Càr Lâm Đồng tơnơ̆ tŭ tơmut bal geh 5 sàh tiah nhàr lơgar geh Quảng Trực, Tuy Đức, Thuận Hạnh, Thuận An mờ Dăk Wil, rềp mờ lơgar Campuchia. Pe hìu bơsram ơm sa bic tơn bàr kâp geh sơn đờm lam lơh tàm ală sàh Dăk Wil, Thuận Hạnh mờ Tuy Đức geh kờp jơh priă bơcri lơh mờr 675 tơmàn đong. Hìu bơsram do geh lơh jat broă lơh kâp pe, mờ ală bơnah hìu jơnhua bơh 1 tus 3 cờn. Tơngai lơh bơh nhai 3 nam 2026 tus nhai 8 nam 2027. Tŭ ai ngui, ală hìu bơsram rơp drơng ai mờr 4 rbô 150 nă kơnòm bơsram bơh kâp 1 tus kâp 2 là oh kòn làng bol ală jơi bơtiàn dồ nă cau in bơsram sră.

Tàm sàh Dăk Wil, ồng Hồ Văn Mười, Củ tịc Anih duh broă Làng bol càr Lâm Đồng sồr cau tờm bơcri priă, cau tờm lơh rơndap broă lơh jat tŭ tơngai hơ pơrgon; ală sờh, gah broă lơh rơcang khà cau pơgru, mờ kung sồr ƀòn lơgar cih mat wil tơl kơnòm bơsram lòt bơsram. Ồng Hồ Văm Mười đơs sùm:  “Sồr cau tờm bơcri priă, ală cau tờm lơh rơndap broă pal pơgồp bal nền nòn, bơt bơtàu sră wac rùp, nàng lơh bè lơi lam lơh bơt bơtàu jat tŭ tơngai hơ pơrgon mờ bơta niam broă lơh dê pal geh ơn lài ngan. Gơ wèt mờ Sờh Bơto bơtê mờ Bơsram, ală oh mi pal kờp dŭ bè lơi nàng gàr tơl cau pơgru; ală bơnah broă phan bơna bơto bơtê mờ bơsram pal gàr tơl, halà bơto tàp pràn să jan. Lơh bè lơi di pal là hìu bơsram gàr bơta niam jat jơnau sồr”.

Dăk Wil geh tơrgùm dùl bơh 2 sàh là Ea Pô mờ Dăk Wil, gơ wèt kơnhoàl Cư Jút, càr Dăk Nông yau. Broă Đảng, Dà lơgar sền gròi bơcri priă lơh phan bơna bơto bơsram rơp dong tơnguh bồ tơngoh bơsram sră làng bol dê, pơgồp bơnah bơtàu tơnguh lơh sa mpồl bơtiàn. Is ồn, gơ wèt mờ ală kơnòm bơsram, hìu bơsram ơm sa bic tơn bàr kâp là bơta kơp kờñ, anih mờ ală oh geh ơm sa bic, bơsram sră mờ dờng pràn tơl làm. Oh Nguyễn Trần Gia Linh, kơnòm bơsram ơdŭ 5, là 1 tàm 10 nă kơnòm bơsram jak sơrlèt gan kal ke bơh sàh Dăk Wil dê pơn yờ să ngan geh dờp priă dong kờl bơsram di dơ̆ sơn đờm lơh Hìu bơsram ơm sa bic tơn bàr kâp sàh Dăk Wil, càr Lâm Đồng đơs: “Ngai do geh tus ndo oh chờ hờp ngan, pơn yờ să ngan, chờ hờp tài geh dờp phan pà mờ priă dong kờl bơsram. Nam tus mut ơdŭ 6, oh rơp geh bơsram tàm hìu bơsram dờng niam, wil tơl phan bơna. Hìu bơsram geh wil tơl anih sàu sa, ơm bic, bơsram sră, ngan ngồn là anih niam ngan gơ wèt mờ bol oh. Oh hơ pơrgon rơp pơn đơl bơsram sră, pơlam tàp gơ in niam nàng gơ gơs pơgru tàm tơnơ̆ do, nàng lơh jat bơta kơp kờñ mè bèp, ală wa đơng lam bồ Đảng, Dà lơgar neh sền gròi”.

Tàm sàh Ea Bung, càr Dăk Lăk kung sơn đờm lam lơh Hìu bơsram ơm sa bic tơn kâp 1 mờ kâp 2 sàh Ea Bung. Broă lơh geh kờp jơh priă bơcri lơh mờr 250 tơmàn đong, geh ai bơh priă bơcri dà lơgar mờ ƀòn lơgar dê, geh lơh tàm bă ù ơnàng mờr 6 lồ tàm thôn 1. Tŭ lơh gơs, hìu bơsram rơp drơng jơnau kờñ bơsram sră, ơm sa bic ai rlau 1 rbô 300 nă kơnòm bơsram là oh kòn làng bol jơi bơtiàn dồ êt nă cau tàm tiah nhàr lơgar. Mò Phạm Thủy Tiên, Củ tịc Mpồl duh broă Làng bol sàh Ea Bung pà git, sàh Ea Bung geh tơng gơs bơh bơta tơmut bal sàh Ea Bung mờ Ya Tờ Mốt, ù tiah dờng ơnàng, làng bol ơm kis rah rài, broă lòt rê, bơsram sră bơh kơnòm bơsram dê, ngan là tàm nhai mìu gam uă ngan kal ke. Broă bơcri priă lơh hìu bơsram ơm sa bic tơn bàr kơp geh kơp kơnờm rơp lơh gơlik bơta tam gơl tàm broă tơnguh cồng nha bơto bơsram tàm tiah nhàr lơgar: “Jơnau lơh nền bơh Đảng mờ Dà lơgar dê bơcri priă ai sàh Ea Bung in lơh hìu bơsram do den làng bol chờ hờp ngan. Gơtùi lơh hìu bơsram do den lài ngan oh kòn geh tơrgùm bơsram mờ phan bơna den wil tơl, gàr niam broă lòt rê mờ gròi sền ală oh geh lơh niam rlau. Bol hi pin dờn là oh kòn tàm tiah nhàr lơgar do tàm tơngai tus rơp geh sền gròi, bơto bơtê niam rlau nàng wèt tus tơnơ̆ do tiah nhàr lơgar bơh dà lơgar dê rơp kơnhăp kơ̆ rlau”.

Quảng Ngãi là dùl tàm 17 ƀòn lơgar tiah nhàr lơgar ù gờl tàm lơgar dơ̆ lĕ bal bơyai lơh sơn đờm lam lơh, tờ ù lơh hìu bơsram. 5 rơndap broă lơh Hìu bơsram ơm sa bic tơn kâp 1 mờ kâp 2 geh sơn đờm lam lơh drim do tàm ală sàh: Bờ Y, Ia Tơi, Ia Đal, Đăk Long mờ Đăk Plô, càr Quảng Ngãi, kờp jơh priă bơcri lơh rlau 1 rbô 116 tơmàn đong. Tơl hìu bơsram geh lơh tàm bă ù ơnàng mờr 5 lồ, drơng bơh 700 tus 1 rbô 600 nă kơnòm bơsram in, di mờ bơta geh ngan bơh tơl sàh dê. Ală rơndap broă lơh geh lam lơh jat broă lơh hìu bơsram ơm sa bic tơn kâp 1 mờ kâp 2, lơh gơs ală hìu bơsram tơrgùm bal. Mò Y Ngọc, Phó Củ tịc Duh broă sùm Anih duh broă Làng bol càr Quảng Ngãi pà git, broă lơh ală hìu bơsram do rơp pơgồp bơnah tơnguh cồng nha bơto bơsram tàm tiah nhàr lơgar ù gờl: “Tŭ lơh gơs mờ ai ngui, Hìu bơsram kòn cau ơm sa bic tơn kâp 1 mờ kâp 2 sàh Bờ Y mờ ală sàh sơnđờm lam lơh ngai do rơp gơs là dùl tàm ală hìu bơsram lơh lài, drơng bơta kơp kờñ, lơh gơs bơta kơp kờñ bơsram sră mờ tă pơgồp bơh rơnàng kơnòm să tiah nhàr lơgar dê, pơgồp bơnah bơto bơtê cau lơh broă ai bơta bơtàu tơnguh bơh ƀòn lơgar, sàh mờ càr dê in”.