Mờ hìu ơnàng 70 thơk vuông geh 2 cơldŭ bĭc, dùl cơldŭ năc bal mờ wil tơl broă bơ̆t bơtàu ndai bè hìu trŭ gơm băp piang mờ hìu jă brê, hìu pa lơh niam tre neh dong hìu bơnhă mò Nay Hdoănh, tàm thôn Mơ Nai Trang, sàh Ia Piar, kơnhoàl Phú Thiện lơh jăt bơta kơ̆p kờñ ơm kis kơ̆ kơl jăp. Ngai ntrờn rê mŭt ơm hìu lơh kơ̆ kơl jăp, dờng rơđiàh, mò ngoh rơngăc yal: Lài do, hìu bơnhă mò kis tàm dùl nơm hìu swĕ sơkềng lơm, nhai mìu den ñhăt dà mìu, kàl prang den tơngai jroh tơngai sòl duh tơr ồ ngan. Tŭ do geh hìu ơm niam kơ̆ kơl jăp, hìu bơnhă mò ờ gam pal kơlôi rơcăng bè anih ơm tai mờ gơtùi iang nùs lơh sa, rơcăng ai oh kòn in bơsram sră tus gùng tus dà. Bơta chờ hờp bơh hìu bơnhă mò Nay Hdoănh dê kung là bơta chờ hờp bal bơh 355 hìu làng bol ndai dê geh dong kờl tơn jơh hìu ing, hìu ồm sèt ñhăt dà mìu tàm kơnhoàl Phú Thiện.

“Geh Đảng, Dà lơgar sền gròi lơh pà dùl nơm hìu bè do, añ brơn brài ngan. Añ ờ kơlôi là añ geh ngai geh đau dùl nơm hìu niam bè hơ̆. Ưn ngài ală kâp đơng lam, ưn ngài broă lơh neh dong hìu bơnhă añ geh rài kis niam rlau”.

Bal mờ kơnhoàl Phú Thiện, kơnhoàl Chư Prông là ƀòn lơgar geh rlau 1 rbô nơm hìu ing, hìu ồm sèt ñhăt dà mìu kờñ tơn jơh- kung gam lơh ngan tam gơl pràn nàng lơh gơs broă lơh di tơngai. Gĭt nền do là kơnòl broă tờm kwơmàng, gơcèng bơta kwơ niam chài kòn bơnus jrô ơnàng ngan, Mpồl Sồr lơh srơh tơn jơh hìu ing, hìu ồm sèt ñhăt dà mìu bơh kơnhoàl dê neh jàu broă ală cau tàm mpồl in jơh nùs ơm rềp mờ ƀòn lơgar nàng sền swì, sồr lơh. Ồng Đinh Văn Dũng, Ƀí thư Huyện ủy, Củ tịc Mpồl duh broă Làng bol kơnhoàl Chư Prông, lam bồ mpồl sồr lơh pà gĭt, kơnhoàl neh hòi tơrgùm jơh ală bơta pràn, tơrgùm uă ngan rlau jơh nàng tă bơsong kal ke, lam lơh geh cồng nha broă lơh. Bal mờ hơ̆, kơnhoàl neh pơgồp bal ală bơnah priă, ai 54 tơmàn đong nàng lam lơh broă lơh. Ală sàh lơh pràn mblàng yal, hòi jà làng bol hòi tơrgùm cau lơh hìu là cau pròc mhàm, cau gơ̆p să, pơgồp bal mờ ală mpồl phàu crong lơh pồs ling tàm ù tiah he dê nàng tus bal lơh. Tus tŭ do, kờp jơh hìu sơnđờm lơh mờ lơh gơs bơh kơnhoàl dê neh sơrlèt 70%. Đảng ƀộ kơnhoàl gam tơngguh mhar, pơnđơl lơh sir jơh ală 997 nơm hìu lài mờ ngai 30/06/2025 do, nàng jơh 100% hìu rƀah, hìu pa jơh rƀah geh hìu ơm kơ̆ kơl jăp.

“Kờp bal pah ngai den bol hi tơrgùm hòi jà sơnđờm lơh bơh 8 tus 10 nơm hìu. Pah nhai, pah dơ̆, Mpồl sồr lơh kơnhoàl dê kờp sền nền wơl jơh ală broă, kơnòl broă nàng pơn jăt tai sồr lơh mhar; mơkung hòi tơrgùm bơta lơh bal bơh ală kâp dê, tă pơgồp tai cau lơh hìu. Tŭ do jơh gùt kơnhoàl geh 75% nă cau lơh hìu bơh ală hìu bơnhă dê tă pơgồp, gam wơl den bol hi hòi jà mặt trận, ală mpồl cau mờ mpồl phàu crong lơh pôs ling tàm ù tiah ƀòn lơgar dê nàng dong kờl cau lơh hìu. Bal mờ hơ̆, tơnguh tai broă lơh lòt sền, jăt sền nàng gàr broă bơ̆t bơtàu lơh geh bơta niam”.  

Tŭ do, càr Gia Lai neh lơh gơs 93% broă rơndăp lơh broă lơh tơn jơh hìu ing, hìu ồm sèt ñhăt dà mìu. Tàm kờp jơh 17 kơnhoàl, ƀòn drà dờng, ƀòn dờng den neh geh 10 ƀòn lơgar lơh sir broă jàu, ală ƀòn lơgar gam wơl ndrờm lơh geh bơh 70% tus 90% broă rơndăp lơh. Cồng nha do pà gŏ bơta đơng lam di tŭ, dipal bơh ală kâp ủy Đảng, bơta lơh bal bơh jơh ală anih lơh broă cíñ trị dê mờ bơta tơrgùm tê bal pơgồp bal pràn bơh jơh tơl nă làng bol dê.

Gùng lòt lơh jăt broă lơh tơn jơh hìu ing, hìu ồm sèt ñhăt dà mìu tàm càr Gia Lai là cơng tàng tơnggŏ loh làng ai gơnoar broă đơng lam sùm sùm mờ jơh nùs cíñ trị uă ngan bơh ală kâp ủy Đảng dê. Bơh càr tus ƀòn lơgar, broă pà kâp kơnòl broă, pà tơngâi lơh jăt, gàr sùm broă pơrjum tàm jàu broă lơh pah nhai mờ sền swì tŭ tơngai lơh pah poh neh lơh gơlik geh nùs nhơm rơcăng tàm pơrlòng uă làm bă tiah. Ală mpồl Đảng lơh gơnoar broă cau tờm, lòt lài tàm broă lơh hòi jà, hòi tơrgùm bơta pràn mpồl bơtiàn dê. Nùs nhơm “tàm dong tàm kờñ bal, nha ràm jơm glòm nha sèt” bal mờ jơnau đơs “cau lơi geh dà kơlhề pơgồp dà kơlhề, cau lơi geh phan pơgồp bal phan” neh geh lơh gơrề uă jrô ơnàng làm uă. Dồ ròt mpồl cau bè Kwang àng càr, Ling mpồl 15, mpồl Sền gàr tiah nhàr lơgar mờ ală mpồl phàu crong tàm ù tiah he dê neh tơrgùm tê bal tă pơgồp dà kơlhề, pơgồp bal pràn bal mờ gơnoar ătbồ mờ làng bol lam lơh broă lơh geh cồng nha. Bơta do dong lơh gơlik gơs bơta pràn tơrgùm bal nàng ƀòn lơgar in lơh gơlik geh gĭt nđờ rbô nơm hìu bal mờ uă broă jàu ngan rlau jơh, bè ờ kas ngan rlau jơh, mhar ngan rlau jơh, kơnhăp ngan rlau jơh,…ai ală hìu rƀah, hìu pa jơh rƀah, hìu bơnhă dờp bơta dong kờl mpồl bơtiàn dê. Ồng Rah Lan Chung- Phó Ƀí thư Tỉñ ủy, Củ tịc Anih duh broă Làng bol càr Gia Lai pà gĭt:

“Broă lơh tơn jơh hìu ing, hìu ồm sèt ñhăt dà mìu pal geh lam lơh dùl bă loh làng ờ ndơ̆p mpồn, làng bol lơh tờm, ring bal, song dơ̆ pă, pal geh bơta niam mờ geh cồng nha. Pal hòi tơrgùm uă ngan rlau jơh tơl bơta pràn bơh anih lơh broă, mpồl lơh broă, mpồl lơh sa kă bro, mpồl cau, cau dùl nă să is mờ mpồl bơtiàn dê, geh bal tàm dơlam mờ bơdìh càr. Bal mờ hơ̆, pal hòi jà làng bol tus bal tă pơgồp nàng tơngguh uă bơta niam hìu ơm. Mơkung sơlơ lòt sền, jăt sền, di tŭ jờng rơ, pà phan ƀàn ală mpồl cau, cau dùl nă să geh cồng nha jak chài ngan in”.

Broă lơh tơn jơh hìu ing, hìu ồm sèt ñhăt dà mìu tàm càr Gia Lai gam gơgơs là dong kờl, lơh gơlik geh bơta gơn kơnờm nàng làng bol in brồ guh klàs bơh rƀah, kơ̆ kơl jăp rài kis, pơgồp bơnah bơ̆t bơtàu ƀòn lơgar Gia Lai ngai sơlơ bơtàu tơngguh, pas niam, jak chài. Tàm hơ̆, ală mpồl Đảng neh lơh niam gơnoar broă là “nha bồng bi lam lài” tề lam, tàm tơrbŏ mờ lơh gơlik gơs dùl srơh jrô ơnàng làm uă, lơh gơrề nùs nhơm tam klăc dờng jơh gùt jơi bơtiàn, wèt tus jơnau kờñ bơtàu tơngguh kơ̆ kơl jăp tàm ƀòn lơgar.