Gơl gùng rơndeh ntoat mhar Khánh Hòa – Buôn Ma Thuột lòt gan ù tiah kơnhoàl M’Drăk jòng 17 kơi sồ, bơh Ủy ƀan Ñân zân càr Khánh Hòa lơh cau tờm bơcri priă. Bă ù pal ai nàng lơh rơndap broă jơh gùt gơl gùng do là 127,1 lồ bơh 143 hìu bơnhă làng bol dê. Tàm hơ̆, geh ală bơta ù gơ wèt bă ù ai nàng lơh rơndap broă geh tơm wơl, geh ù sơ gràm tam tờm keo, ù gơ wèt 3 bơta brê mờ ù lơh sa suơn sre. Ồng Nguyễn Đức Thảo, Phó Củ tịc Ủy ƀan Ñân kơnhoàl M’Drăk yal, tus tŭ do, broă lơh ai ù nàng lơh rơndap broă mìng rơp pa lơh gơs broă tam gơl rơndap ù tiah, lơh rơndap broă ngui ù, đah gùng, ƀlàng ơn phan lơh gùng, phan sang, lơh gơs đo was, tam gơl sră wac sềr rùp ù tiah, broă lơh kờp phan bơna, chi che, phan tam mờ lam lơh yal ai wơl ù tus cau dùl nă să, mpồl cau geh ù gơ ơm tàm tiah lơh rơndap broă. Tŭ do kơnhoàl kung gam ờ hềt jàu gơtùi khat dùl bă ù ai wơl lời ai ală mpồl lơh rơndap broă in.

Ồng Nguyễn Đức Thảo đơs bè tơngai lam lơh ai ù nàng lơh rơndap broă lơh dê: “Broă rơndap lơh ai tơlik là ngai 30 nhai 6 pa do pal jàu gơtùi 70% bă ù lơh rơndap broă, mơya tus tŭ do, broă lam lơh jàu ù nàng lơh rơndap broă ờ gơtùi lơh geh jat broă rơndap lơh ai tơlik. Tŭ do, kơnhoàl gam tơrgùm lơh rơndap broă, yal ală rơndap broă nàng yal tus ală mpồl bal, cau dùl nă să geh bă ù gơtìp ai lơh rơndap broă nàng tơm wơl priă ai ù lơh rơndap broă”.

Ồng Trương Thanh Tâm, Phó Kwang atbồ Anih tờm Bơtàu tơnguh bă ù kơnhoàl M’Drăk pà git, jơnau lơh lơyài tơngai ai ù lơh rơndap broă lơh gùng rơndeh ntoat mhar lòt gan kơnhoàl là tài kòl yan tàm Kơrnuat sồ 10 nam 2023 bơh Ủy ƀan Ñân zân càr Dăk Lăk dê. Kơrnuat do đơs loh, chi brê tam bal tàm ù tam brê bơh làng bol dê pal ai wơl nàng tàm pơrlòng giă. Broă ai tơlik jơnau lơh nền giă ù tơm wơl mìng rơp geh lơh tàm ngai 30 nhai 6, tŭ do ờ hềt geh jơnau pơlam nền nòn nàng git bơh lơi geh ù sơ gràm jŏ jòng bơh cau dùl nă să, mpồl bal dê… Nàng tơnguh mhar tơngai ai ù lơh rơndap broă lơh, ồng Tâm đơs là, Ủy ƀan Ñân zân càr Dăk Lăk pal mhar tam gơl ală kơrnuat bè lơi gơ in dipal ngan rlau jơh. Ồng pà git: “Kơnhoàl neh dan càr tam gơl Kơrnuat sồ 10 jat gùng dà tơnơ̆ tŭ tơm wơl, dong kờl làng bol geh tơnhàu chi brê tam is ờ duh pal jat broă ai wơl tàm pơrlòng giă. Khà tơm wơl, dong kờl mìng kờp jat khà priă bơcri lơh gơlik brê, ờ kờp priă jền lơh geh kờp dŭ lài. Pơlam mùl màl rơndap broă, broă lơh, git nền tŭ tơngai geh ù, broă ngui ù nàng lơh cơng tàng tơm wơl ai làng bol in, lơh bơnàng jă nàng tơm wơl priă ai ù lơh rơndap broă lơh”.

Tàm kơnhoàl Ea Kar, rơndap broă lơh gùng rơndeh ntoat mhar Khánh Hòa- Buôn Ma Thuột lòt gan jòng rlau 13,5 kơi sồ. Gơl gùng do gơ wèt rơndap broă dềt sồ 2 mờ sồ 3. Bă ù ai lơh rơndap broă là 104,4 lồ. Tus tŭ do, broă lơh kờp sền neh lơh geh 100% broă rơndap lơh, ring bal mờ ai wơl 13 rơndap broă lơh tơm wơl priă mờ 69,2 lồ, neh jàu ù lơh rơndap broă geh 50,2 lồ mờ lơh geh 48% broă rơndap lơh, pơn drờm mờ broă rơndap lơh kung gam gơtìp lơyài tơngai lam lơh. Ồng Chu Vĩnh Cường, Kwang atbồ Anih tờm Bơtàu tơnguh bă ù kơnhoàl Ea Kar sồr: “Lài ngan gơ wèt mờ broă lơh tơm wơl priă ai ù lơh rơndap broă den bol hi dan Ủy ƀan Ñân zân càr mhar ring bal giă ù pa ngan rlau jơh bơh Mpồl duh broă sền sơ wì bè ală bơta geh tơm wơl priă. Dơ̆ 2 là dan càr gờñ sền sơ wì ai làng bol in tơnhàu chi brê tam tơnơ̆ tŭ dờp priă tơm wơl dong kờl ai ù lơh rơndap broă. Hòi jà làng bol tơnơ̆ tŭ dờp priă tơm wơl ai ù lơh rơndap broă den mhar jàu ù nàng anih tờm in jàu ai cau tờm bơcri priă in kờñ mhar lam lơh rơndap broă”.

Ală kal ke, kòl yan ndrờm geh bơta ndrờm bal là ơm tàm Kơrnuat sồ 10 nam 2023 bơh Ủy ƀan Ñân zân càr Dăk Lăk dê, broă ai tơlik giă ù tơm wơl, tơm wơl priă ai ù lơh rơndap broă lơyài, ờ hềt geh jơnau pơlam ngan ngồn git nền tŭ tơngai, bơh lơi geh ngui ù, dong kờl chi tam jŏ ngai… Broă tam gơl kơrnuat, tă bơsong ală kòl yan pal geh lơh gờñ, nàng broă lơh ai ù lơh rơndap broă, jàu ù lơh rơndap broă geh lơh di mờ tŭ tơngai hơ pơrgon.