Tàm anih lơh rơndap broă lơh Tiah lơh sa mờ măi mok mờ anih ơhò ơm Bãi Gốc, càr Dăk Lăk, git nđờ jơt nơm rơndeh kong goa, rơndeh chŏ ù bal mờ uă phan bơna, măi mok gam jal mhar cò tơnring ù, pờ gùng nàng lơh broă. Tơnơ̆ broă lơh dờng lơh broă uă ai ù lơh rơndap broă, Tiah lơh sa mờ măi mok Hoà Tâm neh lơh gơs ai ơpah rlau 215 lồ ù. Ồng Đỗ Văn Khánh - Phó Kwang lam bồ Công ty pơgồp ban bơcri priă mờ Bơtàu tơnguh phan bơna Tiah lơh sa mờ măi mok Hòa Tâm pà git, is ồn Anih ơhò ơm Bãi Gốc, jơh 64,9 lồ ù gờl neh geh jàu, lơh gơlik bơta niam nàng rơndap broă lơh lam lơh ală bơnah broă tờm tàm nhai 9 tus:

“Chủ tịch kung bè đơng lam Anih duh broă càr kung neh tơng gơs jơnum lơh broă sơrbac mhar lời is ai broă lơh ai ù lơh rơndap broă in bè pa do, kung kràñ ngan. Hơ pơrgon là bồ nhai 9 tus do rơp lam lơh, gàr tơl ală bơta pal geh bè adat boh lam mờ tiah lơh rơndap broă geh cau tờm lơh nàng lam lơh”.

Dùl anih lơh rơndap broă sơn đờm pờ măi kung là tŭ priă bơcri ngan ngồn mut tàm rài lơh sa. Do hơ̆ sồng là bơta đo was kuơmàng ngan tŭ ală ƀòn lơgar tơlik jơnau kờñ gơguh tai 2 nơm khà. Tàm pơrjum hòi jà bơcri priă nam 2026, càr Gia Lai geh kờp jơh priă bơcri cih tàm sră mờ kờp dŭ mờr 850 rbô tơmàn đong bơh 273 rơndap broă lơh. Ai càr Dăk Lăk kung jàu lơh nền ring bal gùng dà bơcri priă ai 25 rơndap broă lơh in, kờp jơh priă bơcri rlau 40 rbô tơmàn đong. Ală khà do ai gŏ bơta gơ kờñ bơh ù tiah bơtàu tơnguh pa dê. Mơya priă bơcri cih tàm sră mờ jơnau hơ pơrgon mìng rơp là bơta sơn đờm; bơta kuơmàng rlau là bơta pràn lơh ală jơnau hơ pơrgon hơ̆ gơ gơs rơndap broă lơh mùl màl. Ồng Đỗ Hữu Huy - Chủ tịch Anih duh broă Làng bol càr Dăk Lăk pà git, càr neh crơng gơs jơnum jat sền, dong kờl lam lơh ală rơndap broă lơh tơnơ̆ hòi jà bơcri priă:

“Kờñ pal jal mhar lơh sir ală broă rơndap lơh lam lơh jat ală jơnau lơh nền gùng dà bơcri priă, sră cơng tàng bơcri priă mờ jơh ală sră cih kah lơh broă bal neh geh jàu tàm pơrjum. Jơnum jat sền kờñ pal pơn jat tai lam lơh mơ broă rơndap lơh nàng lam lơh broă jàu kơnòl tàm lơh nền crơng gơs jơnum. Jàu loh cau, loh broă, loh tơngai hơ pơrgon, loh kơnòl mờ loh tơl rơndap broă lơh tus ngai rơndap broă lơh ngan ngồn lơh broă. Ờ lời cau bơcri priă lơh is tàm gơl gùng hơ̆”.

Bulah bè hơ̆, tơmut priă bơcri tàm broă lơh kung gam ờ hềt di là jơnau lơh geh dut ndơl. Gơguh tai gam gơwèt tàm bơta pràn dờp mờ ngui geh cồng nha priă bơcri. Dùl rơndap broă lơh bulah geh priă bơcri uă mơya ờ tơl ù lơh rơndap broă, sră pơ àr, phan ngui bơt bơtàu halà phan bơna tàm tơrbŏ bal den kung gam ờ hềt gơtùi lơh gơlik bơta kuơ. Bè hơ̆ den tàng, bal mờ gơ hòi gơ jà bơcri priă, ală ƀòn lơgar pal tơrmù tŭ tơngai bơh jơnau lơh nền tus anih lơh rơndap broă, bơh anih lơh rơndap broă tus lơh sa mờ drà kă bro. Jat ồng Nguyễn Ngọc Phúc - Phó Chủ tịch Anih duh broă Làng bol càr Lâm Đồng, ală priă jền kờñ pal geh bơta tàm tơrbŏ bal gơ gơs ală mpồl lơh broă bal mùl màl:

“Lâm Đồng geh uă bơta pràn bè lơh sa suơn sre ngui măi mok pa, lơh gơlik phan lơh gơs bơh suơn sre, năng lượng lơh geh wơl. Bơta kuơmàng là pal tơrbŏ bal ală priă jền gơ gơs mpồl lơh broă bal mùl màl, lơh gơlik phan bơna pa, măi mok pa, broă lơh sa pa, cèng wơl ală bơta kuơ ngan ngồn ai làng bol, mpồl lơh sa kă bro mờ rài lơh sa càr dê in gơguh tai 2 nơm khà, tơnguh sơñio khà tàm pơrlòng kâp càr”.

Bè hơ̆, bơta gơ hòi gơ jà bơcri priă ờ gam là dơ̆ tàm pơrlòng bè khà priă bơcri tai, mờ là bơta sac rơ wah priă bơcri di gùng, lơh gơlik priă jền gơguh tai mờ bơta pràn gơ rề uă. Tàm Khánh Hòa, tơnơ̆ tơrgùm dùl mờ càr Ninh Thuận, càr geh gùng gah dà lềng jòng mờr 500 kơi sồ, bal mờ ală anih ơhò dà lềng ơm mờ ală anih tờm logistics geh rơndap ù tiah. Ồng Trương Văn Tiến - Kwang lam bồ Anih tờm hòi jà bơcri priă, Kă bro phan mờ Lòt nhơl càr Khánh Hòa đơs là, bơta ai tơlik là gơtùi tàm tơrbŏ phan bơna do mờ phan bơh Tây Nguyên mờ tiah đah jum tàm gùl lơgar:

“Pal lơh bè lơi nàng ngui geh cồng nha rlau jơh ală anih ơhò dà lềng ơm bơh broă tàm tơrbŏ bal mờ tiah phan bơna tàm tiah đah jum Tây Nguyên. Lơh bè lơi nàng jà ală cau bơcri priă tàm lơh broă drơng ala jun pơndiang, logistics, lơh gơlik bơta ƀuơn ngan rlau jơh ai ală mpồl lơh sa kă bro in. Bơh hơ̆, lơh gơs anih tờm jun pơndiang phan bơna geh ù tiah dờng ơnàng”.

Mờ Tây Nguyên - tiah kềng gah dà lềng đah jum tàm gùl lơgar, tă bơsong bơta gơ kòl priă bơcri tài bè hơ̆ den tàng ờ di mìng là jơnau bè gơ hòi gơ jà bơcri priă. Hơ̆ là jơnau sồr lơh jơnau lơh nền, gùng dà broă lơh gơ gơs priă jền bơtàu tơnguh, lơh priă jền gơ gơs broă lơh, phan bơna, priă lơh geh mờ bơta pràn tàm pơrlòng rài lơh sa dê. Mờ hơ̆ kung là bơta mờ cau tĕ khà kơp kờñ geh sền gŏ tơnơ̆ tơl jơnau lơh nền; gùng dà broă lơh pal gơ mut ngan ngồn tàm rài kis, priă jền pal geh tă bơsong bơta gơ kòl, nàng gơ gơs cồng nha bơtàu tơnguh ngan ngồn.