Ai jơnau đơs tàm dar pơrjum jơnum, Củ tịc Quôk hội ồng Trần Thanh Mẫn đơs nền wơl dùl dơ̆ tai broă tă pơgồp jơnau đơs tàm Jơnau rơcang cih Jơnau lơh nền tàm pơrjum bơh Quôk hội dê tam gơl, bơtơl bàr pe bơta bơh Sơnua boh lam nam 2013 dê geh lơh tàm 8 tàm 120 bơta mờ 2 mpồl tơngume jơnau cih gơ rềng tus Mặt trận dà lơgar Việt Nam, ală mpồl cíñ trị - mpồl bơtiàn mờ ală jơnau cih tàm tap 9 nàng lam lơh broă lơh rơndap broă gơnoar atbồ kâp hơ đơm 2 kâp, ờ rề ơnàng ală broă ndai.

Củ tịc Quôk hội ồng Trần Thanh Mẫn đơs là, tŭ do, làng bol mờ cau tĕ khà kơp gơn ngan broă lam lơh tơrmù mpồl cau lơh broă sră pơ àr gơnoar atbồ, lơh broă geh cồng nha. Tài tàm ngan ngồn, tơngai lài, Đảng, Dà lơgar kung neh geh uă jơnau lơh nền tàm pơrjum nàng tơrmù mpồl cau lơh broă sră pơ àr gơnoar atbồ mơya mùl màl broă tơrmù gam cèng bơta tam gơl lơh mpồl cau lơh broă sră pơ àr gơnoar atbồ lơh broă kal ke, khà cau sa priă nhai dà lơgar den gơ tơrgùm uă: “Dơ̆ do, bol he lơh jat jơnau lơh nền tơrmù cau lơh broă sră pơ àr gơnoar atbồ jat tơngume Jơnau lơh nền tàm pơrjum sồ 18. Do là jơnau lơh nền di nùs làng bol dê. Bơta đơng lam Đảng dê, di nùs làng bol. Kờñ lơh jat ală tơngume do den tơngai dơ̆ 2 kal ke ngan. Kal ke là pal tam gơl sơnua boh lam. Bol he neh ring bal lơh Anih duh broă jơnau rơcang cih tam gơl, bơtơl bàr pe bơta bơh Sơnua boh lam nam 2013 dê, mờ neh yal bloh, broă rơndap lơh tam gơl wơl Sơnua boh lam mờ yal loh làng ai jơnau đơs làng bol bơh ngai 06/5 tus ngai 05/6, tàm tơngai dùl nhai, tơrgùm 5 ngai, kờp jơh là 35 ngai”.

Củ tịc Quôk hội kung đơs là, broă tam gơl, bơtơl bàr pe bơta bơh Sơnua boh lam nam 2013 dê, mpồl broă lơh sir ală sră nggal pơlam lơh jat nàng tam gơl Sơnua boh lam, lơh sir adat boh lam mờ ală jơnau cih pal lòt lài dùl cơnđuà, nàng lơh gơlik tơngume adat boh lam kơ̆ kơljap ai broă lam lơh jat in. Ală cau ala mat Quôk hội kung ring bal mờ 8 Bơta tam gơl tàm Jơnau rơcang cih Jơnau lơh nền tàm pơrjum tam gơl, bơtơl bàr pe bơta bơh Sơnua boh lam nam 2013 dê. Tàm hơ̆, Jơnau rơcang cih Jơnau lơh nền tàm pơrjum lơh loh gơnoar broă mờ kơnòl bơh ală mpồl cíñ trị - mpồl bơtiàn dê, bè: Ala mat cau lơh broă Việt Nam, Mpồl cau lơh broă sa Việt Nam, Đoàn Ơruh pơnu Kộng sản Hồ Chí Minh, Mpồl tam klac cau ùr Việt Nam, Mpồl cau ling yau Việt Nam là ală mpồl cíñ trị - mpồl bơtiàn gơ wèt Mặt trận dà lơgar Việt Nam, gàr lơh jat tơngume jơnau pơn dut sồ 127 bơh Ƀộ Cíñ trị dê.

Jat cau ala mat mò Nguyễn Thị Thu Nguyệt, mpồl cau ala mat Quôk hội càr Dăk Lăk đơs, bơdìh mờ ală mpồl cíñ trị - mpồl bơtiàn gơ wèt Mặt trận dà lơgar Việt Nam gam geh ală mpồl làng bol gam lơh ală kơnòl broă bơh Đảng mờ Dà lơgar dê. Bè hơ̆ den tàng mò sồr, mpồl cih jơnau rơcang cih Jơnau lơh nền tàm pơrjum tam gơl, bơtơl bàr pe bơta bơh Sơnua boh lam nam 2013 dê sền sơ wì, jơnau cih gơnoar broă adat boh lam bơh ală mpồl do dê: “Gơnoar broă adat boh lam bơh ală mpồl làng bol gơ wèt anih duh broă mặt trận dê jat jơnau pơn dut sồ 127 geh đơs tàm Sơnua boh lam bè lơi, bol he pal lơh loh. Ờ di là bol he mìng sền tàm bơta bal mờ tàm mpồl tam klac ală mpồl geh jơng mờ mặt trận den ờ hềt tơl, ờ hềt gơtùi lơh gơlik tơngume adat boh lam ai ală mpồl do in lơh broă jat tơngume Sơnua boh lam, adat boh lam mờ tam gơl jat Jơnau lơh nền bơh Cíñ phủ dê, tơnơ̆ tŭ Sơnua boh lam tam gơl”.

Bàr pe jơnau đơs gam ờ suk là tàm bơta 110, sèng 3 cih, broă đal git ală mpồl lơh broă sră pơ àr gơnoar atbồ hơ đơm càr, ƀòn dờng gơ wèt dà lơgar mờ rơndap tap sèng, sră nggal lơh, tơn lời lơh broă, tơmut bal, tam cah is mpồl lơh broă sră pơ àr gơnoar atbồ, tam gơl nhàr ù tiah càr, ƀòn dờng bơh Quôk hội dê cih. Tàm tŭ jat Sơnua boh lam nam 2013, broă do pal ai jơnau đơs làng bol. Ồng Nguyễn Minh Hoàng, mpồl cau ala mat Quôk hội ƀòn dờng Hồ Chí Minh pà git: “Broă crơng gơs, tơn lời lơh broă, tơmut bal, tam cah is mpồl lơh broă sră pơ àr gơnoar atbồ, tam gơl ù tiah càr, ƀòn dờng bơh Quôk hội cih. Jơnau cih broă do pal ai jơnau đơs làng bol tàm ƀòn lơgar, jat rơndap tap sèng, sră nggal adat boh lam dê cih. Tàm do añ gam ờ suk là bol he ờ mblàng lơh loh ñchi bơh tài bol he sang bơta do, tàm tŭ bơta do lơh geh bơta làng bol lơh tờm tàm kâp hơ đơm, iat jơnau đơs tă pơgồp bơh làng bol dê gơ wèt mờ broă dờng mờ kung ai tơnggŏ bơta đơng lam Đảng dê, di nùs làng bol”.

Ồng Nguyễn Thành Trung, mpồl cau ala mat Quôk hội càr Yên Bái geh jơnau đơs: “Jơnau rơcang cih dơ̆ do ai jơnau đơs làng bol tàm ƀòn lơgar dê tŭ crơng gơs, tơn lời lơh broă, tơmut bal halà tam gơl nhàr ù tiah mờ rơp bơh Quôk hội lơh nền. Jat añ den tàm bơta sền sơ wì adat boh lam, đơng lam dà lơgar mờ mpồl bơtiàn dê den broă ai jơnau đơs làng bol tŭ crơng gơs, tơn lời lơh broă, tơmut bal, tam gơl nhàr ù tiah là pal geh ngan”.