Tàm càr Gia Lai, jat jơnau đơs tàm pơrjum, nam 2023 geh uă kal ke, mơya càr neh lơh ngan lam lơh jat ală kơnòl broă lơh sa – mpồl bơtiàn. Jat hơ̆, kờp jơh priă bơcri gùt mpồl bơtiàn kờp dŭ geh 42 rbô tơmàn đông, lơh geh broă jàu mờ gơguh 9,28% pơn drờm dùl tŭ bal mờ nam lài. Ală broă jàu bè priă lơh geh bơh gah lơh sa suơn sre – brê bơnơm – phan tàm dà; lơh sa mờ măi mok, bơt bơtàu; kờp jơh khà tac rah rài phan bơna mờ uă broă jàu ndai ndrờm lơh gơtùi mờ sơrlèt rlau pơn drờm mờ broă rơndap lơh ai tơlik. Jat hơ̆, khà gơguh kờp jơh phan lơh gơs bơh càr dê geh 3,02%; kờp jơh lùp dồs priă dia càr dê geh 5 rbô 230 tơmàn đông, geh 88,5% pơndrờm mờ nghị quyết. Khà ai priă  bơcri dà lơgar tus nggùl nhai 11 nam 2023 mìng rơp pa geh 37,2%. Bơdìh hơ̆ tai, khà pràn jak tàm pơrlòng kâp càr PCI nam 2022 gơmù 19 khà pơn drờm mờ nam 2021; ală khà bè lơh niam wơl sră pơ àr gơnoar atbồ mờ tơnguh pràn jak tàm pơrlòng gam uă bơta ờ niam. Ồng Tô Văn Chánh, Củ tịc Hội đồng Ñân zân kơnhoàl Krông Pa geh jơnau đơs: “Bơta moat jrùm là 7 broă jàu tờm mờ 2 broă jàu dềt tàm kờp jơh 24 broă jàu ờ lơh gơtùi bè broă rơndap lơh. Añ gŏ geh 1 jơnau pal sền gròi là tàm nam 2023, bơta pleh uă ngan. Ală sở, gah broă lơh tă pơgồp jơnau đơs ai Ủy ƀan Ñân zân càr in ală broă tàm kâp hơ đơm yal, dan mờ sồr. Gah broă do den sơñio gah ne, gah lơi kung kờñ gàr bơta niam he in, ờ cau lơi khin tă pơgồp jơnau đơs, geh jơnau dan, jơnau sồr nàng Ủy ƀan Ñân zân càr in đơng lam tă bơsong. Mờ ờ thàn tă bơsong den là ngan rơp gơtìp gơ rềng”.

Tus bal cribơyai bè broă lơh tàm tơngai tus, ồng Đinh Hữu Hòa – Phó Kwang atbồ drơng broă Sở Kế hoạc mờ Đầu tư càr Gia Lai sồr: “Nàng sơlơ lơh geh bơta bơtàu tơnguh tàm tơngai tus, lài ngan pal pơn jat tai tơrgùm tàm cồng nha lơh geh bơh broă tam chi jŏ nam, lơh sa suơn sre ngui măi mok pa, pơgồp bal mờ chi tam tờm ngan bè tiêu, kơphê, tam gơl rơndap tap sèng chi tam gơ jat bal mờ drà kă bro bè chi sa plai, bơkàu, tờm chi lơh sơnơm mờ hìu măi lơh gơlik phan. Dơ̆ 2 là tơrgùm bè bơta ƀuơn, bơta pràn bè năng lượng mat tơngai ờ hềt geh ai ngui nàng he ai ngui, kờp jơh bơta pràn rlau 900 MWp”.

Tàm càr Lâm Đồng, jat jơnau yal bơh pơrjum Hội đồng Ñân zân dê, broă lơh sa – mpồl bơtiàn nam 2023 bơh càr Lâm Đồng dê kong mờ uă bơta kal ke, 4 tàm 18 broă jàu ờ gơtùi lơh gơs jat broă rơndap lơh. Bulah broă lơh sa gàr sùm khà gơguh 5,63% mơya ờ hềt kơ̆ kơljap. Broă lơh sa mờ măi mok – bơt bơtàu gơguh lơyah; broă lơh sa, kă bro bơh làng bol, mpồl lơh sa kă bro dê ờ ƀuơn tài gơ rềng bơh bơta roh giă priă, priă blơi phan gơguh jơnhua. Broă lơh lùp dồs priă dia kung gơtìp uă kal ke, tàm hơ̆ ală bơnah priă ai bơh dia, priă tă lơh broă mìng geh 87,8%, priă ai geh bơh hìu, ù mìng ndrờm 85,8% khà kờp dŭ càr dê. Broă lơh niam wơl sră pơ àr gơnoar atbồ, tam gơl niam anih bơcri priă, kă bro ờ hềt lơh gơtùi jat jơnau sồr. Ồng Trần Đức Quận, Ƀí thư Tỉñ ủy, Củ tịc Hội đồng Ñân zân càr Lâm Đồng đơs là, bơh ală bơta ờ niam tàm broă đơng lam, sồr lơh, lam lơh jat kơnòl broă bơh 2, 3 gah broă, kâp hơ đơm dê neh lơh gơ rềng uă ngan tus broă bơtàu tơnguh lơh sa – mpồl bơtiàn, lơh sa, kă bro mờ rài kis bơh làng bol dê. Do là bơta kòl yan pal geh sề sơ wì dồ bă song dơpă, tơl làm mờ ai geh ală jơnau bơsram mờng chài nàng tam gơl tàm tơngai tus. Ồng Trần Đức Quận đơs nền: “Sồr ală kwang bàng Hội đồng Ñân zân càr tơnguh nùs nhơm geh kơnòl, tơrgùm kơlôi sơnơng nền nòn tơl tơngume; mblàng lơh loh, sền sơ wì dồ bă song dơpă, tơl làm, cribơyai dong dơpă, tàm pơndang, mblàng lơh loh nền nòn, đơs loh jơnau bơh tài gơbàn bơh ală cồng nha lơh geh kung bè ală bơta gam ờ niam. Tă pơgồp uă jơnau đơs jơh nùs, niam rlau. Mờ kung ai tơlik ală broă lơh, ngan là ală broă lơh tam gơl pràn nàng bơsong ală kòl yan tàm tơngai bơtàu tơnguh lơh sa – mpồl bơtiàn, lơh jat bơta kơp gơn bơh cau tĕ khà mờ làng bol ală jơi bơtiàn tàm càr dê”.

Jơnau yal bơh Hội đồng Ñân zân càr Dăk Lăk dê, lùp dồs priă dia nam 2023 bơh càr Dăk Lăk dê kờp dŭ roh mờr 2 rbô tơmàn đông, ndrờm mờ roh mờr 23% pơndrờm mờ broă rơndap lơh, lơyah rlau 14,7% pơn drờm mờ nam 2022. Jơnau tờm là tài bơh uă ngan mpồl lơh sa kă bro tàm càr gơtìp kal ke tàm broă lơh sa kă bro, geh bal mờ ală mpồl lơh sa kă bro geh khà tă pơgồp uă ai kes priă in. Jat ồng Bùi Văn Yên, Kwang atbồ Sở Tài cíñ càr Dăk Lăk pà git, khà roh priă dia uă ngan rlau jơh bơh càr dê là roh priă ai bơh ngui ù, tài drà kă bro ù tiah hìu đam gơmù rlau ir mờ jơnau kờp dŭ: “Khà roh do uă ngan là tài broă lơh priă jền. Tàm hơ̆, broă lơh gơ rềng tơn là gơnoar ngui ù, lơh broă jàu jơnhua rlau mờ khà kờp dŭ dà lơgar jàu. Dà lơgar jàu mìng 1 rbô 600 tơmàn đông, mơya càr neh lơh broă jàu gơguh tus 3 rbô 900 tơmàn đông, kờp dŭ nam do mìng lùp geh 1 rbô 700 đôwng gời. Priă ù neh roh rlau 2 rbô tơmàn đông. Dùl bơta tai là priă ai bơh broă lơh tac mờ blơi phan bơh lơgar ndai roh mờr 300 tơmàn đông tai, kờp jơh bàr khà do neh roh rlau 2 rbô tơmàn đông pơndrờm mờ broă jàu”.

Bulah uă cồng nha kal ke, ờ lơh gơtùi broă jàu, mơya tàm pơrjum bơh ală càr tàm tiah Tây Nguyên dê, ală kwang bàng Hội đồng Ñân zân neh tơrgùm mblàng lơh loh, tă pơgồp uă jơnau đơs geh bơta niam, geh tơngume tờm tàm ală broă bơtàu tơnguh lơh sa – mpồl bơtiàn tàm càr. Uă ngan ală jơnau đơs bơh kwang bàng dê ndrờm ring bal đơs, tàm tŭ tơngai kal ke bal bơh gùt lơgar dê, cồng nha lơh geh pal pơn jờng ngan, ai gŏ bơta lơh ngan bơh ală kâp, ală gah broă dê tàm broă đơng lam, sồr lơh jat ală jơnau kờñ, kơnòl broă neh ai tơlik. Nam 2024, pal pơn jat tai geh ală broă lơh kràñ cê rlau, pơgồp bơnah lam lơh gơtùi ală broă jàu, kơnòl broă bơtàu tơnguh lơh sa – mpồl bơtiàn tàm nam tus kung bè tàm tơngai bơh nam 2021 tus nam 2025.