Jat sền dơ̆ lùp mờ hơ jơnau lùp bơh kwang bàng Quôk hội dê gơ wèt mờ Ƀộ trưởng – Củ ñiệm Ủy ƀan Jơi bơtiàn kòn cau ồng Hầu A Lềnh tàm pơrjum dơ̆ 5, Quôk hội khoă XV, cau tĕ khà gùt lơgar đơs, Ƀộ trưởng neh tơrgùm hơ ală broă mờ kwang bàng Quôk hội sền gròi, mblàng lơh loh tơl làm ală broă gam ờ niam, mờ kung ai tơlik gùng dà nàng kờñ bơsong ală bơta ờ niam tàm gah broă lơh mờ he drơng lơh. Gơ rềng tus broă lam lơh broă lơh jơnau kờñ dà lơgar “bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm”, cau tĕ khà Trương Thế Vinh, kwang bàng lơh broă lơh kòn cau tàm kơnhoàl Ia Grai, càr Gia Lai đơs là, kwang bàng kâp hơ đơm gam ngan ngồn gơtìp kal ke tŭ lam lơh broă lơh. Cau tĕ khà ồng Trương Thế Vinh geh jơnau đơs: “Geh uă sră nggal bơh càr dê ờ hềt thàn ai tơlik pơndrờm mờ tŭ lam lơh broă lơh, ngan là tàm kâp hơ đơm ờ hềt geh jơnau pơlam mùl màl. Kuơmàng, rơndap broă lơh sồ 1 dong kờl hìu ơm, ù ơm, ù lơh sa jat Kơrnuat sồ 4 bơh Thủ tướng Cíñ phủ dê den dong kờl ù ơm mờ khà ai là 44 tơlak đông tàm dùl hìu bơnhă mờ ù lơh sa mờ 22 tơlak đông dùl hìu bơnhă den kal ke ngan nàng gơtùi lam lơh. Ù lơh sa ai làng bol in den giă kas ngan, mờ khà priă dong kờl bè pa yal mờ priă ai càn bè hơ̆ den làng bol ờ gơtùi blơi ù nàng lơh sa, lơh hìu”.

Ồng Lâm Tấn Bình- cau tĕ khà kòn cau Prum tàm xã Phan Hiệp, kơnhoàl Bắc Bình, càr Bình Thuận đơs, tàm dơ̆ sơn rờp cribơyai tàm pơrjum Quôk hội, Ƀộ trưởng neh hơ song ngan, mùl màl ală tơngume, ngan là ală broă bè gùng dà, broă lơh bơh Đảng mờ Dà lơgar dê gơ rềng tus kơnòl bơh Ƀộ dê mờ broă pơgồp bal mờ ală Ƀộ, gah broă lơh ndai. Ồng Lâm Tấn Bình kung tam pà ală kòl yan, kal ke mờ Ƀộ trưởng ồng Hầu A Lềnh neh mblàng lơh loh gơ rềng tus mpồl lơh broă, broă lơh dong kờl, ngan là broă ai priă bơcri bơtàu tơnguh lơh sa mpồl bơtiàn ai tiah jơi bơtiàn dùl êt nă cau in: “Gơ wèt mờ kơnòl bơh Ƀộ trưởng dê kung geh ai tơlik lài gùng dà tơngai mờr tus in là lơh bè lơi nàng làng bol in git mờ geh dờp ală gùng dà, broă lơh dong kờl bơh Đảng, Dà lơgar dê bơcri priă dipal mờ di jat jơnau kờñ bè bơta geh ngan rài kis làng bol jơi bơtiàn dùl êt nă cau tàm tiah kơh bơnơm dùl bă loh làng bè Ƀộ trưởng neh đơs nền tŭ cribơyai tàm dơ̆ hơ jơnau lùp mho do”.

Tềng đap Quôk hội, Phó Thủ tướng Cíñ phủ ồng Trần Lưu Quang pà git: Tus jơh nhai 5 pa do, bơnah priă bơcri bơh nam 2022 dê ai broă lơh do in mìng geh 58% priă bơcri bơtàu tơnguh, priă bơcri nam 2023 dê mìng geh 17% priă bơcri bơtàu tơnguh. Tàm tŭ mìng gam 2 nam mờ nggùl nàng lam lơh tơngai lơh broă dơ̆ 1 bơh rơndap broă lơh do dê, rlau mờ hơ̆ tai, uă làng bol jơi bơtiàn dùl êt nă cau dờp kuơ bơh broă lơh do gam gơtìp uă kal ke.

Phó Thủ tướng đơs ală kòl yan tờm tàm broă lam lơh broă lơh là tài khà sră nggal ai tơlik uă ngan den tàng geh bơta gơ tàm rơndap rơndồl, lơh gơbàn kal ke ai broă ai priă bơcri dà lơgar in. Phó Thủ tướng đơs nền tơngai tus rơp sơlơ tơnguh tă bơsong, lơh sir adat boh lam kơ̆ kơljap nàng Broă lơh geh ai priă bơcri di jat jơnau kờñ: “Bơta kuơmàng là bol hi rơp sơlơ tơnguh broă tam pà kâp ai kâp hơ đơm in nàng ală oh mi git rơcang lài lơh jat. Ală bơta mờ mìng geh kâp hơ đơm hơ̆ sồng git pal lơh bè lơi là di ngan rlau jơh. Nùs nhơm bal là pơn đơl pràn nàng pơn jat tai bơsong ală broă gơlik geh, lơh bè lơi nàng gơtùi bơsong bơta do di tơngai hơ pơrgon, di jơnau sồr mờ di jat jơnau kờñ bơh tơl nă cau dê”.

Tơn jơh mpồl broă lùp mờ hơ jơnau lùp gơ wèt mờ gah jơi bơtiàn kòn cau, Củ tịc Quôk hội ồng Vương Đình Huệ đơs, dơ̆ lùp mờ hơ jơnau lùp neh ai tơnggŏ nùs nhơm geh kơnòl, song dơpă mờ cèng bơta bơt bơtàu. Đơs loh uă bơta ờ niam, ngan là broă lơyài lam lơh ală Broă lơh jơnau kờñ dà lơgar. 2, 3 sră nggal pơlam ai tơlik lơyài halà ờ hềt ring bal, ờ hềt loh làng, ờ hềt geh khà ai mùl màl, Củ tịc Quôk hội sồr tơngai tus pal kràñ cê lam lơh ală broă lơh nàng lơh gơs mpồl tơl làm, di tŭ ală gùng dà, broă ai tơlik lài kuơmàng bè broă dong kờl jơi bơtiàn kòn cau ai tơngai bơh nam 2021 tus nam 2030 in. Hòi jà tơl bơnah priă jền nàng bơcri bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm, tàm hơ̆ tơrgùm tàm ù tiah uă kal ke, mpồl jơi bơtiàn kòn cau gam uă kal ke mờ geh bơta kal ke krơi is.