Tàm Pơrjum dờng, Chủ tịch Mpồl cau dờng sơnam Việt Nam ồng Nguyễn Thanh Bình đơs sùm, bơh bơhiàn ờs mờng “ki ngàm cau kra, sền dờng màng cau dờng sơnam”, bơhiàn bơh yau “hùc dà kah tô dà” tus nùs nhơm “sơnam dờng, bồ tơngoh sơlơ kràñ”, cau dờng sơnam Việt Nam sùm sền dờng màng nùs nhơm kac màng, nùs nhơm gơboh dà lơgar, nùs nhơm geh kơnòl mờ bơta kơp kờñ tă pơgồp; tă pơgồp bồ tơngoh jak, mờng chài, bơngă pin dờn mờ bơta jơh nùs tàm broă lơh bơt bơtàu mờ sền gàr Dà lơgar tờm.

Sền wơl tơngai lơh broă lài, ală kâp Mpồl cau dờng sơnam neh tam gơl pa tơngume, broă lơh, wèt uă hờ kâp hơ đơm mờ lơh geh uă cồng nha tàm ală gah broă. Broă lơh bơt bơtàu Mpồl lơh broă pơn jat tai geh sền gròi; broă lơh sền gàr, sền gròi mờ lơh niam gơnoar broă cau dờng sơnam dê geh uă tam gơl niam.

Uă broă lơh tơrlòng lài ngan ngồn geh gàr sùm, lam lơh uă bè mpồl ală rài tàm dong kờl is gơp; ală mpồl niam chài, đơs crih tamya, tàp pràn să jan dưỡng sinh, sền gàr pràn kơldang, sền gàr tiah ơm kis mờ dong kờl broă lơh sa. Srơh “Sơnam dờng - Krơh àng” pơn jat tai gơ rề uă, mờ git nđờ tơlak nă cau dờng sơnam tus bal bơt bơtàu Đảng, bơt bơtàu mpồl lơh broă chính trị, tơrna gơ rờm bal tàm kâp hơ đơm, dong kờl bơsram, dong kờl cau chài, gàr niam lơngăp lơngai rơndap tap sèng, bơt bơtàu ƀòn lơgar pa, tiah drà gơguh jak.

Uă cau dờng sơnam jơh nùs lơh broă, lơh sa, kă bro; geh uă cau geh pơn rơ lơh sa jak, bơtàu tơnguh broă lơh sa suơn sre hữu cơ, lơh sa tàm pơdar. Ală tă pơgồp cau dờng sơnam dê tàm hìu bơnhă mờ mpồl bơtiàn ngai sơlơ geh cih dờp.

Tàm tŭ tơngai dà lơgar mut tàm tơngai bơtàu tơnguh pa mờ bơta kra tĕ làng bol gơlik geh mhar, Chủ tịch Mpồl cau dờng sơnam Việt Nam đơs sùm, dùl tàm ală tơngume tờm kờñ pal lam lơh là bơtàu tơnguh “lơh sa kra”, pơgồp bal mờ jơnau kờñ ngai sơlơ li la cau dờng sơnam dê bè lơh sơnơm, sền gàr jŏ tơngai, hìu ơm, niam chài, lòt nhơl, bơto bơsram, măi mok mờ ală broă drơng ala dipal; tam gơl pràn bơh bồ tơngoh kơlôi sơnơng “sền gàr” gơ gơs sền gàr, sền gròi jài, lơh niam jài gơnoar broă cau dờng sơnam dê: “Hơ̆ pal là dùl gùng lòt kuơmàng tàm gùng dà broă lơh dà lơgar nàng gơ dờp mờ bơta kra tĕ khà kờp làng bol; lơh gơlik bơta niam mờ ai geh tơl bơta ƀuơn nàng cau dờng sơnam in pơn jat tai geh tă pơgồp mờ lơh niam. Bal mờ hơ̆, kờñ pal bơt bơtàu mpồl kwang bàng Mpồl pal ngan ngồn jơh nùs, ngac ngar, jơh nùs tă pơgồp, geh kơnòl, geh bồ tơngoh jak, geh pràn jak; lơh pràn tam gơl sồ, tam gơl tơlir; sơlơ pơgồp bal mờ ală kâp, ală gah broă lơh nàng lam lơh niam rlau tai broă lơh sền gàr,s ền gròi mờ lơh niam rlau tai gơnoar broă cau dờng sơnam dê tàm bơta pa”.

Tềng đap jơnau sồr gơ dờp mờ bơta kra tĕ khà kờp làng bol mhar, Chủ tịch Anih duh broă Mặt trận Dà lơgar Việt Nam mò Bùi Thị Minh hoài đơs sùm, kờñ pal tam gơl pa bồ tơngoh kơlôi sơnơng bè broă lơh cau dờng sơnam, tam gơl bơh sền cau dờng sơnam là cau dờp gùng dà broă lơh dong kờl gơ gơs cau tờm tus bal bơtàu tơnguh, lơh gơlik bơta niam nàng cau dờng sơnam pơn jat tai kis chờ hờp, kis pràn, kis geh kuơ mờ tă pơgồp dipal mờ bơta pràn kơldang, pràn jak, mờng chài, bơta kơp kờñ he dê.

Chủ tịch Anih duh broă Mặt trận Dà lơgar Việt Nam mò Bùi Thị Minh Hoài sồr ală kâp ủy Đảng, gơnoar atbồ Mặt trận Dà lơgar, ală mpồl cau mờ Mpồl cau dờng sơnam pơn jat tai lơh sir gùng dà broă lơh, tam gơl pa tơngume, broă lơh; sền gròi cau dờng sơnam geh rài kis kal ke, cau kis dồ nă să is, cau tàm tiah sar lơgar ngài, tiah làng bol jơi bơtiàn dồ êt nă cau; mờ kung ai geh bơta niam nàng cau dờng sơnam in tus bal tă pơgồp jơnau đơs bơt bơtàu Đảng, bơt bơtàu gơnoar atbồ, bơto bơtê bơhiàn ờs mờng, tơrña gơ rờm bal tàm kâp hơ đơm, sền gàr lơngăp lơngai rơndap tap sèng mờ bơt bơtàu rài kis niam chài. Mờ kung ai tơnggŏ bơta pin dờn ală rơnàng cau dờng sơnam Việt Nam pơn jat tai lơh niam nùs nhơm “Sơnam dờng - Krơh àng”, bal mờ jơh gùt Đảng, jơh gùt làng bol, jơh gùt ling klàng lam lơh bơta kơp kờñ bơtàu tơnguh dà lơgar pas sơm, gơguh jak, gơboh gơbài. Chủ tịch Anih duh broă mặt trận Dà lơgar Việt Nam mò Bùi Thị Minh Hoài đơs sùm: “Lam lơh niam broă lơh sền gàr, sền gròi mờ lơh niam gơnoar broă cau dờng sơnam dê; sền gàr, dong kờl cau dờng sơnam geh rài kis kal ke, ờ lời cau dờng sơnam gơtìp siơŭ siar ală bơta bè sền gàr; pơn jờng cau dờng sơnam ngui bồ tơngoh jak, mờng chài, pơgồp bơnah bơtàu tơnguh lơh sa tàm ƀòn lơgar mờ dà lơgar, bơt bơtàu mpồl tam klac dờng jơh gùt jơi bơtiàn; lơh rbàng tơrbŏ kơnhăp kơ̆ đah Đảng, Dà lơgar mờ cau dờng sơnam. Kâp ủy, gơnoar atbồ ală kâp kờñ pal ai geh bơta niam nàng cau dờng sơnam pơn jat tai tus bal tă pơgồp jơnau đơs bơt bơtàu Đảng, bơt bơtàu gơnoar atbồ, sền gàr lơngăp lơngai rơndap tap sèng, bơt bơtàu rài kis niam chài mờ gàr kơ̆ mpồl tam klac dờng jơh gùt jơi bơtiàn”.