Jat Củ tịc Quôk hội ồng Trần Thanh Mẫn, mìng tơnơ̆ mờr 4 nhai lơh broă gơnoar atbồ ƀòn lơgar 2 kâp, gam gơlik geh ală bơta ờ niam bè broă sac rơ wah mờ git nền kơnòl broă đah ală kâp gam ờ hềtd ndrờm bal, gam gơ tàm rơndap rơndồl, bàr pe sră nggal pơlam lơh jat adat boh lam, sră pơ àr gơnoar atbồ ờ hềt geh tam gơl di tŭ, gơtìp kal ke tàm ală broă ù tiah, bơt bơtàu, tiah ơm kis, hìu đam, sền gàr adat boh lam, lơh sră pơ àr gơ rềng tus rài kis cau dê bơh tŭ deh tus tŭ chơt. Củ tịc Quôk hội đơs là, broă jơngkah, ờ tơl kwang bàng, cau lơh broă sa priă nhai dà lơgar; hìu lơh broă sàh dê hat hal, ờ tơl cơldŭ, mpồl lơh broă kung gam geh sơl. Bulah bè hơ̆, Dà lơgar ai gơnoar ală tiah bơsong ngac ngar, tàm bơta ờ hềt lơh anih lơh broă pa, ờ hềt geh bơta niam, ală mpồl bal, anih lơh broă bơh kâp sàh dê rơp geh ơn tàm ală anih krơi is. Tàm bơta bè hơ̆, ală tiah kràñ cê lơh pràn broă tam gơl sồ, ngui jak chài măi mok nàng cau den dồ êt, mơya broă den geh lơh niam.

Củ tịc Quôk hội ai lơh pơn yơu, tàm Dơ̆ pơrjum dơ̆ 9 pa do, Quôk hội neh ring bal uă ngan adat boh lam, dilah ờ ngui broă tam gơl sồ, ngui bồ tơngoh jak kòn bơnus lơh gơs AI den rơp ờ gơtùi lơh gơs kơnòl broă crơng gơs adat boh lam; mờ kung đơs sùm, do là dơ̆ kac màng mờ ală kal ke, bơta lòng mờ să tờm lơi dilah lơh ờ gơtùi den ơm rlô tĕ.

Củ tịc Quôk hội đơs là, tàm broă jat sền lơh jat ngan ngồn broă lam lơh gơnoar atbồ ƀòn lơgar 2 kâp ờ hềt geh gùng dà, broă lơh jat sền nền nòn, lơh gơbàn bàr pe bơta ờ niam bơh sơn rờp, ờ hềt lơh geh cồng nha, is ồn là tàm kâp hơ đơm, ƀòn lơgar mờ lơh gơ tam gơl gơs tiah drà. Bè hơ̆ den tàng, kâp càr pal jat sền sùm kâp sàh, ờ tơl bơta lơi den pal bơtơl mơ tơn mờ bơta kuơmàng là:“Ờ geh cau lơi ndai rlau là Cíñ phủ, Ƀộ Broă dơlam is, ală tiah lam lơh ală broă lơh ndrờm bal, tơrgùm tàm tam gơl wơl sră pơ àr gơnoar atbồ, tơnguh pràn jak dong kờl priă jền. Dùl là pal lơh sir tơngume adat boh lam, pơlam lơh jat ngan ngồn. Tŭ do adat boh lam den bol he neh geh tơl, gam wơl là Jơnau pơlam lơh jat. Dơ̆ 2 là lơh bè lơi nàng bơt bơtàu sră nggal tam gơl jơnau cih adat boh lam loh làng nàng tam pà kâp, jàu gơnoar bè tŭ do. Dơ̆ pe là kờp sền, tam gơl khà kwang bàng lơh broă sa priă nhai dà lơgar, lam lơh kờp sền pràn jak kwang bàng nàng tam pà bè lơi gơ in dipal, tơrmù ƀà bơta at tơn kơnòl broă, ờ geh mờng chài lơh broă”.

Bơdìh hơ̆ tai, pal pơlam ală tiah in nàng lam lơh kờp sền pràn jak kwang bàng, sồr lơh kơnòl broă dipal, jal mhar tơng gơs ală mpồl lơh broă dà lơgar, lơh broă drơng ala dà lơgar kuơmàng tàm sàh, mờ kung hòi jà mpồl lơh sa kă bro bơdìh dà lơgar tus bal, tơnguh pràn jak kwang bàng, bơyai lơh bơto bơtê, pơlam mờng chài lơh broă ai kwang bàng in, sơlơ tơnguh pràn jak Mpồl lùp sền làng bol tàm ƀòn lơgar, sùm bơyai lơh ală dơ̆ pơrjum mờ làng bol nàng sền sơ wì broă lơh, mờ kung sơlơ tơnguh tai broă jat sền. 

Is ồn, bơh tŭ do tus lồi nam kờñ pal hòi jà tơl bơta priă jền bơcri lơh, lơh niam wơl hìu lơh broă, ngan là kâp sàh. Tŭ do kung gam mờr 2 rbô anih lơh broă ờ hềt tơl bơta dờng, ờ hềt tơl jat jơnau sồr.

Bè jơnau kờñ bơtàu tơnguh lơh sa – mpồl bơtiàn, Củ tịc Quôk hội ồng Trần Thanh Mẫn đơs là, kờñ pal mhar ai priă bơcri dà lơgar; sền gròi bè gơguh lơh sa, mơya pal kơnhăp jŏ, drà priă jền, ù tiah, hìu đam,g iă biàng pal geh gròi sền; sơlơ lơh pràn tam gơl tơlir, tam gơl sồ, tơnguh cồng nha lơh broă, bơta niam cau lơh broă nàng drơng ală jơnau kờñ gơguh lơh sa in.

Mờ ală jơnau kờñ mờ Đảng neh ai tơlik tàm tơl tŭ tơngai mùl màl, jat Củ tịc Quôk hội đơs, bơta kuơmàng ngan rlau jơh là pal gàr bơta kơljap sùm lơh sa dờng, gơguh lơh sa pal gơ jat bal mờ kơ̆ kơnhăp lơh sa dờng, gròi sền lơngăp lơngai rài kis mpồl bơtiàn; tam gơl pa broă lơh gơguh lơh sa bơh khà tus bơta niam, sồr tam gơl sồ, bơtàu tơnguh lơh sa tơlir, lơh sa bồ tơngoh bơsram sră. Bal mờ hơ̆, pal pơn jat tai rơndap tap sèng wơl rài lơh sa dồ bă tơl làm, ngan ngồn, tơrgùm tàm 3 gah tờm là rơndap tap sèng wơl gah broă lơh jat gùng dà tơnguh cồng nha lơh geh; rơndap tap sèng wơl mpồl lơh sa kă bro, ngui niam gơnoar broă tề lam bơh lơh sa dà lơgar dê, tus do, Ƀộ Cíñ trị rơp geh Jơnau lơh nền tàm pơrjum bè lơh sa dà lơgar; rơndap tap sèng wơl kơnhoàl ù tiah mờ bơcri priă dà lơgar.

Củ tịc Quôk hội đơs nền, nàng lơh gơtùi jơnau kờñ do pal tam gơl pràn bè mpồl lơh broă, Cíñ phủ, Quôk hội pal sền sơ wì, tă bơsong kal ke, tơnguh pràn jak đơng lam bơh Mpồl lơh broă sră pơ àr gơnoar atbồ dê. Đơs sùm, pang rùp bal bè rài lơh sa dà lơgar he dê niam ngan, jat Củ tịc Quôk hội, mờ ală broă ờ hềt lơh gơtùi den ờ geh cau lơi ndai, tơl nă kwang bàng, đảng viên pal sơlơ tơnguh ta broă lơh cíñ trị, pơlam bồ tơngoh nàng bal mờ làng bol kơ̆ dơn bơta pin dờn lam dà lơgar bơtàu tơnguh.