Krơi mờ bơta ờs mờng, tàm pơrjum dơ̆ do, Quôk hội lùp jat mpồl gah broă ala mờ mpồl bơta broă. Jat hơ̆, kwang bàng Cíñ phủ lơi kung kờñ hơ jơnau lùp ală tơngume gơ rềng tus kơnòl atbồ, đơng lam; sền sơ wì wơl ală bơta mờ he neh hơ pơrgon geh lơh tus kàr lơi. Ồng Tạ Văn Hạ, Mpồl kwang bàng càr Quảng Nam jờng rơ bơnah ai jơnau đơs bơh ală Ƀộ trưởng mờ ală kwang bàng Cíñ phủ dê, bơnah hơ jơnau lùp neh hơ gơtùi ală broă mờ kwang bàng Quôk hội neh lùp. Broă tam gơl pa do lơh ală kwang bàng bơh Cíñ phủ, kwang đơng lam bồ ală gah broă pal git loh làng, git nền ală broă geh lùp. Do kung là dùl tŭ niam nàng kwang bàng Quôk hội sền sơ wì, jat sền ală Ƀộ trưởng mờ ală kwnag bàng Cíñ phủ tàm broă lơh jat jơnau hơ pơrgon he dê tàm ală dơ̆ lùp mờ hơ jơnau lùp: “Ală kwang bàng Quôk hội lùp ală broă, sền jat tàm ală nghị quyết neh kơlôi sơnơng nền nòn ngan ală nghị quyết jat sền lùp mờ hơ jơnau lùp bơh Quôk hội dê. Ală Ƀộ trưởng iat jơnau lùp mờ hơ jơnau lùp kung song dơpă, đơs song tơn tàm ală broă mờ kwang bàng sền gròi. Kwang bàng kung lùp tus gùng tus dà, tàm pơndang nàng jòi geh jơnau song dut ndơl. Bơdìh mờ broă lùp, hơ jơnau lùp kung geh uă ngan jơnau đơs, jơnau dan, geh uă ngan broă lơh nàng dong Cíñ phủ, dong ală Ƀộ trưởnga lă gah, ală broă in tàm broă lơh đơng pơlam gơ in niam rlau”.

Mò Tô Thị Bích Châu, mpồl kwang bàng ƀòn dờng Hồ Chí Minh đơs là, dơ̆ lùp mờ hơ jơnau lùp geh lơh duh hồl ngan, jơnau lùp bơh ală kwang bàng dê ai tơlik tàm hìu pơrjum là ală tơngume geh cau tĕ khà kơp gơn. Bulah bè hơ̆, gơ wèt mờ 2, 3 gah broă bè lơh sơnơm, bơto bơsram, niam chài… tơngai lời ai kwang bàng in tơlik jơnau lùp là dồ êt ir, tơngai lời ai ală kwang atbồ gah broă lơh in ờ hềt tơl nàng hơ jơh ală broă mờ cau tĕ khà sền gròi: “Bol he lam lơh lùp tơngume ơnàng ngan, jơh ală broă bè lơh sa, niam chài, mpồl bơtiàn, cíñ trị, lơngăp lơngai, rơndap tap sèng ring lơngai dà lơgar dê den 2 ngai mờ nggùl ờ gơtùi hơ jơh. Bè hơ̆ den tàng, ală jơnau hơ bơh ală Ƀộ trưởng, kwang atbồ gah broă lơh dê kung ờ huan geh uă tŭ jơ, mìng tàm khà di mơ lơm. Tài kwang bàng kờñ git loh, git uă rlau den tàng ai broă đơs tàm pơndang uă dơ̆. Bè hơ̆ den tàng dipal geh dơ̆ lùp mờ hơ jơnau lùp tàm ală dơ̆ pơrjum tus, jat añ den gơtùi rơ wah 2, 3 broă nàng lùp mờ hơ gơ in loh làng”.

Jat sền dơ̆ lùp mờ hơ jơnau lùp tàm pơrjum dơ̆ 6, Quôk hội khoă XV, ồng Lê Hữu Chỉnh, ơm tàm sơnah ƀòn Thắng Lợi, ƀòn dờng Buôn Ma Thuột, càr Dăk Lăk đơs là, broă lùp mờ hơ jơnau lùp tàm pơrjum dơ̆ 6 neh ai tơnggŏ bơta loh làng, song dơpă.

Cau lùp mờ hơ jơnau lùp rơcang lài nền nòn, git loh broă ai tơlik jơnau lùp: “Bàr ngai mờ nggùl lùp mờ hơ jơnau lùp, jat añ gŏ ală kwang đơng lam bồ gah broă lơh hơ jơnau lùp niam ngan, Thủ tướng mờ Củ tịc Quôk hội kung bè hơ̆ sơl. Jat an den geh uă bơta tam gơl pa. Jơnau kờñ dờng ngan rlau jơh lơh geh bơh bơta lơngăp lơngai cíñ trị tus lơh sa mpồl bơtiàn mờ kuơmàng là Quôk hội mờ Cíñ phủ neh sền gròi tus bơta kòn bơnus, pơn yơu đơs bè broă lơh priă nhai, bè bơto bơsram, lơh sơnơm, niam chài yal tơnggit jơnau geh sền gròi uă; bal mờ broă lơh ală gùng lòt, anih ơhò ơm, ƀlàng rơndeh par hơ̆ sồng lơh ngan nàng geh tus 3 rbô kơi sồ gùng rơndeh ntoat mhar tàm tơngai lơh broă do den jat añ gŏ là dờng màng ngan. Là dùl nă cau tĕ khà añ chờ hờp ngan mờ pin dờn Quôk hội rơp lơh gơs tơl kơnòl broă”.

Đơs bè bơnah hơ jơnau lùp bơh Phó Thủ tướng ồng Trần Lưu Quang dê, mò Nguyễn Thị Sửu, mpồl kwang bàng càr Thừa Thiên – Huế pà git: “Añ gŏ bơta song dơpă, bơta khin cha dờp ală bơta gam ờ niam, neh khin cha dờp bơta ờ niam den rơp gơtùi bơsong bơta ờ niam mờ jòi geh broă bơsong ai ală kal ke, kòl yan in. Ờ di kwang bàng kờñ lùp ală broă hơ̆ mờ gŏ kal ke, pal geh bơsong, kờñ geh anih kơp kơnờm mờ Cíñ phủ là dùl tàm ală anih kơp kơnờm uă gơtùi bơsong bè broă dong kờl, bơta kơp kờñ bơh cau tĕ khà dê”.