xăng, zờu. Ờ tơrmù dia gơguh tai gơ wèt mờ bàr, pe mpồl phan bơna, broă drơng ala bè: Viễn thông, priă jền, anih priă jền, cứng khoán, ƀảo hiểm, tac bro ù tiah hìu đam, phan kră, phan tơnhàu tàm ù (ờ kờp chah), phan bơna mờ broă drơng ala kong dia tac ngui krơi is (ờ kờp xăng zờu).

Ring bal mờ jơnau sồr do, ală kwang bàng tàm Anih duh broă lơh kơnòl broă sùm Quôk hội sồr pal sền sơ wì loh rlau tai gơ rềng bơh broă lơh dê. Kwang lam bồ Anih lơh broă Lơh sa mờ Priă jền ồng Phan Văn Mãi sồr: “Bơh bơta tềm pềr, rơndap tap sèng mpồl lơh broă sră pơ àr gơnoar atbồ he dê mờ pal lơh ală kơnòl tă dơ̆ ngui. Lam lơh ală broă lơh den dan Cíñ phủ sền sơ wì broă gơlik geh ai, tă do nàng gơtìp kờp jơh jơnau tàm pơn ring kes priă”.

Mblàng lơh loh tai, Phó Thủ tướng Cíñ phủ ồng Hồ Đức Phớc pà git: “Gơ wèt mờ Jơnau lơh nền tàm pơrjum do rơp tơrmua dia rlay 232 rbô tơmàn đong tàm nam do. Cíñ phủ rơp sồr lơh, geh broă lơh lùp dồs priă dia nàng gàr tàm pơn ring kes priă. Nam do den bơnah tơm priă nhai ơm ờ lơh broă mờ tơrmù mpồl cau lơh broă sră pơ àr gơnoar atbồ bol he gam ai tàm kes priă prap rơcang lài priă nhai mờ kung tă bơh kes priă”.

Jat jơnau rơcang cih, tơngai ngui Jơnau lơh nền tàm pơrjum bơh ngai 01/7/2025 tus jơh ngai 31/12/2026.

Kung tàm dar pơrjum dơ̆ 44, Anih duh broă Lơh kơnòl broă sùm Quôk hội neh ai jơnau đơs bè broă tam gơl, bơ tơl jơnau cih bè Jơnau pal jat dơ̆ pơrjum Quôk hội. Broă do nàng kờñ gàr bơta ring bal mờ mpồl cau lơh broă sră pơ àr gơnoar atbồ bơh ală anih lơh broă Quôk hội dê tơnơ̆ tŭ lam lơh rơndap tap sèng, ring bal mờ ală jơnau cih tàm ală adat boh lam pa ai tơlik, pơn jat tai tơnguh cồng nha lơh broă bơh Quôk hội dê tàm tŭ tơngai pa. Jat hơ̆, ală jơnau rơcang cih Jơnau lơh nền tàm pơrjumn, jơnau yal mblàng lơh loh, cih dờp, tam gơl jơnau rơcang cih adat boh lam, jơnau rơcang cih jơnau lơh nền tàm pơrjum yal Quôk hội in ring bal mờ đơs bàr pe broă gam geh jơnau đơs krơi is rơp pơyua tus cau ala mat Quôk hội kơlôi sơnơng, lơyài ngan rlau jơh là 48 jơ lài mờ dar pờ tê ring bal, gơguh rlau 2 dơ̆ pơndrờm mờ jơnau cih tŭ do. Jơnau rơcang cih kung cih tŭ jơ tơl nă cau ala mat Quôk hội geh jơnau đơs dơ̆ 1 là ờ rlau 5 phuk, dơ̆ 2 là ờ rlau 2 phuk. Jơnau rơcang cih gam cih tŭ jo pah dơ̆ mblàng lơh loh bơh anih lơh broă, mpồl lơh broă, cau geh gơnoar dê ờ rlau 15 phuk.

Tàm dar pơrjum, Củ tịc Quôk hội ồng Trần Thanh Mẫn đơs nền: “Sơlơ tơnguh bơta loh làng, song dơpă. Dơ̆ 2 là añ gŏ pal tơnguh bơta niam cribơyai, jơnau sồr bè tŭ jơ, pleh đơs jòng ir, gàr tơl jơnau đơs ndrờm tơrgùm tàm tơngume tờm. Den tàng sồr cau ala mat đơs mơya pal rơcang lài nền nòn, geh tŭ gơtuì pơyua Mpồl gơnoar cih in lài nàng gơtùi tơrgùm wơl. Dơ̆ 3 tai là Quôk hội lơh bè lơi tus do sơlơ tơnguh bơta cribơyai mờ cau tĕ khà. Tàm Quôk hội sồ den bol he pal kờp dŭ tus broă do”.