Bơh dùl lơgar blơi phan mờ lơgar ndai uă ngan, Việt Nam tam gơl să gơgơs lơgar tăc phan mờ lơgar ndai uă ngan; nam 2025 cih dờp nam dơ̆ 10 tăc phan mờ lơgar ndai uă ngan tàm pơn jăt sùm (kờp bơh nam 2016). Khà drà tăc phan mờ lơgar ndai geh priă lơgar ndai rlau 1 tơmàn dolar Mỹ kung gơguh mhar, bơh 27 drà nam 2013 gơguh tus 36 drà nam 2025. Nam 2026 geh gơtha is ồn kwơmàng, nam sơnrờp lam lơh Broă rơndăp lơh bơtàu tơngguh lơh sa – mpồl bơtiàn 05 nam bơh nam 2026- 2030, lơh broă tăc phan mờ lơgar ndai pal pơn jăt tai lơh jăt niam gơnoar broă là gơn kơnờm tờm, mơkung pal tam gơl pràn bơh gơguh tai jăt tăc uă phan mờ lơgar ndai tus gơguh tai jăt geh uă priă jền, geh cồng nha mờ kơnhăp jŏ, gơ jăt bal mờ tơngguh uă priă jền gơguh tai, khà bơnah măy mŏk mờ pràn jak rơcăng lài is bơh rài lơh sa dê. Ồng Trần Thanh Hải, Phó Lam bồ Kụk Tăc mờ blơi phan mờ lơgar ndai gơ wèt Ƀộ Lơh sa mờ măy mŏk mờ kă bro phan đơs là, bơdìh mờ broă lơh geh cồng nha ală drà ờs mờng bơh yau, Việt Nam pal pơn jăt tai lơh li la drà tăc phan mờ lơgar ndai, tơrmù kơldìng uă ir tàm bàr pe drà tờm.

Lơh li la ală drà tăc mờ blơi phan mờ lơgar ndai, do kung là dùl jơnau lơh nền nàng bol he tơrmù ƀà rềs àr gơ aniai tŭ mờ kơldìng uă ir tàm tơl drà tăc phan mờ lơgar ndai halà tơl drà blơi phan mờ lơgar ndai. Tŭ neh geh đau drà den broă pơn jăt tai hơ̆ là broă lơh hòi jà…Tam gơl pa broă lơh bè hòi jà kă bro phan, tàm hơ̆ geh broă bơ̆t bơtàu măt kă bro mờ ngui ală broă lơh bè là jòi wơl tềl halà jòi gĭt anih tờm lơh den kung là ală broă lơh dong ai broă lơh hòi jà kă bro phan bơh bol he dê in rơ̆p lơh geh cồng nha rlau…

Tàm bơta lơh sa dunia gam uă gơ tam gơl mờ kă bro phan gùt plai ù mŭt tàm tŭ tơngai tam gơl, tăc mờ blơi phan mờ lơgar ndai ăt gơnoar broă kwơmàng gơ wèt mờ gơguh tai lơgar Việt Nam dê mơya jơnau sồr gơ tơlik neh krơi mờ lài. Tiến sìh ồng Cấn Văn Lực – Cau gĭt wă jrô Lam bồ Lơh sa BIDV, Cau tàm Mpồl duh broă Pơlam gùng dà broă lơh bơh Thủ tướng Cíñ phủ dê đơs là, lơh pràn tăc phan mờ lơgar ndai tàm tŭ tơngai tus ờ mìng ơm wơl tàm jơnau kờñ gơguh kờp jơh priă lơh geh bơh tăc phan mờ lơgar ndai lơm mờ kờñ pal tam gơl pràn tus tơngguh uă bơta niam gơguh tai; gơ sồr bơta pơgồp bal ndrờm bal đah gùng dà broă lơh kă bro phan, hòi jà tăc phan mờ lơgar ndai, bơtàu tơngguh logistics, priă jền dong kờl mờ is ồn là tơngguh uă bơta niam kơrnoăt boh lam mờ broă lam lơh jăt ngan ngồn.

Bol he pal tơngguh pràn dơlam is tai, tŭ do pal rơcăng lài is broă rơndăp lơh, hơ̆ là pal kwơmàng, pal jòng nhơm. Bol he pal ngui niam rlau ală FTA, lơh pràn tăc drơng broă sa priă mờ lơgar ndai, tơngguh uă cồng nha hòi jà kă bro phan, măt kă bro dà lơgar…

Mŭt tàm tŭ tơngai pa, tăc phan mờ lơgar ndai pơn jăt tai là gơn kơnờm kwơmàng bơh gơguh tai dê, mơya gơ sồr broă rơndăp lơh bơtàu tơngguh rơcăng lài mờ gơdờp mờ bơta pa. Jăt Jơnau lơh nền tàm pơrjum sồ 01 Cíñ phủ dê ngai 08/01/2026, jơnau kờñ gơguh tai kờp jơh priă lơh geh bơh tăc phan mờ lơgar ndai nam 2026 geh pơgăp bơh 15% tus 16% pơndrờm mờ nam 2025, ndrờm mờ kờp jơh priă lơh geh bơh 546 tơmàn tus 550 tơmàn dolar Mỹ. Nàng lơh sir jơnau kờñ do, kờp jơh priă lơh geh bơh tăc phan mờ lơgar ndai kờp bal pah nhai kờñ pal geh pơgăp bơh 45 tus 46 tơmàn dolar Mỹ - dùl broă jàu geh đơs là bềng bơta lòng, gơ sồr bơta mŭt lơh bal ndrờm bal, kràñ cê jơh nùs bơh ală ƀộ, gah, ƀòn lơgar mờ mpồl bơtiàn mpồl lơh sa kă bro dê bơh ală nhai bồ sơnam tơn. Jăt ală cau gĭt wă jrô, wèt tus khà gơguh tai pa gơ sồr bơta tam gơl bơh bồ tơngoh kơlôi sơnơng tus lơh broă. Tŭ geh ơn tàm bơnàng jă niam, lơh tơlir mờ lơh sồ, tăc phan mờ lơgar ndai bơh Việt Nam dê rơ̆p gơguh mhar mờ kơnhăp jŏ rlau.